رەسەيدەگى مەملەكەتتىك جانە ءبىرقاتار ۆەدومستۆو قىزمەتكەرلەرى اقش-تىڭ ارنايى قىزمەتىنىڭ ارەكەتىنە بايلانىستى الداعى ۋاقىتتا امەريكالىق Microsoft قىزمەتىنەن باس تارتپاق نيەتتە. بۇل پىكىردى رەسەيدىڭ بايلانىس ءمينيسترى نيكولاي نيكيفوروۆ ايتتى، دەپ جازادى "روسسييسكايا گازەتا" "امەريكالىق "كۇش قۇرىلىم وكىلدەرى" اقش-تا شىعارىلعان قۇرىلعىلار مەن قامتاماسىز ەتۋ باعدارلاماسىن قولدانۋعا كەدەرگى كەلتىرە بەرگەندىكتەن رەسەيدەگى مەملەكەتتىك قىزمەتتەگىلەر مەن مەملەكەتتىك قۇرىلىمدارعا جاقىن ءبىرقاتار ۆەدومستۆولار Microsoft قىزمەتىنەن باس تارتاتىن بولادى"، - دەپ مينيستر ءوزىنىڭ Instagram پاراقشاسىنا جازعان ەكەن. ءمينيستردىڭ بۇل پىكىرى امەريكالىق Wall Street Journal باسىلىمىنا باعىتتالىپ وتىرعانداي. وعان سەبەپ، ناۋرىزدىڭ 24ء-ى كۇنى بۇل باسىلىم "اقش رەسەيگە قاتىستى اۋقىمدى اقپاراتتىق زەرتتەۋ جۇمىستارىن باستادى" دەپ جازعان بولاتىن. ول ماقالادا سونداي-اق امەريكالىق ارنايى قىزمەتتەردىڭ وكىلدەرى سپۋتنيكتىك قۇرىلعىلار ارقىلى رەسەي، ۋكراينا مەن بالتىق ەلدەرى اۋماعىندا قىزمەتتە جۇرگەن رەسەيلىك اسكەريلەردى اڭدۋدى كۇشەيتپەك دەپ تە جازىلعان. ساراپشىلار رەسەيلىك ءمينيستردىڭ بۇل پىكىرىنىڭ جۇزەگە اساتىنىنا كۇمانمەن قارايدى. سەبەبى، رەسەيدى ايتپاعاندا بۇكىل الەم حالقى نەگىزىنەن اقش-تا شىعارىلعان گادجەتتەر مەن قامتاماسىز ەتۋ باعدارلامالاردىڭ قىزمەتىن پايدالانادى. اتاپ ايتقاندا، زور سۇرانىسقا يە iPhone سمارتفونى مەن Microsoft، Android سەكىلدى وپەراسيالىق جۇيەگە بالاما بولا الاتىنداي جوبالار ازىرگە الەمدە جوق. Tengrinews.kz