قازاقستاننىڭ ەۋرازيالىق ەكونوميكالىق وداققا قاتىسۋى رەسپۋبليكانىڭ ەگەمەندىگىنە ءقاۋىپ توندىرمەيدى، تەك قانا تازا پراگماتيكالىق ەكونوميكالىق مۇددەنى كوزدەيدى. بۇل تۋرالى قازاقستان پرەزيدەنتى نۇرسۇلتان نازاربايەۆ سەيسەنبى كۇنى گااگادا وتكەن بريفينگتە مالىمدەدى.

    "ينتەگراسيا كەدەندىك كەدەرگىلەردى جويۋعا مۇمكىندىك بەرىپ، باسەكەگە قابىلەتتىلىكتى ارتتىرادى. سوندىقتان بىزدىكى تازا پراگماتيكالىق مۇددە - ەلدى دامىتۋ، ەكونوميكانى كوتەرۋ جانە ءىجو-نى ۇلعايتۋ. ال ءبىزدىڭ ساياسي تاۋەلسىزدىگىمىزگە كەلسەك، ول مىزعىمايدى، قازاقستان ەشكىمگە ەگەمەندىگىن بەرمەيدى"، - دەپ اتاپ ءوتتى نازاربايەۆ. ءبىراق مەملەكەت باسشىسى قازاقستاننىڭ بەلگىلى ءبىر ەكونوميكالىق وكىلەتتىكتەردى، مىسالى، ەۋروپالىق وداقتاعى سەكىلدى ءۇلتۇستى ورگاندارعا بەرەتىنىن ايتتى. "ەۋروكوميسسيا كەدەندىك ماسەلەلەردى شەشەدى، ساۋدا، تاريفتەر، مۇناي مەن گاز تاسىمالى، ەلەكتر ەنەرگياسى، تەمىر جول جانە اۆتوموبيل جولدارى سالاسىن رەتتەيدى. ءبىزدىڭ بولاشاق وداقتا بارلىق ماسەلە كونسەنسۋستىق نەگىزدە شەشىلەتىن بولادى. تۇپكىلىكتى شەشىم ءۇشىن بارلىق ءۇش مەملەكەتتىڭ دە كەلىسىمى تالاپ ەتىلەدى. سوندىقتان مۇندا ەشقانداي الاڭداۋ بولۋعا ءتيىس ەمەس، بۇل بارلىق مەملەكەتتەرگە، اسىرەسە داعدارىس جاعدايىندا ءتيىمدى. ينتەگراسيالىق ۇدەرىستەر ىلگەرىلەي بەرەدى، بۇل دا - ءبىزدىڭ تاۋەلسىزدىگىمىزدىڭ ماسەلەسى"، - دەپ ءتۇسىندىردى نازاربايەۆ. پرەزيدەنت ۋكرايناداعى وقيعالاردىڭ ينتەگراسيالىق پروسەستەرگە اسەر ەتپەيتىنىن جانە ەۋرازيالىق ەكونوميكالىق وداقتى قۇرۋ تۋرالى نەگىزگى شارتقا قول قويۋ جونىندەگى جۇمىستاردىڭ جالعاساتىنىن مالىمدەدى. ەسكە سالا كەتەيىك، قۇرامىنا قازاقستان، رەسەي جانە بەلارۋس ەنەتىن ەۋرازيالىق ەكونوميكالىق وداق 2015 جىلدىڭ 1 قاڭتارىنا قاراي قۇرىلۋى ءتيىس. نۇرسۇلتان نازاربايەۆ بريفينگتە، سونىمەن بىرگە، قازاقستاننىڭ ىشكى جانە سىرتقى ساياساتى تۋرالى دا ايتتى. "قازاقستاننىڭ سىرتقى ساياساتى تەڭگەرىمدىلىك پەن كوپۆەكتورلىققا نەگىزدەلگەن، ال ەلدەگى ىشكى احۋال تىلىنە، دىنىنە جانە مادەنيەتىنە قاراماستان، بارلىق ازاماتتاردىڭ تەڭدىگى مەن قۇقىقتارىن ساقتاۋدى نەگىزگە العان. بۇل بۇگىنگى الەمدە تىنىشتىق پەن تۇراقتىلىقتى قامتاماسىز ەتۋدىڭ باستى فاكتورى بولىپ سانالادى. ناق وسى نەگىزدە عانا مەملەكەت ورنىقتى دامي الادى. پراكتيكا ءبىزدىڭ ەلدەگى ساياساتىمىزدىڭ دۇرىستىعىن تاعى ءبىر رەت دالەلدەيدى. دامۋ ءۇشىن تاتۋلىق، كەلىسىم، حالىقتىڭ بىرلىگى كەرەك. سول سەبەپتى دە مەن شەت مەملەكەتتەردەگى ارىپتەستەرىمنىڭ بارلىعىن بەيبىت كەلىسسوزدەر جۇرگىزۋ قاجەتتىگىنە ۇگىتتەدىم"، - دەدى ول.