قازاقستان جازۋشىلار وداعىنىڭ ۇيىمداستىرۋىمەن م.اۋەزوۆ اتىنداعى قازاق اكادەميالىق دراما تەاترىندا تولىمبەك الىمبەك ۇلىنىڭ 60 جاسقا تولۋىنا وراي «تال ءتۇس» اتتى مەرەيتويلىق كەش ءوتتى. كەشكە «قازاق گازەتتەرى» سەرىكتەستىگىنىڭ باس ديرەكتورى – رەداكتورلار كەڭەسىنىڭ ءتوراعاسى جۇمابەك كەنجالين، «انا ءتىلى» ۇلت گازەتىنىڭ باس رەداكتورى سامات يبرايم، ءبىر توپ اقىن-جازۋشىلار مەن زيالى قاۋىم وكىلدەرى  قاتىستى.

اتالعان شارانى قازاقستان جازۋشىلار وداعى باسقارماسىنىڭ ءتوراعاسى، قازاقستان رەسپۋبليكاسى پارلامەنتى سەناتىنىڭ دەپۋتاتى نۇرلان ورازالين ءسوز سويلەپ اشتى. تىلەۋقابىل مىڭجاسار مەن ايگۇل يمانبايەۆا جۇرگىزگەن باسقوسۋدا قالامگەردىڭ شىعارمالارىنان ۇزىندىلەر وقىلىپ، ولەڭدەرىنە جازىلعان اندەر ورىندالدى. ت.جامانقۇلوۆ، ن.ونەربايەۆ، ا.جورابايەۆا، ميراس پەن قۇرالاي، ق.ماقان، ق.ۇمبەتوۆ، «قۇلان ساز» ءانسامبلى اننەن شاشۋ شاشىپ، ا.بورانبايەۆ، ن.تۇتوۆ، «تاماشا» ويىن-ساۋىق وتاۋى، «تەرىسقاقپاي»، «ەكى ەزۋ» تەاترلارى، ت.ب. ونەر مايتالماندارى وتكىر ازىلدەرىمەن جينالعانداردى كۇلكىگە قارىق قىلدى.

الماتى وبلىسى اكىمىنىڭ ورىنباسارى س.مۇقانوۆ الماتى وبلىسى ءماسليحاتىنىڭ شەشىمىمەن «الماتى وبلىسىنىڭ قۇرمەتتى ازاماتى» اتانعان تولىمبەك الىمبەكۇلىن قۇتتىقتاپ، وبلىس حالقى اتىنان يىعىنا شاپان جاپتى.