قازاقستان ۇكىمەتى ريو-دە-جانەيرودا وتەتىن وليمپيادا ويىندارىنىڭ چەمپيوندارى مەن جۇلدەگەرلەرىنە 5 مىڭنان 250 مىڭ اقش دوللارىنا دەيىن قاراجات تولەمەك، - دەپ حابارلايدى Qamshy.kz.
بۇل تۋرالى مادەنيەت جانە سپورت مينيسترلىگى سپورت ىستەرى جانە دەنە تاربيەسى كوميتەتىنىڭ باسپا ءسوز حاتشىسى باقىتبەك حاميت مالىمدەدى.
«قازاقستان رەسپۋبليكاسىنىڭ جازعى وليمپيادا ويىندارىنا قاتىساتىن قۇراما كوماندالارى باپكەرلەرى مەن مۇشەلەرى ۇكىمەت قاۋلىسىنا ساي بىرىنشىدەن التىنشى ورىنعا دەيىن كوتەرمەلەنەدى. ءبىرىنشى ورىنعا – 250 مىڭ دوللار، ەكىنشى ورىنعا – 150 مىڭ دوللار، ءۇشىنشى ورىنعا – 75 مىڭ دوللار، ءتورتىنشى ورىنعا – 30 مىڭ دوللار، بەسىنشى ورىنعا – 10 مىڭ دوللار، التىنشى ورىنعا – 5 مىڭ دوللار سىياقى بەرىلەدى»، - دەيدى ول.
باقىتبەك حاميتتىڭ ايتۋىنشا، سپورتشىلاردى دايىنداعان باپكەرلەر دە سونشا سومادا سىياقى الادى.
ەستەرىڭىزگە سالساق، ريو-دە-جانەيرودا 5-21 تامىز ارالىعىندا جازعى وليمپيادا ويىندارى وتەدى. وعان قازاقستاننان 25 سپورت ءتۇرى بويىنشا 105 سپورتشى قاتىسادى.
