بۇگىن "روسسيا 24" ارناسىنان قىرىمنىڭ رەسەيگە قوسىلعانى تۋرالى كرەملدە جالپاق الەمگە جار سالعان ۇلكەن جينالىس بولدى. جينالىس باستان - اقىر تىكەلەي ەفردەن تاراتىلدى. ءسوز سويلەگەن رەسەي پرەزيدەنتى پۋتين دە، جينالعان قاۋىم دا جانارلارىنان قۋانىش جاسىن توگە وتىرىپ، ءبىر باقىتتى ءساتتى باستان كەشىردى. رەسەي ءوزىنىڭ الەم الدىنداعى تاعى ءبىر ۇلكەن جەڭىسىن اتاپ ءوتتى. بارشا ورىس حالقىنىڭ ەڭسەسى كوتەرىلدى. اقش پەن ەۋروپا وداعى قانشا جەردەن سانكسيا سالسىن، جازالاسىن، مويىنداماسىن، وعان قاراپ جاتقان پۋتين جوق، قىرىم رەسپۋبليكاسىن رەسەي قۇرامىنا قوسۋ تۋرالى كەلىسىم جوباسىن ماقۇلدادى، ەكى جاقتىلى كەلىسىمگە قول قويىستى. سونىمەن بۇل ماسەلەگە نۇكتە قويىلدى دەگەن ءسوز. ءپۋتيننىڭ سوزىنە قاراعاندا، رەسەي مەن ۋكراينا اراسىندا بەلگىلەنگەن جاڭا شەگارا سىزىعى جوق ەكەن. باياعى كەڭەستىك كەزەڭنىڭ سۇرلەۋى عانا بار كورىنەدى. وسى جەردە ءبىزدىڭ ەلباسىمىز ن.نازاربايەۆتىڭ اينالاداعى كورشىلەرمەن تۇتاسىپ جاتقان شەگارانى جاڭا تالاپقا ساي دەر كەزىندە بەكىتىپ العان ەرلىگىن؛ شەگەرالىق وبلىستاردى ءبىر - بىرىنە قوسىپ، قازاقتاردىڭ ارا سالماعىن ارتتىرعان شەشىمىن؛ ەل استاناسىن اقمولاعا اۋىستىرعان تاريحي ەرلىگىن ەرەكشە اتاپ وتكەن ءجون. بۇل العاشقى قاتەردەن امان الىپ قالۋى – قالدى. ءبىراق، ماڭگىلىك ماسەلە ءالى شەشىلگەن جوق! ول – شەتتەگى قازاقتاردىڭ وسىندا ورالۋى! جالپى، قىرىمنىڭ ۋكراينا قۇرامىندا بولۋى نەمەسە رەسەيگە ءوتۋى – ءبىر قىرىنان العاندا ونشا ماڭىزدى ەمەس. ول ءبارىبىر بوداندىق قامىتىنان قۇتىلعان جوق. بۇل جەردە رەسەيدىڭ ءالى دە بۇرىنعى قۋاتىندا ەكەنىن، ءپۋتيننىڭ يمپەراتورلىقتىڭ رۋحىن ۇزبەي جالعاستىرا العانىن مويىنداۋ كەرەك. ءبىز كوبىندە اقش - قا ءۇمىت ارتامىز. اقش رەسەي مەن قىتايدى قىسا تۇسسە ەكەن دەيمىز. ءسويتىپ، «بۇقا سۇرسە، ازبان سۇيسىنەدىنىڭ» كۇيىن كەشەمىز. ەندىگى جەردە ونداي ەسەك دامەنى دوعارعانىمىز ءجون! قازاقستانعا شەگارا سىرتىندا قالعان قازاق جەرىن قايتارىپ الۋدى تالاپ ەتىپ وتىرعان ەشكىم جوق.تەك، ءوز اياعىمەن كەلگەلى وتىرعان شەتتەگى قازاقتاردىڭ جولىن اشۋ، جەڭىلدەتىلگەن تارتىپپەن تەزدەتىپ ازاماتتىق بەرۋ، قاتەرلى ايماق – سوتۇستىكتى حالىققا تولتىرۋ كەرەك! مەن ن.نازاربايەۆتان وسىنداي شەشىم كۇتەم! «شەتتەگى قازاق كەلسىن!» دەگەن قاۋلىنىڭ قابىلدانۋىن؛ ەلباسىنىڭ ەرلىگىنە بۇگىنگى ورىس حالقى قۇساپ بۇكىل الاش ءجۇرتىنىڭ ايىزى قانىپ قۋانعان، كوزىنە جاس العان ءساتىن كورگىم كەلەدى! مەندە باسقا ارمان جوق ازىرگە، اعايىن!