بۇگىن الماتىدا سافار شاكەيەۆتى اقتىق ساپارعا شىعارىپ سالۋ راسىمىندە مارقۇمنىڭ اكەسى ۇلىن ىزدەۋگە اتسالىسقان ازاماتتارعا العىس ءبىلدىردى، - دەپ حابارلايدى Qamshy.kz tengrinews.kz – كە سىلتەمە جاساپ.

مارقۇمنىڭ جانازاسى الماتىداعى «قازاقكونسەرت» شىعارماشىلىق بىرلەستىگىنىڭ عيماراتىندا ءوتتى. شاراعا جينالعاندار مارقۇمنىڭ وتباسىنا كوڭىل ايتتى.

«ونىڭ ومىرلىك جوسپارلارى كوپ بولاتىن. ول امەريكانىڭ كينو ينستيتۋتىنا تۇسۋگە وقتالىپ ءجۇردى. ءبىرىنشى تۋردان وتكەنىمەن، ءالى 3 جىل تاجىريبە كەرەك بولدى»، - دەگەن ەركەش شاكەيەۆ جينالعان جۇرتقا العىس ءبىلدىرىپ، دوستىق، سۇيىسپەنشىلىك ۇعىمدارىن جوعارى باعالاۋ كەرەكتىگىن جەتكىزدى.

«سافار كەرەك ەمەس جەرگە، كەرەك ەمەس ۋاقىتتا بارىپ قالدى (...) سىزدەردىڭ بالالارىڭىز دوستى دۇرىس تاڭداسىن، اۋراسى ناشار ادامدارمەن دوس بولماسىن. ولار بىردەن بىلىنەدى (...). مەن ءبىزدىڭ جاعدايىمىزدان، باستان كەشكەن قيىندىقتارىمىزدان ساباق الىپ، سىزدەردىڭ بىر-بىرلەرىڭىزدى جاقسى كورگەندەرىڭىزدى قالايمىن. بۇل ومىردە ماحابباتتان باسقا ەشتەڭە جوق، قالعانىنىڭ ءبارى يلليۋزيا، جالعان ۇعىمدار. مەنىڭ اكەلىك، اعالىق كەڭەسىم: ءبىر-بىرىڭىزدى جاقسى كورىڭىزدەر، قۇشاقتاڭىزدار، سۇيىڭىزدەر، دوستارىڭىزدى باعالاڭىزدار»، - دەدى ول.