"تەررورلىق ءقاۋىپ تۋىنداعان كەزدە" عالامتور مەن ۇيالى تەلەفون ۋاقىتشا ءسوندىرىلۋى مۇمكىن. بۇل تۋرالى قازاقستان رەسپۋبليكاسى ىشكى ىستەر ءمينيسترى قالمۇحانبەت قاسىموۆ ايتتى.

ونىڭ سوزىنە قاراعاندا تەررورلىق ءقاۋىپ تۋىنداعان كەزدە بارلىق بايلانىس قۇرالدارىن «جاۋىپ» تاستاۋ كەرەك. وسى ارقىلى ەكسترەميستىك ارەكەتتەرگە توسقاۋىل قويۋعا بولادى-مىس.

ياعني، ءسىز ءبىر ساتتە اكە-شەشەڭىزبەن، بالا-شاعاڭىزبەن، تۋعان-تۋىسىڭىزبەن، دوس-جاراندارىڭىزبەن بايلانىسا الماي قالاسىز. ءتىپتى، قالمۇحانبەت مىرزا بۇيرىق بەرىپ، بايلانىس قۇرالدارىن قايتا ىسكە قوسقانشا بىر-بىرلەرىڭىزدى ىزدەپ تەنتىرەپ كەتۋلەرىڭىز ابدەن مۇمكىن.

ءبىز بۇل ماسەلەنى "ءقاۋىپ ەتكەننەن" ەرتە ايتقانبىز. «الدا-جالدا... الاش قايدا جينالادى؟» دەپ بار قازاققا جار سالعانبىز(http://qamshy.kz/؟p=6732).

الدا-جالدا... الاش قايدا جينالادى؟

ءححى عاسىر – سان ءتۇرلى تەحنيكا مەن مىڭ سان اقپارات عاسىرى. ءسوز ۇستايتىن، ەل باستايتىن ادامنىڭ ءبارى تەلەكوممۋنيكاسيا مەن كومپيۋتەرگە تاۋەلدى. بۇل ءۇردىس ادامدار اراسىنداعى قارىم-قاتىناستى باسى ءبۇتىن باسقا ارناعا بۇردى. ياعني ءسىزدىڭ حات-حابار الىسىپ، حال-جاعداي ۇعىسۋ «قىزمەتىڭىز» تۇگەلدەي تەحنيكاعا جۇكتەلگەن.

كەشە عانا ۇيالى بايلانىس ارقىلى تاراعان «بانكتەر بانكروتى» تۋرالى قاۋەسەت قانشالىقتى دەڭگەيگە جەتكەندىگى كوز الدىمىزدا. ايتايىن دەگەنىمىز بۇل ەمەس. تاۋەلسىزدىك پەن مەملەكەتتىك قاۋىپسىزدىكتى ساقتاۋ – ءاربىر ازاماتتىڭ پارىزى. ءاستى-ۇستى ەن بايلىققا تولعان قازاق جەرىنە كوز تىگۋشىلەر قاي-قاشاندا ساقاداي ساي وتىر. ەندەشە، كەز كەلگەن ۋاقىتتا تونەر قاتەر-قاۋىپكە قازاق بالاسى دايىن با؟

تۇگەل بيلەر جينالىپ، باس قوساتىن «كۇلتوبەمىز» قايسى؟ التى الاشتىڭ باسىن قوساتىن تۋى جەلبىرەگەن تۇعىرىمىز قاي جەر؟

ۇيال بايلانىسىڭىز اياق استى ءۇزىلدى، ينتەرنەتىڭىز ءبىر ساتتە كوزدەن عايىپ بولدى دەلىك. ءبىرىڭدى ءبىرىڭ قايدان تاباسىڭ قازاق؟ سايدا سانىڭ، قۇمدا ءىزىڭ قالماي ساندالىپ قالاسىڭ با؟

بۇل جوق جەردەن جاۋ شاقىرۋ ەمەس. باسىمىز ەسەن، باۋىرىمىز ءبۇتىن زاماندا ىشكى-سىرتقى جاۋلاردان قورعانۋعا ءارقاشان دايىن بولساق دەگەن وي. ءبىر عانا الماتىنىڭ وزىندە رەسپۋبليكا سارايى، جاڭا الاڭ، كونە الاڭ، سارى ارقا تەاترى… قويشى، ايتەۋىر ون قازاقتى توپستارىماۋعا بارلىق جاعداي جاسالعان.

ءبىر-بىرىن ايتقىزباي ۇعاتىن ۇلتتىق ۇستانىم، ۇلتتىق يدەيا، ۇلتتىق مۇرات اتىمەن جوق بىزدە. تاۋەلسىزدىكتىڭ 23 جىلى مۇنداي قاسيەتتى ۇعىمدارعا مۇرىن شۇيىرە قارادى.

اتالى ءسوز ايتىڭدارشى الاش بالاسى! ەلدىڭ تاۋەلسىزدىگىنە، مەملەكەتتىڭ قاۋىپسىزدىگىنە «سىزات تۇسەر» سىن ساعات تۋسا بىرەۋ-بىرەۋدى شاقىرماي-اق قايدا باس تۇيىستىرەمىز؟ قاي قالانىڭ قاي بۇرىشى ءبىزدىڭ ات بايلار ورىنىمىز بولادى؟ (ارينە، قۇداي ساقتاسىن جيىلعاننان!!!)