الماتىلىق دارىگەرلەر مەن پوليسەيلەر جاپپاي اعىلشىن ءتىلىن ۇيرەنىپ جاتىر. 2017 جىلعى قىسقى ۋنيۆەرسيادا ويىندارى كەزىندە قىزمەت ەتەتىن ولار حالىقارالىق تىلگە دە جەتىك بولۋى كەرەك، - دەپ حابارلايدى Qamshy.kz كتك ارناسىنا سىلتەمە جاساپ.

ادەتتە اق حالاتپەن جۇرەتىن دارىگەرلەر قايتادان پارتاعا وتىرعان. قازىرگى ۋاقىتتا 130 مەديسينا قىزمەتكەرى قالاداعى 4 بىردەي جوعارعى وقۋ ورنىندا اعىلشىنشا ۇيرەنىپ جاتىر. 1ء-شى جەلتوقسانعا دەيىن 400 مامان ءتىلىن جەتىلدىرىپ شىعۋى ءتيىس. وزگە ءتىلدى جىلدام ۇيرەنۋ ءۇشىن ولار ارنايى باعدارلامامەن وقىتىلۋدا. ياعني، وقۋ بارىسى دەنە مۇشەلەرى، اۋرۋ تۇرلەرى، ەمدەۋ جولدارى سىندى مەديسينانىڭ نەگىزگى تەرميندەرى اياسىندا ءوتىپ جاتىر. اق حالاتتىلاردان بولەك، پوليسيا مەن توتەنشە جاعداي ماماندارى دا شەت ءتىلىن جەتىك مەڭگەرۋگە كىرىسكەن.

نۇرجان ءابىلقايىر، 2017 جىلعى قىسقى ۋنيۆەرسياداعا دايىندىق ديرەكسياسى مەملەكەتتىك قورى ديرەكتورىنىڭ ورىنباسارى:

-2011 جىلعى قىسقى ازيا ويىندارىنىڭ تاجىريبەسىن نەگىزگە الدىق. ءتىل ۇيرەنۋشىلەر اراسىندا جاڭادان باستاپ جاتقاندار دا بار. ءبىراق سوعان قاراماستان،بەكىتىلگەن مەرزىم ىشىندە قاجەتتى مامانداردى اعىلشىن تىلىندە دايارلاپ ۇلگەرەمىز دەپ وتىرمىز.