قازاقستان رەسپۋبليكاسى پارلامەنتى ءماجىلىسىنىڭ دەپۋتاتتارى ر.مۇقاشيەۆ، س.بىچكوۆا، ك.بۇرحانوۆ پەن ا.سمايىلدار بۇۇ-دىڭ ءدىن مەن سەنىم بوستاندىعى بويىنشا ارنايى بايانداماشىسى حاينەر بيلەفەلدپەن كەزدەستى.
كەزدەسۋ بارىسىندا تاراپتار «ءدىن ىستەرى مەن ءدىني بىرلەستىكتەر تۋرالى» ق ر زاڭىنىڭ ءدىني سالادا تاجىريبە جۇزىندە ىسكە اسىرىلۋ جاعدايى بويىنشا پىكىر الماستى.
راحمەت مۇقاشيەۆ ءوز سوزىندە قازاقستاننىڭ زاڭنامالىق بازاسى ازاماتتاردىڭ قۇقىعى مەن ەركىندىگى ءدىني سالادا قۇرمەتتەلىپ، ءدىني سەنىمدەرى ەلىمىزدىڭ اتا زاڭىمەن ناقتىلانعانىن اتاپ ءوتتى. «ءدىن ىستەرى مەن ءدىني بىرلەستىكتەر تۋرالى» ق ر زاڭىن جاساۋ ۇستىندە حالىقارالىق تاجىريبەلەر ەسكەرىلىپ، ەۋروپا كەڭەسىنىڭ ءدىني قىزمەتتەردى سونىڭ ىشىندە ءدىني سەكتالارمەن قاتىناستارىن قۇقىقتىق رەتتەۋ ماسەلەسى ەسكەرىلدى.
ءوز كەزەگىندە ك.بۇرحانوۆ ەلىمىزدەگى ءدىن ىستەرىن قۇقىقتىق رەتتەۋ تاعاتتىلىق پەن ءوزارا قۇرمەت قاعيداسىنا نەگىزدەلگەنىن ايتتى.
كەزدەسۋ قورىتىندىسى بويىنشا اڭگىمەلەسۋشىلەر قازاقستاندىق زاڭناما ءدىني سالادا حالىقارالىق ستاندارتتار مەن نورمالارعا سايكەس ەكەندىگىنە كوز جەتكىزدى. سونىمەن قاتار ەلىمىزدەگى ءدىني قىزمەتتى قۇقىقتىق رەتتەۋدىڭ الداعى جولدارىن جەتىلدىرۋ جايىندا پىكىر الماستى.
پىكىر قالدىرۋ