قازاقستاندا «ايالاعان استانا» بالالار ءان بايقاۋىنىڭ ىرىكتەۋ كەزەڭى جالعاسۋدا. بۇل استانا اكىمدىگىنىڭ قولداۋىمەن ۇيىمداستىرىلىپ وتىرعان پوپ انشىلەردىڭ رەسپۋبليكالىق دوداسى. بايقاۋدى «دەستكايا نوۆايا ۆولنا» جانە رەسەيلىك تانىمال «ارس» كومپانياسى (پرەزيدەنتى يگور كرۋتوي) ۇيىمداستىرعانىنان بولار، جوبا جوعارعى دارەجەگە يە بولدى. بيىل بايقاۋدىڭ تۇساۋكەسەرى 27 ناۋرىز كۇنى الماتى قالاسىندا ءوتتى. بۇگىنگە دەيىن الماتى، تالدىقورعان، تاراز، شىمكەنت قالالارىندا ىرىكتەۋ ءوتتى.  الدا ءالى قىزىلوردا، قوستاناي، ورال، اتىراۋ، اقتاۋ، اقتوبە، قاراعاندى، سەمەي، پاۆلودار، كوكشەتاۋ، پەتروپاۆلوۆسك، استانا قالالارى كۇتۋدە.

بۇل ايماقتاردا وتكەن ىرىكتەۋلەر تۋرالى ءبىزدىڭ الداعى ساندارىمىزدان وقي الاسىزدار، ويتكەنى، ونەرپازداردى تىڭداۋ ءساۋىردىڭ اياعىنا دەيىن جالعاسادى.

«ايالاعان استانا»  رەسپۋبليكالىق بالالار بايقاۋى 3 كەزەڭنەن تۇرادى: رەسپۋبليكا بويىنشا ىرىكتەۋ، جارتىلاي فينال، فينال. فينال 2014 جىلدىڭ 4-6 شىلدەلەرىندە استانا قالاسىنىڭ تۋعان كۇنى قارساڭىندا وتەدى. ءادىل قازىلار القاسى سوڭعى ناتيجەلەرىن شىعارادى. جەڭىمپازعا ارنايى اقشالاي جۇلدە 1 ملن تەڭگە (ءوز ونەرىن ارى قاراي دامىتۋعا)، ال ەڭ باستىسى ءوزى ونەرىنىڭ ارقاسىندا «دەتسكايا نوۆايا ۆولنا» حالىقارالىق ءان بايقاۋىندا  قازاقستان اتىنان قاتىسۋ مۇمكىندىگىنە يە بولادى.  جوبا ەرەكشەلىگى – ۇلكەن ماسشتابتا ەلىمىزدىڭ تۇكپىر-تۇكپىرىنەن دارىن يەلەرىن ىزدەۋ.  ىرىكتەۋگە قالالاردان بولەك، اۋدان، اۋىل تۇرعىندارى قاتىسا الادى. بايقاۋ ۇيىمداستىرۋشىلارى قاتىسۋعا تىلەك بىلدىرگەن كەز-كەلگەن قاتىسۋشىعا ءوز ونەرىن كورسەتۋگە جاعداي جاساماق.    بايقاۋعا 8-12 جاس ارالىعىنداعى ونەرپازدار قاتىسا الادى.

ىرىكتەۋ كەزەڭى قازاقستاننىڭ 16 قالاسىندا وتەدى. قاتىساتىن جاس انشىلەردى حالىقارالىق جانە رەسپۋبليكالىق بايقاۋلار ارقىلى تانىلعان، قازاقستان ەستراداسىنىڭ جۇلدىزدارى ىرىكتەيدى.  ولار: باتىر باينازاروۆ، سالتانات باقايەۆا، اسەم كوپبايەۆا، گۇلنۇر ورازىمبەتوۆا، يۆان برەۋسوۆ، الماس كىشكەنبايەۆ، مارجان اراپبايەۆا، الىشەر كارىموۆ، ءمولدىر اۋەلبەكوۆا، اDAM، دانيار وتەگەنوۆ،  انەل ارينوۆا  ت.ب.

«ايالاعان استانا» - بولاشاقتا ەلىمىز ماقتان تۇتاتىن دارىندى جاس انشىلەردى تاربيەلەۋگە  ارنالعان  بالالار بايقاۋى. جوبا ماقساتى – رەسپۋبليكا بويىنشا ونەرلى جاس جەتكىنشەكتەردى انىقتاپ،  ولاردىڭ ارى قاراي شىعارماشىلىق قابىلەتتەرىنىڭ دامۋىنا، وسۋىنە ۇلەس قوسۋ. بىلتىرعى بايقاۋ جەڭىمپازى كوكشەتاۋلىق بولات باتىربايەۆ ەدى.

تورعىن  ءابۋشاحمان