قاراعاندى وبلىسىنىڭ بۇقار جىراۋ اۋدانىنداعى كوكپەكتى اۋىلىندا تاسقىن قۇرباندارى سانىنىڭ بەس ادامعا جەتكەنى راستالدى.

"قازىرگى ۋاقىتتا بوگەت شايىلىپ كەتكەن كەزدە بەس ادامنىڭ قايتىس بولعانى انىقتالدى، زارداپ شەككەندەردىڭ سانى انىقتالىپ جاتىر. 300-دەي ءۇيدى سۋ باستى، ەكى ءۇي ءىشىنارا قيراعان. جالپى شىعىن ەسەپتەلىپ جاتىر. قۇقىق قورعاۋ ورگاندارى تۇراقتى قاداعالاۋ جۇرگىزىپ جاتىر، ولار توناۋشىلىققا جول بەرمەۋ ءۇشىن اۋلالاردى ارالاپ شىعىپ وتىرادى"، - دەلىنگەن تاراتىلعان حابارلامادا.

قاراعاندى وبلىسىنىڭ اكىمى باۋىرجان ابدىشيەۆ توتەنشە جاعدايلار ءمينيسترى ۆلاديمير بوجكومەن بىرگە سۋ باسقان اۋماقتاردى شولىپ شىقتى. تۇرعىندارمەن كەزدەسىپ، ولاردىڭ ەشقايسىسىنىڭ جاردەمسىز قالمايتىنىن ايتتى.

توتەنشە جاعدايلار مينيسترلىگىنىڭ مالىمەتىنشە، ساعات 12.00-دەگى جاعداي بويىنشا توپان سۋدىڭ بەتى قايتقان، ءقازىر جەرتولەلەر مەن ۇرالار عانا سۋعا تولىپ تۇر، اۋلالاردان سۋ دالاعا ايدالىپ جاتىر. ارنايى كوميسسيا تابيعي اپاتتىڭ شىعىنىن ەسەپتەۋگە كىرىسىپ كەتتى.

ەسكە سالايىق، 31 ناۋرىزعا قاراعان ءتۇنى كوكپەكتى سۋقويماسى تاسىپ، ىرگەدەگى اۋىلدى توپان سۋ باسقان بولاتىن. العاشقىدا ءتورت ادامنىڭ قازا تاۋىپ، تاعى توعىز ادامنىڭ زارداپ شەككەنى حابارلاندى. 400 ادام ءقاۋىپسىز جەرگە، وزگە اۋىلدارداعى تۋىستارىنىڭ ۇيىنە كوشىرىلدى. توتەنشە وقيعاعا قاتىستى قىلمىستىق ءىس قوزعالدى. Tengrinews.kz