قازاقستاندىق تانىمال ساياساتكەر ەرلان قارين ەل ۇكىمەتىنىڭ وتستاۆكاعا كەتۋىنىڭ سەبەپتەرىن وزىنشە ساراپتاپ وتىر. Tengrinews.kz پورتالىنا بەرگەن سۇحباتىندا ول ءماسىموۆ باسقاراتىن جاڭا مينيسترلەر كابينەتىندە ورىن الۋى مۇمكىن وزگەرىستەر جايىندا دا ايتىپ بەردى.

ساياساتكەردىڭ ايتۋىنشا، احمەتوۆتىڭ وتستاۆكاعا كەتۋى «قازاقستان-2050» ستراتەگياسىن جۇزەگە اسىرۋعا تىڭ سەرپىن بەرۋمەن بايلانىستى. «ءبىز ءوز دامۋىمىزدىڭ جاڭا كەزەڭىنە، ياعني ستراتەگيانى جۇزەگە اسىرۋدىڭ العاشقى جىلىنا اياق باستىق. العاشقى باستامانىڭ قانداي بولاتىنى، قانداي باعىتقا قاراي بەت الاتىنىمىز وتە ماڭىزدى. مەنىڭ ويىمشا، احمەتوۆ باسقارعان ۇكىمەت وسىناۋ ستراتەگيانىڭ جۇزەگە اسۋىنا قاجەتتى دەڭگەيدە سەرپىن بەرە المادى. ال، ۇكىمەت ءدال ءبىزدىڭ جاعدايدا ۇيىمداسقان تۇردە جۇمىس ىستەي الۋى كەرەك» دەدى قارين. ول بۇگىندە الەمدىك ەكونوميكالىق نارىقتاعى كونيۋكتۋرانىڭ وزگەرگەندىگىن ايتىپ وتىر. سالدارىنان ناقتى ءقاۋىپ پايدا بولۋدا. «كەرى فاكتورلاردىڭ اسەرى بەلگىلى ءبىر دەڭگەيدە ءتيىپ وتىر. اسىرەسە، سوڭعى ديەۆالۆاسيا كەزىندە بايقالدى. رەسەي توڭىرەگىندەگى جاعداي، ءتۇرلى سىرتقى فاكتورلاردىڭ كەرى اسەرى ۇكىمەتتىڭ ەكونوميكالىق ساياساتىن جۇزەگە اسىرۋدا وزگەرىستەردى قاجەت ەتەدى» دەپ تۇيىندەدى ول ءسوزىن. ءقاريننىڭ پىكىرىنشە، سەرىك احمەتوۆ باسقارعان مينيسترلەر كابينەتىنىڭ ەڭ باستى كەمشىلىگى – پرەزيدەنت جولداۋىن جۇزەگە اسىرۋدا ناقتى باعدارلامالاردى جاساي الماعانىندا. «كەشەگى مينيسترلەر كابينەتىنىڭ ساياسي دا، ەكونوميكالىق تا، تەحنولوگيالىق تا تۇرعىدا مۇمكىندىكتەرى مول بولدى. ونىڭ ۇستىنە، ءدال وسى ۇكىمەت تۇسىندا ەلباسى حالىققا ەكى جولداۋ ارنادى. ولاردىڭ بىرىندە «ستراتەگيا-2050» ايتىلسا، ەكىنشىسىندە «ماڭگىلىك ەل» تاقىرىبى ءسوز بولدى. احمەتوۆتىڭ كومانداسىنا پرەزيدەنتتىڭ ەڭ ماڭىزدى تاپسىرمالارى جۇكتەلدى. ءبىراق، ولار ءوز جۇمىستارىن جۇيەلەي العان جوق. پرەزيدەنتتىڭ ستراتەگياسىنا جاۋاپ رەتىندە ۇكىمەت جاڭا كونسەپسيا، جوسپار ازىرلەۋى ءتيىس ەدى. ماسەلەن، ونىڭ الدىنداعى ءماسىموۆ باسقارعان مينيسترلەر كابينەتى انتيكريزيستىك باعدارلاما جاساپ شىعارىپ، ونى جۇزەگە اسىرا ءبىلدى. احمەتوۆتىڭ كومانداسى دا ءدال وسىلاي ءوز باعدارلاماسىن جاساپ، ونى ورىنداۋى ءتيىس بولاتىن. مەنىڭ ويىمشا، ءقازىر ءماسىموۆ جاڭا مينيسترلەر كابينەتىمەن ستراتەگيانى جۇزەگە اسىرۋعا ارنالعان جاڭا جوسپار ازىرلەيدى. ول سالا-سالانى جەكە قامتيتىن جوسپار بولۋى ابدەن مۇمكىن» دەدى ە.قارين ءوز سوزىندە. ساياساتكەر سونداي-اق، جاڭا مينيسترلەر كابينەتىندە ورىن الۋى مۇمكىن وزگەرىستەر جايىندا دا ايتىپ بەردى. «بۇل جايىندا ءدوپ باسىپ ايتۋ قيىن. ءتىپتى، مينيسترلەر جاپپاي اۋىسقانىمەن دە ەلدە ۇلكەن وزگەرىستەر بولمايدى. ماسەلەن، وزگە ەلدەردە مينيسترلەر كابينەتى اۋىسسا جۇرت ەڭ الدىمەن بيلىككە قاي باعىتتاعى تۇلعالاردىڭ كەلەتىنىنە ءمان بەرەدى. ءبىزدىڭ جاعدايدا دا ۇلكەن وزگەرىستىڭ بولمايتىنىنا سەنەمىن. جاڭا مينيسترلەر تاعايىندالسا دا ولار بيلىكتە بۇرىننان جۇرگەن تۇلعالار بولادى. دامۋداعى سەرپىندى كۇشەيتۋ ءۇشىن كەيبىر سالالاردا وزگەرىس بولۋى مۇمكىن. ماسەلەن، دەنساۋلىق ساقتاۋ جانە ءبىلىم بەرۋ سالالارى» دەدى ول. «پرەزيدەنت جاڭا پرەمەر-مينيستردى تاعايىنداعان كەزدە حالىقارالىق ينستيتۋتتارمەن، سىرتقى ينۆەستورلارمەن ءوزارا بايلانىستاعى جۇمىستاردى كۇشەيتە ءتۇسۋ كەرەكتىگىن اتاپ ءوتتى. بۇل رەتتە ءماسىموۆتىڭ وزگە كانديداتتارعا قاراعاندا مۇمكىندىگى مول. ول سىرتقى اۋديتورياعا – كاسىپكەرلەرگە، حالىقارالىق قارجى، ەكونوميكا قۇرىلىمدارىنىڭ وكىلدەرىنە وتە تانىمال تۇلعا. ءماسىموۆتىڭ وسىناۋ بايلانىستارى، تاجىريبەسى قازاقستانعا پايداسىن اكەلۋى ءتيىس» دەدى قارين. ساياساتكەردىڭ ايتۋىنشا، جاڭا ۇكىمەت ءتۇرلى قۇرىلىمداردى قايتا جاساقتاپ، مۇمكىندىكتەردى قايتا قاراپ شىعادى. «ءماسىموۆتىڭ بۇرىنعى تاجىريبەسىنەن بايقاعانىمىز، ول جۇمىستى وڭتايلاندىرىپ، جاڭعىرتۋعا بەيىم. ناقتى ءبىر دەڭگەيدە جۇمىس قارقىنىنىڭ دەڭگەيى وزگەرەدى. ول بۇرىن مينيسترلەر كابينەتىن باسقارعان كەزدە جۇمىسقا ءوزىن تولىقتاي ارنايتىن، ءتىپتى، ءتيىستى دەمالىسىن دا الماي ەڭبەك ەتتى. ول مينيسترلىكتەردىڭ بارلىق القالى وتىرىسىنا قاتىسىپ شىققان جالعىز پرەمەر. ەندى ۇكىمەت وسىنداي داعدىعا قايتا ورالادى دەپ بىلەمىن» دەپ ءسوزىن قورىتتى ەرلان قارين.