«يسلام مەملەكەتى» لاڭكەستىك ۇيىمىنىڭ قاتارىنا ەنگەن قازاقستاندىق 26 جاستاعى ايەل كومەك سۇراپ، داعىستانداعى كەلىسىم ورتالىعىنا وتىنىشپەن شىققان، - دەپ حابارلايدى Qamshy.kz SkifNews.kz - كە سىلتەمە جاساپ.

ول رەسەيلىك ارنايى جاساق وكىلدەرىنە حابار بەرىپ، ءوزىن قۇلدىقتان بوساتۋىن سۇراپتى. بۇل تۋرالى Life.ru پورتالى حابارلاپ وتىر.

لاڭكەستەردىڭ تۇتقىنىنا تۇسكەن جاس ايەلدىڭ اناسى روزا سابىروۆانىڭ ايتۋىنشا، قازاقستان بيلىگى مەن ەلشىلىك وتىنىشكە قۇلاق اسپاي، قولدارىن ءبىر سىلتەگەن كورىنەدى.

«ولار قىزدىڭ سۋرەتىن بارلىق جەرگە تاراتتى. شەكاراعا كەلە قالسا ونى دەرەۋ قازاقستانعا دەپورتاسيالايمىز دەيدى. ءبىراق، ول قالاي شەكاراعا دەيىن كەلەدى، ەگەر ونى تۇتقىندا ۇستاپ وتىرسا؟ ەگەر ول ءوز ەركىمەن شىعىپ كەتە الاتىن بولسا اڭگىمە باسقا. ونىڭ ەمىزۋلى ەكى بالاسى بار قولىندا»، - دەيدى اناسى روزا سابىروۆا.

ايەلدىڭ ايتۋىنشا، قىزى 2013 جىلى قۇربىلارىمەن تۇركياعا كەتكەن ەكەن. ارادا ءبىراز ۋاقىت وتكەن سوڭ ول تەلەفونمەن حابارلاسىپ، كۇيەۋگە شىققانىن جانە سيريادا تۇرىپ جاتقانىن ايتقان. سول ەلدە ءجۇرىپ ەكى بالا تۋىپ الىپتى. سابيلەرى دۇنيەگە كەلگەننەن بەرى قىزىمنان مازا كەتتى دەيدى ايەل. اناسىمەن بولعان اڭگىمە بارىسىندا ول «ءوزىمدى شاھيد، بالالارىمدى قۇلدىققا سالۋى مۇمكىن» دەپ دابىل قاققان ەكەن.

«ول بالاسىن بوسانعاننان باستاپ كومەك سۇراي باستادى. ونىڭ SMS-حابارلامالارىن تۇگەل ايتىپ بەرە المايمىن، جان تۇرشىگەدى. "ماما، كەشىرشى. اكە، كەشىرشى. مەنى مىنا جەردەن الىپ كەتىڭىزدەرشى، اياقتارىڭىزدى ءسۇيىپ وتەيىن. مەن بالالارىم ءۇشىن قاتتى الاڭدايمىن. بىزگە ءقاۋىپ ءتونىپ تۇر. مۇندا بالالارى بار ءورىستىلدى ايەلدەر كوپ، بارلىعى كەتكىسى كەلەدى، ءبىراق، ءبىزدى جىبەرمەيدى" دەپ جازادى ءبىر حابارلاماسىندا. مۇنداي SMS-حابارلامالار ءجيى كەلىپ تۇردى. ءومىرىمىز توزاققا اينالعانداي. قولىمىزدان تۇك كەلمەيدى. بوسانعاننان كەيىن ءبىراز قان جوعالتقان. ونىڭ ۇستىنە، ەكى بالاسى دا ەمىزۋلى. قالاي قاشىپ كەتەرىن بىلمەي وتىر»، - دەيدى روزا.

قازاقستان بيلىگىنەن قولداۋ تاپپاعان روزا سابىروۆا داعىستانداعى كەلىسىم ورتالىعىنان كومەك سۇراپتى. اتالعان ۇيىم ءدال وسىنداي پروبلەماعا تاپ بولعان كوپتەگەن وتباسىعا كومەكتەسكەن. ونداعىلار رەسەيلىك كۇشتىك قۇرىلىمدارعا حابار بەرگەنىن ايتىپ وتىر.

ال، ق ر سىرتقى ىستەر مينيسترلىگىنە ارنايى سۇراقپەن شىققان Today.kz پورتالىنا ۆەدومستۆو وكىلدەرى روزا سابىروۆانىڭ، نە ونىڭ قىزىنىڭ وتىنىشپەن كەلمەگەنىن ايتىپتى.