بۇگىن اتىراۋ قالاسىندا جەر كوميسسياسىنىڭ وتىرىسى وتۋدە. وندا كوميسسيانىڭ ەكونوميكالىق جۇمىس توبىنىڭ جەتەكشىسى وسىنداي ۇسىنىس ايتتى، - دەپ حابارلايدى Qamshy.kz.

اقىلبەك كۇرىشبايەۆ كوميسسيانىڭ جەردى جالعا بەرۋ نورماسىن قالدىرۋ جونىندەگى ورتاق كەلىسىمگە كەلگەنىن، ەندىگى ۋاقىتتا جەردى جالعا بەرۋدە اۋىل تۇرعىندارى مەن اۋىل شارۋاشىلىق ءبىلىمى بارلارعا باسىمدىق بەرىلۋى ءتيىس دەگەندى ايتادى.

جەردى مەملەكەتكە قايتارۋ، جالعا بەرۋ ەرەجەسىن زاڭمەن بەكىتۋگە بايلانىستى جۇمىس توبىنىڭ جەتەكشىسى ناقتى بەس ۇسىنىستى اتاپ ءوتتى.

«بىرىنشىدەن، ءقازىر جەردى جالعا بەرۋدى اكىمدەر وزدەرى شەشەدى. ءبىز ول پروسەسس جالعىز اكىم قۇزىرىندا قالماي، قۇرامىنا حالىق وكىلدەرى كىرەتىن كوميسسيا قۇزىرىنا بەرىلسىن دەيمىز. جەردى جالعا بەرۋدى، مەملەكەتكە قايتارۋدى وسى كوميسسيا شەشۋى كەرەك.

ەكىنشىدەن، جالعا بەرىلەتىن جەر ۋچاسكەلەرى تۋرالى، اقپارات جاسىرىن تۇردە وتەدى دەۋگە بولادى. مالىمەتتى اكىمگە جاقىن ادامدار عانا ەستيدى. سول ءۇشىن جالعا بەرۋ تۋرالى اقپارات اقپارات قۇرالدارىندا 30 كۇن بۇرىن جاريالانۋى كەرەك.

ۇشىنشىدەن، بۇگىندە كەلىسىم-شارت جوباسىن اكىمدەر وزدەرى دايىندايدى. بۇل دۇرىس ەمەس. ءبىز جەردى جالعا بەرۋدىڭ ءبىرىڭعاي تيپتىك كەلىسىم-شارتىن جاساۋدى ۇسىنامىز.

تورتىنشىدەن، جەر ساپاسىن باقىلاۋ، توپاىراق مونيتورينگ ماسەلەسىنە نازار اۋدارتامىز. دامىعان ەلدەردە جەر ساياساتىنىڭ تەمىر قازىعى – وسى جەر مونيتورينگى. بىزدە مۇندا كوپتەگەن كەمشىلىكتەر بار. شارۋا قوجالىقتارىنىڭ جارتىسىنا جۋىعىندا ءالى كۇنگە جەر پاسپورتتارى جوق. جەر كاداسترىن انىقتاۋ ادىستەمەسى 2003 جىلى بەكىتىلگەن. دامىعان ەلدەر تاجىريبەسىندە جەر باعاسى ءاربىر ءۇش جىل سايىن وزگەرىپ تۇرادى. بىزدە دە كوپتەگەن سۇراقتار تۋىنداۋدا. قۇنارسىز جەردىڭ سالىعى، قۇنارلىق جەرلەردىڭ سالىعىنان، جايىلىم جەردىڭ سالىعى ەگىستىك جەردىڭ سالىعىنان جوعارى بولىپ وتىر. وسىنداي ماسەلەلەردى رەتتەۋ ءۇشىن جەرگە ورنالاستىرۋ مەكەمەسىن اۋىلشارۋاشىلىعى مينيسترلىگىنىڭ قۇرامىنا بەرۋ كەرەك. اقش، كانادادا جەرگە باقىلاۋدى اۋىلشارۋاشىلىق ماماندارى جۇزەگە اسىرادى.

بەسىنشىدەن، جەردى زاڭسىز ءبولۋ فاكتىلەرى ءجيى كەزدەسەدى. بۇل حالىق نارازىلىعىن تۋدىرادى. وكىنىشكە وراي، بۇعان لاۋازىمدى تۇلعالار دا جول بەرۋدە. مۇنىڭ ءبارى زاڭنىڭ السىزدىگىنەن تۋىنداپ وتىر. قازىرگى زاڭناماعا سايكەس، جەر قاتىناستارىنا قاتىستى زاڭ بۇزعان شەنەۋنىك 63 مىڭ تەڭگە ايىپ تولەيدى. ءبىز اكىمشىلىك كودەكستى كۇشەيتۋ كەرەك دەپ سانايمىز. اقپاراتتار اشىق بولۋى كەرەك. كىمنىڭ قانشا جەرى بار ەكەنىنەن اقپارات بەرەتىن سايت اشۋ كەرەك.

بۇل جۇمىستار ەكونوميكالىق جۇمىس توبىنىڭ ەكى اپتادا كەلگەن قورىتىندىلارى»، - دەيدى ا. كۇرىشبايەۆ.

كوميسسيا جۇمىسىنا پرەمەر-مينيستردىڭ ورىنباسارى - اۋىل شارۋاشىلىق ءمينيسترى اسقار مىرزاحمەتوۆ ءتوراعالىق ەتىپ وتىر. اتىراۋعا كوميسسيانىڭ 25 مۇشەسى بارعان.