ەندى ساقشىلار جول ەرەجەسىن بۇزعان جۇرگىزۋشىلەردىڭ ايىپپۇلىن كولىك ىشىنەن شىقپاي-اق تولەتا الادى، - دەپ حابارلايدى Qamshy.kz   31 ارناعا سىلتەمە جاساپ.

الا تاياعىمەن بىرگە ارنايى تەرمينالدى ۇستاپ جۇرۋگە مىندەتتەلگەن پوليسەيلەر جۇرتتى ۇزىن-سونار كەزەككە تۇرماي، كارتامەن تەرمينالعا ايىپپۇل تولەۋگە ۇيرەتەمىز دەپ وتىر.

- ەگەر دە بارمايمىن دەسەڭىز، كەزەكتە تۇرىپ، جۇمىستان سۇرانبايمىن دەسەڭىز، وسى جەردە تولەي سالۋعا بولادى، 50 پايىزدىق جەڭىلدىكپەن. ءبىر كۇننىڭ ىشىندە بىزدە ءقازىر 3 وپەراسيا بولدى، جول ەرەجەسىن بۇزعان ادامدار كارتامەن تولەدى، - دەيدى استانا قالالىق ءىىد ءاپب ءبولىم باستىعى نۇرجان ءادىلوۆ.

ازىرگە استانالىق پوليسەيلەر قولىندا ۇيالى تەلەفونعا ۇقساس تەرمينالدىڭ 30-ى بار. قۇرىلعىعا حاتتاما ءنومىرى مەن ايىپپۇل مولشەرى ەنگىزىلگەن سوڭ، چەكتىڭ ءبىرى جۇرگىزۋشىگە بەرىلەدى. بۇل سەنىمدىلىك ءۇشىن. ەكىنشىسى قورعا ەنگىزىلەدى. ءتىپتى، جول ەرەجەسىن بۇزباي كوشەدە كەلە جاتقان جۇرگىزۋشىنىڭ ءوزى قارىزى بارىن بىلسە، پوليسەيگە كەلىپ ايىپپۇلىن تولەي الادى.

تەرمينالمەن قالاي قولدانۋدى بانك وكىلدەرىنەن ارنايى ۇيرەنگەن ساقشىلار اقشانى قولعا المايمىز، دەمەك جەمقورلىق بولمايدى دەپ وتىر.