نوسەرلەپ قۇيعان جاڭبىر استانانىڭ قاۋىرت تىرشىلىگىن تاعى تۇرالاتىپ تاستادى. كەشەلى بەرى تولاستاماعان جاۋىن باس قالانى ۆەنەسياعا اينالدىرىپ جىبەرگەن. جۇزدەگەن كولىك بەلۋاردان سۋ كەشىپ، ءتىپتى كوبى سۋ ورتاسىندا بۇزىلىپ تا جاتىر، - دەپ حابارلايدى Qamshy.kz كتك ارناسىنا سىلتەمە جاساپ.

سوندىقتان پوليسەيلەر تۇتاس كوشەلەردەگى قوزعالىستى توقتاتۋعا ءماجبۇر. ال كوممۋنالدىق قىزمەت قىزىل سۋدى سورعىزىپ ۇلگەرە الار ەمەس.

ء-قازىر استاناداعى يمانوۆ  كوشەسىندە «ۋجاس» فيلم تۇسىرەمىز...

استانا تۋرالى قورقىنىشتى فيلم تۇسىرگەن جۇرگىزۋشىلەر بۇگىن تىزەدەن سۋ كەشكەن تەلەوپەراتورلارمەن جاعالاسىپ ءجۇر. سەبەبى ەسىلدىڭ سول جاعالاۋىندا ونداعان كولىك قايىق سياقتى ءجۇزىپ كەتتى. سۋ ماشينانىڭ ىشىنە دەيىن كىرگەن.

-مىنە ، سالونعا دەيىن كولكىگەن سۋ...

كولىكتەرىن يتەرىپ شىعارا الماعان جۇرگىزۋشىلەردىڭ ابدەن جۇيكەسى جۇقارعان. بۇزىلىپ توپان سۋدىڭ ورتاسىندا قالعان مۇنداي تەمىر تۇلپارلاردى قالانىڭ كەز-كەلگەن اۋدانىنان كەزدەستىرەسىڭ. جاعدايدىڭ ۋشىققانى سونشالىق، پوليسەيلەر بىرنەشە كوشەدەگى قوزعالىستى توقتاتۋعا ءماجبۇر بولدى.

-«جاستار» اۋدانىمەن ءجۇزىپ كەلەمىز...

جاڭبىر سۋى كوشەلەردەگى قوزعالىستى عانا ەمەس، جەر ۇيلەردىڭ تۇرعىندارىن دا ەسىنەن تاندىردى. اينالا كولشىككە اينالىپ، سۋ اۋلالارعا دەيىن كىرگەن. بۇل اۋدانعا بيۋدجەتتىڭ ميللونداعان تەڭگەسىنە تاقتايداي تەگىس جول توسەلگەنىمەن، شەنەۋنىكتەر ارىق سالۋدى ۇمىتىپ كەتىپتى. ەندى ونىڭ زاردابىن جۇزدەگەن وتباسى تارتىپ وتىر.

دينارا ىرگەبايەۆا، استانا قالاسىنىڭ تۇرعىنى:

-وسى جولدى جىلىنا 3-4 رەت جوندەيدى. بۇل بىرەۋلەرگە ءتيىمدى-اۋ دەيمىن اقشا قىمقىرۋعا...

جەكە سەكتور عانا ەمەس، مەملەكەتتىك باعدارلامامەن سالىنعان ۇيلەردىڭ ءىشى دە استان-ەستەن. توبەدەن سۋ اعىپ، جاڭادان جوندەۋ جاسالعان پاتەرلەردىڭ ءبارىن بۇلدىرگەن.

-سىلاقتارى ءتۇسىپ، كىرپىشتەرى ىرسيىپ تۇر.

وسىلايشا نوسەردەن كوتەرىلگەن قىزىل سۋ، اعاتىن ارىق تاپپاي استانانى ناعىز ۆەنەسياعا اينالدىرىپ جىبەردى. كوممۋنالدىق قىزمەت 24 ساعات جۇمىس ىستەگەنىمەن اعىن سۋدى سورىپ ۇلگەرە الماي جاتىر. ال ەلوردا اكىمدىگى جاڭبىرعا بارىنشا توتەپ بەرىپ جاتقاندارىن ايتادى. ءبىراق، كارىز جۇيەسىنىڭ سۋ وتكىزۋ دەڭگەيىنىڭ تومەندەگى قيىندىق تۋعىزادى ەكەن.

قوسمان ايتمۇحانبەتوۆ، استانا قالاسى اكىمىنىڭ ورىنباسارى:

-مىنا تازارتۋ قۇرىلعىسى سول جاعالاۋعا تولىق قىزمەت ەتە الادى. ءقازىر جىلجىمالى ۇلكەن سۋ سورعىشتاردىڭ كومەگىمەن كوشەدەگى سۋدى تازارتىپ جاتىرمىز.  جىل سوڭىنا دەيىن تاعى ءبىر تازارتۋ قوندىرعىسىن ىسكە قوسۋ جوسپاردا بار.

ءبىر جاۋىپ، ءبىر توقتاپ تۇرعان نوسەر الداعى ەكى كۇندە ءالى دە ابىرگەرگە سالماق. ويتكەنى، سەنبى مەن جەكسەنبى دە جاڭبىرلى بولادى دەيدى سينوپتيكتەر.  

جاڭبىر جاۋسا سىننىڭ استىندا قالاتىن استانا اكىمدىگى ءقازىر ارىق قازۋعا دەرەۋ كىرىستى. سۋاعالاردىڭ قۇرىلىسى ازىرشە، ەسىلدىڭ سول جاعالاۋىنان باستالىپ جاتىر. بيۋدجەتتىڭ 10 ميلليارد تەڭگەسى جۇمسالاتىن كارىز جۇيەسى الدىمەن «ەكسپو» قالاشىعىنا دەيىن تارتىلادى. كورمەگە كەلەتىن شەتەلدىك قوناقتاردى قايىقپەن ءجۇزىپ كەتپەسىن دەسە، اكىم اسەت يسەكەشوۆتىڭ كومانداسىنا ءالى ءبىراز تەر توگۋگە تۋرا كەلەدى.