ەلىمىزدىڭ ءبىرىنشى ليگاسىندا ونەر كورسەتەتىن شىمكەنتتىڭ “قىران” كومانداسىنا گوللانديالىق قازاق فۋتبولشى مۇرات ونەل قوسىلاتىن بولدى.

مۇرات توقان ۇلى ونەل 1987 جىلى ماۋسىم ايىنىڭ 20 كۇنى تۇركيانىڭ ساليحلى قالاسىندا تۋعان. وتباسى 1990 جىلدارى ەۋروپاعا قونىس اۋدارىپ بارعان. اتا-اناسى امستەردام قالاسىنىڭ ماڭىنا ورنالاسقاندىقتان جاس مۇرات سول جەردە مەكتەپ ءبىتىرىپ، التى جاسىنان فۋتبول ويناۋمەن اينالىسقان. بويى 179 سم، سالماعى 76 كەلى تارتاتىن قانداسىمىز ەۋروپا فۋتبولىندا اتى ءماشھۇر «اياكس» مەكتەبىنىڭ تۇلەگى. جاسىل الاڭدا جارتىلاي قورعاۋشى، ءتىپتى كوماندا ساپىندا شابۋىلشى بولىپ وينايتىن مۇراتتىڭ تەحنيكاسى جوعارى بولىپ، ەكى اياقپەن بىردەي سوققى جاساي بىلەدى. ايتپاقشى، بۇل قازاق فۋتبولىنا شەتتەن كەلگەن تۇڭعىش قانداسىمىز.

2006-2007-جىلدارى بەلگيانىڭ «بريۋگگە»، 2007-2008-جىلدارى گوللانديانىڭ «دەن حااگ»، 2008-2012-جىلدارى گوللانديانىڭ «ۆولەندام»، 2012-2013-جىلدارى فينليانديانىڭ «كاياني» كلۋبىنىڭ فورماسىن كيگەن قانداسىمىز العاش رەت اتامەكەنگە اياق باسقالى تۇر. وسى جىلدىڭ ناۋرىز ايىنىڭ باسىندا تۇركيانىڭ الانيا قالاسىندا وتكەن وقۋ-جاتتىعۋ جيىنىندا باپكەرلەر كوڭىلىنەن شىققان مۇرات جاڭا ماۋسىمدا شىمكەنتتىڭ «قىران» كومانداسىنىڭ جەيدەسىن كيمەك. جاقىندا عانا وڭتۇستىك قازاقستان وبلىسىنا تابانى تيگەن مۇرات ونەل ءوزىنىڭ قازاقستان فۋتبولىن نازاردان تىس شىعارمايتىندىعىن ايتتى.

«مەن گوللانديانىڭ پرەمەر-ليگاسىندا دا ويناعام. ول جاقتا باسەكەلەستىك وتە جوعارى. فۋتبولشىلاردىڭ تەحنيكالىق دايىندىعى وتە كۇشتى بولادى. سونداي-اق، كۇش-قۋاتتارى دا مول كەلەدى. ال، «قىران» كومانداسىنداعى ويىنشىلار جاستار ەكەن. تەحنيكالىق شەبەرلىكتەرى دە جاقسى. الايدا، ءبىز شارشاپ قالمايتىنداي بولۋىمىز كەرەك. كۇش قۋاتىمىز مىعىم بولعانى جاقسى. جالپى، قازاق فۋتبولىن ۇنەمى باقىلاپ وتىرامىن. «اقتوبە»، «شاحتەر» «ورداباسى» سىندى كلۋبتاردى جاقسى بىلەمىن»،- دەيدى مۇرات «الاش ايناسى» گازەتىننىڭ تىلشىسىنە بەرگەن سۇحباتىندا.

شىمكەنت اۋەجايىنا كەلگەن بەتتە اۋا-رايىنىڭ سالقىن ەكەندىگىن تىلگە تيەك ەتكەن فۋتبولشى، الداعى ۋاقىتتا ءوڭىردىڭ كليماتىنا ۇيلەسىپ كەتەتىندىگىن ايتتى. «اتامەكەنگە ءبىرجولاتا كەلۋگە ويىڭىز بارما؟»،- دەگەن تىلشىلەردىڭ سۇراعىنا «ەكى اپتادان سوڭ اتا-انام ەلگە كەلەدى. الماتىدا ناعاشىلارىم تۇرادى. ءارقاشان شەتتە جۇرسەك تە قازاقستانداعى تۋىستارمەن قارىم-قاتىناستى ۇزگەن ەمەسپىز»،- دەپ جاۋاپ قايتاردى.

جەكە ومىرىنە ۇڭىلگەن ب ا ق وكىلدەرىنىڭ سۇراعىنا «ءالى ۇيلەنگەن جوقپىن. دەگەنمەن، قازاق قىزىنا ۇيلەنگىم كەلەدى، ءبىراق فۋتبول دا ماڭىزدى. سوندىقتان وتباسىلىق ءومىر مەن سپورتتى قاتار الىپ جۇرەمىن»،- دەدى.

مۇراتتىڭ اتاجۇرتقا ورالۋىنا قازاق بلوگگەرلەرى كوپ ۇلەس قوسىستى. اسىرەسە، IT سالاسىنىڭ مامانى، تانىمال بلوگەر ارشات ورازوۆ بۇل ىسكە بەلسەنە كىرىسىپ، الەۋمەتتىك جەلى ارقىلى مۇراتتىڭ قازاق فۋتبولىنا دەگەن قىزىعۋشىلىعىن وياتقان. وتاندىق سپورت شەنەۋنىكتەرىنە تانىستىرعان دا سول بلوگگەرلەر ەكەن.

ەل ءبىرىنشى ليگاسىنىڭ ويىندارى 6 ساۋىردە باستالادى. “قىران” كومانداسى ءبىرىنشى تۋردا “استانا-64″ كومانداسىن قابىلدايدى. ەندەشە، جاسىنداي جارقىراعان قانداسىمىزدىڭ قازاق فۋتبولىنداعى العاشقى ويىنىن تاعاتسىزدانا كۇتەيىك.

ب ا ق.كز