ايتۋعا وڭاي... كوڭىلىم قالدى... ايتۋعا وڭايعا وكپەم قارا قازانداي... ءاي، وزىمە دە وبال جوق-اۋ! نەگە باردىم ەكەن؟ نەگە؟ "بەردىبەك سوقپاقبايەۆ جايلى ءتۇسىرىلىم جاساماقپىز" دەگەن سوڭ، قۇستاي ۇشىپ ەدىم. بەردىبەكتىڭ ءومىرى، شىعارماشىلىعى جايلى بار بىلەتىنىمدى، ويعا تۇيگەنىمدى ايتسام دەپ ەدىم. ءولىمى جايلى دا كوكەيدە ءبىراز جايت سارناپ جاتىر. ءبىراق، بارلىق ويىم كەسىلىپ تاستالىپتى. ەفيرگە جىبەرگەندەرى ءبىر اۋىز ءسوز. اقىرى قيعىش ەكەن، الا سالمادى ما؟ مەنسىز دە، سول باعدارلاما "كەرەمەت" بولىپ جارق ەتە قالار ەدى عوي. بەردىبەكتىڭ قالاي ولگەنى جايلى ءۇش نۇسقا بار. ءبىرىنشىسى - وتباسىلىق كيكىلجىڭ. كەيىنگى جەڭگەيدەن تۋعان ەكى ۇلىنىڭ تاربيەسىنە قاتىستى ءتۇرلى اڭگىمەلەر ايتىلعان بولاتىن. ايتىلا بەرەدى دە. ەكىنشىسى - "ولگەندەر قايتىپ كەلمەيدىنىڭ" مەملەكەتتىك سىيلىقتى الا الماي قالۋى. بۇل ءوز دارەجەسىندە جازۋشىنىڭ پسيحولوگياسىنا اسەر ەتپەۋى مۇمكىن ەمەس. ءۇشىنشىسى ءقازىر ەكىنىڭ ءبىرى ايتىپ جۇرگەن بۇۇ-نا حات جازباق بولعانى. كەڭەستىك يدەولوگياعا قارسى شىعۋى. مەن العاشقى ەكەۋىن ايتا وتىرىپ، جوققا شىعاردىم. ءوز باسىم ءۇشىنشى نۇسقاعا سەنەتىنىمدى ايتتىم. ال، "ايتۋعا وڭايلىقتار" بۇعان پىسقىرماپتى دا. العان دا، قيىپ تاستاي سالعان. سوندا دەيمىن-اۋ، مەن ومىردەن قايتىپ كەتكەن قادىر ءمىرزا-الىنىڭ جانە سول تۇسىرىلىمگە قاتىسقان امانحان ءالىمنىڭ ويىن قايتالاۋ ءۇشىن بارىپپىن با؟ ءجارايدى، بۇل قىسقاردى دەيىك. مەن بەردىبەك اعامىزدىڭ 17 جىل بويى ەڭتەڭە جازباۋى مۇمكىن ەمەس ەكەنىن دالەلدەپ تۇرىپ سويلەگەن ەدىم. سول 17 جىلدىڭ ىشىندە اعامىزدىڭ دىم جازباۋى مۇمكىن ەمەس. دەمەك، شىعارمالارى قولدى بولدى دەگەن ءسوز. بۇل ويىم دا جوق. ەسەسىنە بەكسۇلتان نۇرجەكە اعامنىڭ ماعان قارسى پىكىرى عانا ءجۇر. ول كىسى "ولگەندەر قايتىپ كەلمەيدىنى" 1984 جىلى جازىلدى دەدى. مەن اعامىزدىڭ جاعاسىنان الۋدى مادەنيەتسىزدىك ساناپ، تىنىش وتىر ەدىم، مەنىڭ ويىمدى بەردىبەك اعانىڭ ۇيىندەگى جەڭگەي راستاپ، بۇل شىعارمانىڭ وزدەرى اجىراسپاي تۇرعاندا جازىلعانىن دالەلدەپ بەردى. قۇدىرەتىڭنەن اينالايىن، "ايتۋعا وڭاي" ونى دا بەلىنەن سىزا سالىپتى. سوسىن باعدارلامانىڭ اياعىندا تاعى ەكى-اۋىز ءسوزىم جىلت ەتتى. الدىنداعى ءھام ارتىنداعى ويلارىم قيىلعاننان سوڭ، ونىڭ دا بەرەكەسى قالماپتى. اۋىلداعى اعايىننان، سونى كورگەن مەنى تانيتىن ادامداردان ۇيات-اي! بۇدان كەيىن كورمەگەنىم، بارماعانىم - "ايتۋعا وڭاي" بولسىن! وسى باعدارلامادا جۇمىس جاسايتىن، ءوزىم جاقسى كورەتىن باۋىرلارىم بار. سول باۋىرلارىما ايتارىم مىناۋ... مەنى كلوۋن جاساپ قويعاندارىڭىز ءۇشىن راحمەت... دۇنيە الما كەزەك قوي..