كوپتىڭ كوزىنشە ءوز ايەلىن تىرىدەي ورتەپ جىبەرگەن قانات ءسادۋوۆ ەندى تۇرمەدە وتىرىپ جەتىم قالعان ۇل-قىزىنا ميلليونداعان وتەماقى تولەۋى ءتيىس. استانا سوتى وسىنداي شەشىم شىعاردى، - دەپ حابارلايدى Qamshy.kz كتك ارناسىنا سىلتەمە جاساپ.
مارقۇم سۆەتلانا ءسادۋوۆانىڭ ۇلكەن ۇلى مەن ناعاشىلارى ازعىننان ماتەريالدىق وتەماقى تالاپ ەتىپ، ارىز جازعان بولاتىن. سوت ولاردىڭ شاعىمىن قولداپ، قانات سادۋوۆكە 11 ميلليون تەڭگە وتەماقى تولەۋدى مىندەتتەدى. بۇل قارجى استانالىق ۇستازدىڭ ارتىندا قالعان ءتورت بالاسى مەن تۋعاندارىنا مورالدىق شىعىن رەتىندە ۇلەستىرىلەدى. ەستەرىڭىزگە سالساق، قانات ءسادۋوۆ بىلتىر مامىردا ەلورداداعى مەكتەپتىڭ جانىندا ءمۇعالىم ايەلىنىڭ ۇستىنە بەنزين قۇيىپ جاعىپ جىبەرگەن ەدى. ورتكە ورانعان كەلىنشەك اۋرۋحانادا جاتىپ كوز جۇمدى. كەيىن قاسكويدىڭ جيىرما جىل بويى جارىن اياۋسىز ۇرىپ-سوعىپ كەلگەنى بەلگىلى بولدى. 18 جىلعا باس بوستاندىعىنان ايىرىلعان قانات ءسادۋوۆ ءقازىر قاتاڭ تارتىپتەگى كولونيادا جازاسىن وتەۋدە.
