كەشە ەڭبەكشىقازاق اۋدانىنداعى «قازاقستان» اۋىلىنا جول تۇسكەن. سوندا شايمۇرات اقساقالدىڭ بالاسى الماسپەن سويلەسىپ وتىرعانىمىزدا اۋىلدىڭ جوعارعى تاۋ جاعى تۇگەل قورشالىپ الىنعانىن ايتتى: «جايلاۋعا شىعاتىن توتە جول جابىلدى. جايلاۋعا بارۋ ءۇشىن ەندى تەسكەنسۋدىڭ ءۇستى ارقىلى ونشاقتى شاقىرىم اينالىپ جەتۋ كەرەك. جاقىنداعانداردى كۇزەتشىلەرى كىرگىزبەي «اتامىز!» دەپ قورقىتادى. ءماسىموۆتىڭ اكەسى دەي مە بىرەۋ تاۋ ەتەگىن مەنشىكتەپ الىپتى. سودان بۇل جاقتىڭ حالقى وتە اشىنىپ وتىر».
بۇل دەرەككە مەنىڭ ەش كۇمانىم جوق. شىنىمەن دە الاتاۋدىڭ بۇكىل باۋرايىن، قازاقستاننىڭ نەبىر شۇرايلى جەرلەرىن دوكەيلەر ون مىڭ گەكتارلاپ ءبولىپ العان. اتا-بابالارىمىز قازاق جەرىن بۇگىنگى لاتيفۋنديستەر كوكپارعا سالسىن دەپ قورعاپ قالعان جوق. بيلىك ءادىل بولسا – حالىقتىڭ يەسى، ال حالىق قاشان دا – جەردىڭ يەسى.
سوندىقتان ب.ساعىنتايەۆتىڭ توراعالىعىمەن ەلدەگى جەر رەفورماسىنا قاتىستى زاڭنامالىق اكتىلەردى قاراپ، داۋلى ماسەلەنىڭ ءتۇيىنىن شەشۋگە ءتيىس كوميسسيانىڭ الداعى وتىرىستارىندا جەر كودەكسىنە قاتىستى جەردى ساتۋ مەن جالعا بەرۋدى توقتاتىپ قانا قويماي، بۇعان دەيىن لاتيفۋنديستەرگە (جەرمەن تىكەلەي وزدەرى اينالىسپايتىندارعا، وليگارحتارعا، بيلىك كاستاسىنا) بەرىلىپ كەتكەن قازاق جەرى تۇگەلدەي مەملەكەت مەنشىگىنە قايتارىلۋعا ءتيىس! مۇنداي جەرلەر كوررۋپسيالىق سحەمالارمەن مەنشىكتەلگەنىنە حالىقتىڭ ەش كۇمانى جوق. جەر پروبلەماسى ارى قاراي اسا ماڭىزدى ماسەلە رەتىندە كونستيتۋسياعا سايكەس رەفەرەندۋم جولىمەن شەشىلگەنى دۇرىس.
وعان دەيىن جەر داۋىن باسۋ ءۇشىن وسىنداي «نۋليەۆوي ۆاريانت» ەكى جاققا دا ءتيىمدى. ويتكەنى، مۇنداي قادام اسا ىقتيمال بولىپ تۇرعان الەۋمەتتىك سىلكىنىستىڭ الدىن الادى، حالىقتىڭ كەرنەگەن اشۋ-ىزاسىن تومەندەتەدى. بيلىك لاتيفۋنديستەردىڭ مۇددەسىن ەمەس وسىلاي حالىقتىڭ مۇددەسىن قورعاسا عانا ازدى-كوپتى ابىرويىن ساقتاپ قالادى.
مارات توقاشبايەۆتىڭ «فەيسبۋكتەگى» پاراقشاسىنان الىندى
