استاناداعى مەيراموۆتار سياقتى الماتىلىق تاعى ءبىر وتباسى سوت ورىنداۋشىلار كەلگەندە گاز بالونىن جارماق بولدى، - دەپ حابارلايدى Qamshy.kz 31 ارناعا سىلتەمە جاساپ.

الماتىنىڭ بارلىق كۇشتىك قۇرىلىمدارى اياعىنان تىك تۇرىپ، وزىمەن بىرگە ءۇيدى دە  جارىپ جىبەرمەك بولعان ازاماتتى ماسەلەنى دۇيسەنبىگە دەيىن قايتا قارايمىز دەپ رايىنان ازەر قايتارىپ الدى. وقيعا ورنىنا جەدەل جەتكەن ءتۇسىرىلىم توبىنا،  تۇرعىندار ۇيىمىزدەن ايىرىلىپ قالۋدىڭ الدىندا تۇرمىز دەپ مۇڭىن شاقتى.

جەكە سوت ورىنداۋشىلار ءۇيدى بوساتۋعا وسىمەن ەكىنشى رەت كەلىپتى. تۇرعىندار باسپانانى بەرمەۋگە ارەكەت جاساعاننان كەيىن پروكۋرورلار ءىستى قايتا تەكسەرۋ ءۇشىن ءۇش كۇن مۇرسات بەردى. ال ءۇيدىڭ تۇرعىندارى وسىدان بىرنەشە جىل بۇرىن ۇستەمە پايىزبەن اقشا الۋ ماقساتىندا ءۇيدى كەپىلگە قويماق بولعان. الايدا كەلىسكەن ادامدارىمىز ءوزىمىزدى تاقىرعا وتىرعىزدى دەيدى. ايتۋلارىنشا، ءۇيدىڭ قۇجاتتارى دا سول كەزدە باسقا بىرەۋلەردىڭ اتىنا اۋىسىپ، ودان كەيىن بىرنەشە رەت سىرتتاي ساتىلىپ تا كەتكەن. ۇيدەن ايىرىلساق، شيەتتەي بالالارىمىزبەن دالادا قالامىز با دەپ شاراسى تاۋسىلعان ولار قالالىق،  اپپەلياسيالىق سوتقا ارىزدانىپتى.

- ءبىز سىزدەرگە كومەكتەسەمىز نەسيە شىعارۋعا دەپ ىستەگەندەرى وسى. Cوتقا ولاردىڭ وزدەرى دە كەلگەن جوق. ول كەزدە ءوزىم ناۋقاستانىپ اۋرۋحانادان شىققانمىن. مىنا داڭعاراداي ءۇيدى سۋ تەگىنگە بەرە سالۋ سۇمدىق قوي. بالا-شاعا، نەمەرەلەرىمىز بار، - دەيدى ءۇيدىڭ تۇرعىنى گۇلباھرام قادىروۆا.