اقتوبەلىك كاسىپكەر حايروللا سماعۇلوۆ  9 جاستاعى قىزىمەن 40 جاستاعى ايەلىن ولتىرۋگە تاپسىرىس بەرگەن،  - دەپ حابارلايدى Qamshy.kz وبلىستىق سوتتىڭ باسپا ءسوز قىزمەتىنە سىلتەمە جاساپ.

بەلگىلى بولعانىنداي، اقتوبە قالالىق سوتى كاسىپكەردىڭ ايەلىمەن اجىراسۋىنا بايلانىستى كامىلەت جاسىنا تولماعان قىزىنا اليمەنت تولەۋدى مىندەتتەگەن. ال اليمەنتتەن جالتارعان كاسىپكەر ا.تولەگەنوۆ ەسىمدى تانىسىنا كىسى ءولتىرۋدى تاپسىرعان.

باتىس قازاقستان وبلىستىق مامانداندىرىلعان اۋدانارالىق سوتى ح.سماعۇلوۆتى ق ر قىلمىستىق كودەكستىڭ  28 باپتىڭ 3 ءبولىمى، 24 باپتىڭ 3 ءبولىمى، 99 باپتىڭ 2 ءبولىمى جانە 1، 7، 8، 14 تارماقشالارى بويىنشا (كىسى ءولتىرۋدى ۇيىمداستىرۋ، ەكى تۇلعا اراسىندا جاسالعان كەلىسىممەن كىسى ولتىرۋگە وقتالۋ، ۇيىمداسقان قىلمىستىق توپ جانە كامىلەت جاسقا تولماعان تۇلعا قاتىستى)  كىنالى دەپ تانىلىپ، 15 جىلعا باس بوستاندىعىنان ايىرىلىپ، قاتاڭ  رەجيمدەگى كولونيادا جازاسىن وتەۋگە سوت ۇكىمى شىقتى. 

ال ا.تولەگەنوۆ 28 باپتىڭ 5 ءبولىمى، 24 باپتىڭ 3 ءبولىمى، 99 باپتىڭ 2 ءبولىمى جانە 1، 7، 8، 14 تارماقشالارى بويىنشا (قاساقانا كىسى ولتىرۋگە وقتالۋ) كىنالى دەپ تانىلىپ، 15 جىلعا باس بوستاندىعىنان ايىرىلدى. تاپسىرىس ورىنداۋشىعا  جالپى رەجيمدەگى كولونيادا جازاسىن وتەۋگە سوت ۇكىمى شىقتى. ق ر قىلمىستىق كودەكستىڭ  14 بابى 2 ءبولىمى بويىنشا ا.تولەگەنوۆتىڭ ىس-ارەكەتى قايتالانۋ ءقاۋىپى بار دەپ تانىلعان.

بقو اپەللياسيالىق سوتى جابىرلەنۋشى مەن ادۆوكاتتاردىڭ شاعىمى قاناعاتتاندىرۋسىز دەپ تانىلىپ، ءبىرىنشى سوتتىڭ شەشىمى وزگەرىسسىز قالدىرىلدى.

سوت شەشىمى زاڭدى كۇشىنە ەندى.