باقىت سارسەكبايەۆ دەگەن قازاقتىڭ التىن ۇلى بار ەدى عوي. ءقازىر سول سپورتشىمىز قۇنىن جوعالتىپ الدى. سپورتشىلاردىڭ سوڭىنان بۇرىن اڭىز ەرۋشى ەدى، ءقازىر ءسوز ەرەتىن بولدى. ارينە، بۇل جاقسىلىق ەمەس.  

باقىت سارسەكبايەۆ 27 جاسىندا پەكين وليمپياداسىنىڭ چەمپيونى بولدى. ارينە، سپورتتىق عۇمىرىنداعى ەڭ قوماقتى جۇلدەسى. جاسى دا 30-دى القىمداعان، باسىنا قونعان باقتى ۇركىتىپ المايتىن ءدۇر جىگىت دەپ ەسەپتەگەن ەدىك. وليمپيادا التىنىن الماس بۇرىن ەكى بالانىڭ اكەسى، ۇلكەن شاڭىراقتىڭ يەسى دەپ بىلدىك. سويتسەك، ءبارى دە بەكەر ەكەن. وليمپياداعا الماتى قالاسىنىڭ اتىنان قاتىسىپ، جۇلدەمەن ورالعان سوڭ الماتى قالاسىنىڭ اكىمى ءۇي سىيلادى. سونداي-اق، ۇلكەن شاھاردىڭ نامىسىن قورعاپ، قولامەن ورالعان اسەت مامبەتوۆكە دە ءۇي بەردى. ءبىراق، كەيىن باقىت سارسەكبايەۆ سول بەرىلگەن ءۇيدى داۋلاپ، قالا اكىمدىگىنە حات جازدى. الا قويدى بولەك قىرقىپ، باقىت سارسەكبايەۆتى الالاۋ بولماعان ەدى. ەگەر ءۇي وعان بەرىلمەسە، اسەت مامبەتوۆكە دە بەرىلمەۋشى ەدى. ەرتە مە كەش پە، باتىرلاردىڭ ۇيلەرىن زاڭداستىرىپ بەرەتىنى بەلگىلى ەدى. وليمپيادادان كەيىن «استانا ارلاندارى» كلۋبىندا ونەر كورسەتىپ، بوكستاعى ەكپىنىن السىرەتىپ الدى. كەيىننەن ق ر بوكس فەدەراسياسىندا ايتارلىقتاي قىزمەتتە ءجۇرىپ، ءبىر جىلعا جەتپەي شىعىپ تىندى. كەيىن جۋرناليستەرگە بەرگەن سۇحباتىندا «مەنى ۇمىتتىڭىزدار. مەن ءقازىر جۇمىسسىز ءجۇرمىن» دەپ تاعى كوز جاسىن توكتى. ق ر بوكس فەدەراسياسىنداعى قىزمەتىنەن ەشكىم قۋعان جوق ەدى، ءوزىنىڭ جىلى ورنى مەن لايىقتى قىزمەتىنەن مىنەزىنىڭ كەسىرىنەن كەتىپ تىندى. وزىندەي باقتيار ارتايەۆ اۋىل اكىمى قىزمەتىنەن باستاپ ءارتۇرلى مەملەكەتتىك جۇمىستاردى كەۋدە كوتەرمەي، قاراپايىمدىلىعىمەن باسقارىپ كەلە جاتىر. ال، باقىتتىڭ تالابى مەن مەنمەنشىل مىنەزى ءتۇبى ءوزىن ورعا جىعاتىنىن سەزگەن جوق. وليمپيادا التىنىن الىپ كەلگەن سوڭ 250 مىڭ دوللار سىياقى الدى، باسقا دا كيگىزىلگەن شاپاندار، سىي-قۇرمەتتەر شەكسىز ەدى (الماتى مەن استانادا 4 ەليتالىق پاتەرى بار، اۆتوكولىكتەرى تاعى بار). جەكە كاسىپكەرلەر مەن جومارت قازاقتاردىڭ دا قارجىسى مەن سىيعا تارتقان كولىكتەرىن استىنا باستى. ءبىراق، باتىردىڭ بويىندا شۇكىرشىلىكتىڭ ورنىنا تويىمسىزدىق ۇدەي ءتۇستى. ءوزىنىڭ ناعاشىسى ءارى جەكە باپكەرى كاريم ماحمۋدوۆپەن پاتەر ءۇشىن سوتتاستى. سوتتا جەڭىلىپ، دەپۋتات قايىربەك سۇلەيمەنوۆتەن كومەك سۇراعانمەن، ماسەلە شەشىلمەدى. سوتتان جەڭىلگەن سوڭ، بار اشۋىن ايەلىنەن الدى. ايەلىنىڭ جۇكتىلىگىنە قاراماستان، ءۇش بالاسىمەن ۇيىنەن قۋىپ شىقتى. وليمپيادا چەمپيونى وسىلايشا ازعىندىققا بارىپ، كوكەك اكە اتاندى. وسىدان بىرەر كۇن بۇرىن شىمكەنتتە تاعى دا بۇلىك شىعارعانى بەلگىلى بولدى. شىمكەنتتىك «حيلي پروپەرتيس» ءجشس-ىى «وقو بوكس فەدەراسياسى» ءقب-نىڭ پرەزيدەنتى اسقار زاۋىتبەك ۇلى تۇرىسبەكوۆكە بوكسشى باقىت سارسەكبايەۆتىڭ ۇستىنەن شاعىم ءتۇسىپتى. «حيلي پروپەرتيس» جشس-گى مەن «وقو بوكس فەدەراسياسى» ءقب-نىڭ اراسىنداعى كەلىسىمگە سايكەس سەرىكتەستىكتىڭ «Canvas Hotel Shymkent» قوناۇيىندە فەدەراسيانىڭ قوناقتارى، جاتتىقتىرۋشىلار، بوكسشىلار تۇراقتايدى ەكەن. باقىت سارسەكبايەۆ جۋىق ارادا سول قوناق ۇيدە بولعان ەكەن، ءجاي بولىپ قانا قويماي، ىشىمدىككە ماس بولىپ، قالتاسىنداعى اقشاسى قولدى بولىپ، ءقوناق-ۇيدى باسىنا كوتەرگەن. قوناق ءۇي قىزمەتشىلەرى وليمپيادا چەمپيونىنىڭ قوقان-لوقىسىنا توزبەگەندىكتەن پوليسيا شاقىرىپ، ءتىپتى قوناق ءۇي باسشىلىعى سپرتشىنىڭ ىس-ارەكەتىن شەكتەن شىعۋ دەپ باعالاپ، قىزمەتشىلەردى قورلاعانى ءۇشىن ەندى ونى ءوز قوناق ۇيلەرىنە كىرگىزبەيتىنىن مالىمدەپتى. بۇدان كەيىن وزگە سپورتشىلار قوناق ۇيدە توسىن مىنەز كورسەتەتىن بولسا ولار فەدەراسيامەن كەلىسىم شارتتى بۇزامىز دەپ وتىر. وسىلايشا ءبىر ادامنىڭ كەسىرىنەن باسقا سپورتشىلار جاپا شەگۋى مۇمكىن. باقىت سارسەكبايەۆ قازاقستانداعى جالعىز وليمپيادا چەمپيونى ەمەس. ءتىپتى، يليا ءيليننىڭ ءوزى ەكى دۇركىن وليمپيادا چەمپيونى بولا تۇرا مۇنداي باسسىزدىققا جول بەرگەن ەمەس. باقىت سارسەكبايەۆتىڭ وسى ءبىر ارەكەتتەرىن ەركەلىك دەگەننەن گورى شەكتەن شىعۋ، باسسىزدىق دەپ ۇعۋعا بولاتىنداي. وليمپيادا چەمپيونى بولۋ – الدىمەن ەلدىڭ اتىن شىعارۋ جانە كەيىنگىگە ۇلگى بولۋ. كەيىنگىگە ۇلگى بولۋ ءۇشىن جەڭىمپاز اتانۋ جەتكىلىكسىز، ومىرىڭمەن ۇلگى بولۋ جانە بار. بۇيتە بەرسە، سوڭىنان ەرگەن جاس بالالار «كۋميرىمەن قوشتاساتىنى» ايتپاسا دا تۇسىنىكتى. ارينە، بىزگە ەڭ الدىمەن باتىردىڭ ابىرويى قاجەت ەدى، ول بولسا سونشا ەڭبەكپەن باتىر اتانىپ، اپ-ساتتە پەندەگە اينالدى.

ەرنار مەيىربەك ۇلى، الماتى قالاسى

baq.kz