جۋرناليستىك زەرتتەۋ كەزىندە رۋسلان كۇلەكبايەۆتىڭ الماتى وبلىسى ىلە اۋدانى ىنتىماق اۋىلىندا تۇراتىن قىزبەن وتاۋ قۇرعانى بەلگىلى بولدى، - دەپ حابارلايدى Qamshy.kz ازاتتىققا سىلتەمە جاساپ.

ىنتىماق اۋىلىنىڭ ءوزىن «عابيت» دەپ تانىستىرعان تۇرعىنى «رۋسلان - مەنىڭ كۇيەۋ بالام، قارىنداسىم اياۋلىم ۇمبەتقۇلوۆامەن بەس-التى جىل بۇرىن ۇيلەنگەن» دەدى.

- ءبىراق ول بىزبەن بىرگە تۇرمايدى. قارىنداسىم مەن كۇيەۋ بالانىڭ قايدا تۇراتىنىن بىلمەيمىز. بىزبەن بايلانىستارى جوق. كۇيەۋ بالا بايقوڭىردا تۋعان. ءقازىر ەكەۋىنىڭ بەس جاستاعى ۇلدارى بار. كۇيەۋ بالا اكەسى جوق، كوپ اعايىندى ەكەنىن ايتقان. باسىندا قارىنداسىم «ناماز وقيدى» دەگەندە جاقسى بالا عوي دەپ قۋانعانبىز. قارىنداسىما حيدجاپقا ۇقساس جاۋلىق تاققىزدى، - دەيدى عابيت.

ونىڭ ايتۋىنشا، رۋسلان كۇلەكبايەۆ پەن قارىنداسى ۇيلەنگەندە ەكى جاق كەلىسپەي قالىپ، كەيىن قۇدالار ارالاسپاي كەتكەن.

- جىگىت جاق [ەكەۋى ۇيلەنگەندە] توي جاسامادى. رۇقسات سۇراپ قۇدا تۇسكەن دە جوق. سوندىقتان بەتىمىزدى كورمەدىك دەپ ارالاسپاي كەتتىك، - دەيدى عابيت.

عابيت كۇيەۋ بالاسى رۋسلاندى بىرنەشە جىل بۇرىن ءبىر رەت كورگەنىن، ولاردىڭ تۇراتىن جەرلەرىن ءجيى اۋىستىراتىنىن ايتادى. ول رۋسلاننىڭ ءبىر رەت ءىستى بولعانىن تانىستارىنان ەستىگەن.

ال ىنتىماق اۋىلىنىڭ ۋچاسكەلىك پوليسياسى ەسكەندىر بەكتاس رۋسلان كۇلەكبايەۆتىڭ ول اۋىلدا تۇرماعانىن ايتادى.

- ىنتىماقتا تۇرادى دەگەن سوڭ تەكسەردىك. ونىڭ اۋىلدا تۇرماعانى، تەك قىز العانى انىقتالدى. قىزدىڭ اتا-اناسى كۇيەۋ بالالارىن تەك بىر-ەكى رەت كورگەندەرىن، ءقازىر ارالاسپايتىنىن ايتتى. ولار كۇيەۋ بالاسى مەن قىزىنىڭ ىنتىماقتا تۇرعانىنا قارسى بولىپ، تۇرعىزباعان، - دەيدى پوليسيا وكىلى.

ىنتىماق اۋىلى قارايتىن بورالداي اۋىلدىق وكرۋگى اكىمدىگىنىڭ سالىق قىزمەتىنىڭ جانار ەسىمدى مامانى ازاتتىق تىلشىسىنە «رۋسلان كۇلەكبايەۆتى اكىمدىكتەگى قۇجاتتاردان دا، سالىق بازاسىنان دا ىزدەپ، ەش دەرەك تاپپاعانىن» حابارلادى.

بايقوڭىر قالاسىنىڭ تالعات ەسىمدى تۇرعىنى كۇدىكتى رۋسلان كۇلەكبايەۆتى قالادا سىرتتاي بىر-ەكى رەت كورگەنىن ايتادى. ونى «تۇيىق بالا بولاتىن» دەيدى.

- بايقوڭىردا 7-ىقشاماۋداندا تۇردى. قالاداعى گاگارين اتىنداعى 8-قازاق مەكتەبىندە (قازىرگى 275-مەكتەپ – رەد.) وقىعان. اكە-شەشەسى اجىراسىپ كەتكەن. شەشەسى بايقوڭىردا تۇرادى. ەكىنشى رەت سوتتالىپ شىققان سوڭ الماتىعا كەتتى. بايقوڭىرعا اندا-ساندا كەلىپ تۇراتىن. مەكتەپتە تۇيىق، كوپ سويلەمەيتىن بالا بولدى. ءبىراق اراق ءىشىپ السا، توبەلەسكە كىرىپ كەتەتىن. تۇرمەگە توبەلەسىپ وتىرىپ شىققان، - دەدى تالعات.

تىلشىلەر رۋسلان كۇلەكبايەۆتىڭ تۋىستارىمەن بايقوڭىرداعى تانىستارى ارقىلى سويلەسپەك بولعان ەدى، ءبىراق ولار قانداي دا ءبىر اقپارات يا دەرەك بەرۋدەن ۇزىلدى-كەسىلدى باس تارتتى.

ىشكى ىستەر ءمينيسترى قالمۇحانبەت قاسىموۆ «رۋسلان كۇلەكبايەۆ ۇستالعانعا دەيىن الماتىدا «ايەل ءولتىردى» دەگەن كۇدىكپەن ىزدەۋدە جۇرگەن» دەپ حابارلادى. «ۇستالعان كۇلەكبايەۆ تۇرمەدە وتىرعان جىلدارى ءۇشىن پوليسەيلەرگە وشتەسكەن. سولاردان كەك الۋ ءۇشىن وق اتقان» دەيدى مينيستر.

الماتى اكىمى باۋىرجان بايبەك ءقازىر كۇدىكتىنىڭ قالاداعى تەرگەۋ يزولياتورىندا وتىرعانىن ايتتى.

شىلدەنىڭ 18ء-ى كۇنى كۇدىكتى الماتىداعى ابىلاي حان داڭعىلى بويىنداعى «قازاقكونسەرت» عيماراتى جانىندا ۇستالعان. قازاقستان پرەزيدەنتى نۇرسۇلتان نازاربايەۆ ول شابۋىلدى تەراكت دەپ باعالادى.