جاقىندا «ەگەمەن قازاقستان» گازەتىنىڭ باسشىلىعىنا دارحان ءقىدىرالى تاعايىندالدى. باس گازەتتىڭ بۇعان دەيىن دە باسشىسى اۋىسقانىنا كوپ بولماعان. ساۋىتبەك ابدراحمانوۆتىڭ ءماجىلىس دەپۋتاتى اتانۋىنا بايلانىستى ونىڭ ورنىن بۇعان دەيىن ۆيسە-پرەزيدەنت لاۋازىمىن اتقارىپ كەلگەن ەركىن قىدىر باسقان ەدى.
بايقاۋىمشا، كەي ازاماتتارعا «ەگەمەن» باسشىلىعىنداعى ءاۋىس-تۇيىس جاقپاعان سياقتى. دارحان ءقىدىرالىنىڭ تاعايىندالۋىن سىناپ، ەركىن قىدىر ەكەۋىنىڭ اراسىنا وت سالۋعا نيەتتىلەر بار.
الىسقا بارماي-اق، اراسى الىس ەمەس وسى ەكى تاعايىنداۋدى قوعام قالاي قابىلدادى؟ سونى ەسكە الساق، كوپ نارسەگە قانىق بولاسىز. س. ابدراحمانوۆتىڭ ورنىنا ە. قىدىر مىرزا تاعايىندالعاندا رەسمي مالىمدەمەلەردەن باسقا، بۇل حاباردى قۋانا قابىلداعان جۇرت كورمەدىك. كوپشىلىك، «ەگەمەندە» جۇمىس جۇيەسى وزگەرمەيدى. ەسكى سارىن ساقتالادى. گازەتتىڭ جاڭارۋىن كۇتپەي-اق قويىڭىزدار» دەگەندەي پىكىر ءبىلدىرىپ جاتتى. ال، د. ءقىدىرالى تاعايىندالعان ساتتە سۇيىنشىلەگەن حابار جەلىدە جەلدەي ەستى. ەرەكەڭدى تومەندەتۋ ويىمىز جوق، ءبىراق بۇل – شىندىق. ابايەۆتى سىناۋشىلار ابايلاماي ە. قىدىر مىرزانىڭ دا بەدەلىنە نۇقسان كەلتىرىپ وتىرعاندارىن بىلە مە ەكەن؟
وسى رەتتە جۋرناليست امانگەلدى مىرزابەكتىڭ ەكى ازاماتقا قاتىستى الىپ-قاشپا اڭگىمەگە قاتىستى ايتقانىن اتتاپ وتە المايمىز.
«ەگەمەن قازاقستان» گازەتىنە جاڭادان باسشى بولىپ بارعان دارحان ءقىدىرالى مەن سول باسىلىمنىڭ باس رەداكتورى قىزمەتىن اتقارىپ وتىرعان ەركىن قىدىردىڭ اراسىنا وت تاستاعاندارىڭدى قويىڭدار، جىگىتتەر. ەركىن اعامدى دا، دارحان باۋىرىمدى دا قاتتى سىيلايمىن. ەكەۋى دە قازاقتىڭ مىقتى ازاماتتارى. قىزمەتتە تۇرعان نە بار؟ مىسالى، مەنىڭ ءبىلىمىم مەن تاجىريبەم كۇنى كەشە عانا باستىعىم بولعان جاسۇلان ءابدىحالىق نەمەسە بەرىك ۋاليدەن كەم دەپ كىم ايتا الادى؟ ءبىراق سوعان قاراماستان جاسۇلانمەن دە، بەرىكپەن دە جاقسى سىيلاسىپ، جۇمىس ىستەدىك. ولار ءقازىر باسقا قىزمەتكە اۋىسسا دا سالەمىمىز دە، بىر-بىرىمىزگە دەگەن نيەتىمىز دە، قارىم-قاتىناسىمىز دا ءتۇزۋ. ادامنىڭ مىقتىلىعى قىزمەتىمەن ەمەس، ەلىنە سىڭىرگەن ەڭبەگىمەن ولشەنسە كەرەك. ەگەر دارحاننىڭ كىم ەكەنىن بىلگىلەرىڭ كەلسە، ونىڭ مۇستافا شوقاي تۋرالى جازعان ەڭبەگىن وقىڭدار. تىم ۇساقتالا بەرمەڭدەر، جىگىتتەر. قىزمەت - قولدىڭ كىرى»، - دەيدى ا. مىرزابەك.
تۇركى بالاسىنىڭ رۋحاني تۇتاستىعى، باۋىرلاس حالىقتاردىڭ مادەني مۇراسىن دارىپتەۋ، تاريحىن زەردەلەۋ ىسىندە قىرۋار جۇمىس اتقارعان د. ءقىدىرالىنىڭ قولىنان گازەت باسقارۋ كەلمەيدى دەپ كىم ايتا الادى؟ مەملەكەتتىك جۇيەنىڭ قاي سالاسى بولسىن جاڭا ماماندارعا، جاڭا فورماتتا جۇمىس ىستەيتىن قىزمەتكەرلەرگە ءزارۋ. د. ءقىدىرالى باس گازەت باسشىلىعىنا كەلگەلى كوپ ۋاقىت بولماسا دا، ازامات ىسكەرلىگىن كورسەتىپ جاتىر. كەشەلى بەرى «ەگەمەنگە» كۇشتەپ جازعىزۋعا توسقاۋىل قويىلادى» دەگەن اقپارات تاراۋدا. سول جازدىرۋدى توقتاتپاسا دا، وسى كۇنگە دەيىن كۇشتەپ جازدىرۋدىڭ بولعانىن مويىنداۋ ءۇشىن دە جاڭا باسشى كەرەك ەمەس پە؟
ايتا بەرسە، اڭگىمە كوپ. سوندىقتان امانگەلدى مىرزانىڭ سوزىنە توقتاعان ءجون سياقتى. ەل ءىشى ونسىز دا الاساپىران بولىپ جاتقاندا، ەلىم دەگەن ازاماتتاردىڭ ەتەگىنە جارماسىپ، كەرى تارتپايىق. تىم ۇساقتالمايىق!
جومارت ابدوللا ۇلى
