ءبىزدىڭ كاپيتاليستىك سانامىزدىڭ دەڭگەيى «ودنارازوۆىي ستاكان» سياقتى، قىسقا مەرزىمدى نەمەسە ءبىر رەت قانا ىستەلەتىن جوبالارعا قۇمارمىز. ياعني كوپ جاعدايدا «گالوچكا» ءۇشىن جاسايمىز. جاستار ساياساتى دەسە كوز الدىمىزعا اكسيالارمەن فلەشموبتار ەلەستەيدى.
جاستاردىڭ سەركەلەرى ءسوزدىڭ مارجاندارىن تەرىپ تۇرىپ ايتقاندا «ەە بولاشاعىمىز جارقىن ەكەن عوي» دەپ قالاسىڭ، ءبىراق ءىستىڭ مارجاندارىن، ونىمدىلىگىن كورسەتە الماي جاتادى. سىن تۇزەلمەي، ءمىن تۇزەلمەيدى دەمەكشى، ەندى وسى جوعارىدا اتالعان ستەرەوتيپتەردى قالاي وزگەرتەمىز؟، جاستاردىڭ باسىن بىرىكتىرەتىن قانداي ينتەرەس تابامىز؟ قانداي ىسكەر سەركەلەردى جاستار ساياساتى مەن جاستار تاربيەسىن دامىتۋعا تارتامىز؟ سۇراقتا كوپ، جۇيەلى تۇردە ىستەلەتىن شارۋا دا جەتەرلىك. بىزگە جاھاندانۋ كەزەڭىندە بەلسەندى قوعامنىڭ ازاماتتارىن ساندىق تا ساپالىق تا جاعىنان كوبەيتۋ كەرەك. بىزدە قوعامدا قوزعالتاتىن قۇرالدارمەن تەتىكتەر بار، ال سولاردى پايدالانا بىلەتىن كرەاتيۆتى كادرلارمەن رەسۋرستار قاجەت سەكىلدى. بيىلعى جاڭا وقۋ جىلىنا بايلانىستى جاڭاشا وزگەرىستەر ەنگىزۋدى كورىپ تۇرمىن. ءبىزدىڭ جاستارعا تەك باعىت پەن ۇلگى بەرۋ كەرەك.
- ول ءۇشىن، جوو-مەن كوللەدجدەردىڭ جاستار ءىسى جونىندەگى كوميتەتتەرىنە شىن مانىسىندە ىسكەر ليدەرلەر كەلۋى قاجەت. ولار كرەاتيۆتى، وزىندىك جاڭا جوبالارىن ەنگىزە بىلەتىن، ينتەگراسيا جاساۋدان قورىقپايتىن، مەملەكەتتىك جانە مەملەكەتتىك ەمەس ۇيىمدارمەن تىعىز جۇمىس جاساي بىلەتىندەر قاجەت.
- تاربيە ءىسى جونىندەگى پرورەكتورلار مەن ديرەكتوردىڭ تاربيە ءىسى جونىندەگى ورىنباسارلارى ستۋدەنتتىك ءوزىن-وزى باسقارۋ ۇيىمدارىنىڭ ليدەرلەرىن قولداپ، ءوز ارا تاجىريبە الماساتىنداي الاڭداردى ۇنەمى ۇيىمداستىرىپ تۇرۋ كەرەك.
- وقۋ ورىندارىندا «تالانتتى جاستار كلۋبىن»، «جۇلدىزبەن سۇحبات»، سوڭعى كەزدە جاستار اراسىندا موداعا اينالعان Startup بيزنەس Club-ىن، برەين رينگ ينتەللەكتۋالدى كلۋبىن، ترەنينگ ورتالىقتارىن، فۋتبول كلۋبىن، كۆن مەن دەبات كلۋبتارىن قايتا ەنگىزىپ، جاڭاشا فورماتتا، جۇيەدە جۇمىس جاساۋ كەرەكتىگى كورىنىپ تۇر.
- مەملەكەت تاراپىنان «وقۋ ورنىنداعى قايتالانباس ۇزدىك جوبا» اتتى بايقاۋ ۇيىمداستىرىپ، سول جوبالاردى جانە ولاردىڭ اۆتورلارىن باعالى سىيلىقتارمەن ماراپاتتاپ، مەملەكەتتىك دەڭگەيدە جاستار ساياساتىنا ەنگىزۋ قاجەت. سەبەبى، ءبىزدىڭ قوعامدا جاڭا يدەيا مەن ىسكەر كادرلاردى سۋدىڭ بەتىنە شىعاراتىن كەز كەلدى.
- وقۋ ورىندارى ءالى دە ءوندىرىس وشاقتارىمەن ياعني جۇمىس بەرۋشىلەرمەن تولىق بايلانىستار ورناتپادى. جاستار اراسىندا جۇمىسسىزدىق ماسەلەسى ءالى دە تولىق قامدى شەشىلمەدى. وقۋ ورىندارى جەرگىلىكتى بيلىك وكىلدەرىمەن بايلانىسا وتىرىپ، اكىمشىل رەسۋرستاردىڭ نەگىزىندە جۇمىس بەرۋشىلەردى وقۋ ورىندارىنا شاقىرىپ، «پراكتيكا ارقىلى جۇمىسقا» اتتى جوبالارمەن كەزدەسۋلەردىڭ نەگىزىندە جاستاردى جۇمىسپەن قامتاماسىز ەتۋدى جۇيەلى تۇردە جولعا قويۋ قاجەت.
ەلىمىزدە تەك كوزى جانىپ تۇرعان، بىلىكتى، ىسكەر جاستار عانا ازاماتتىق قوعامنىڭ بەلسەندىلىگىن ارتتىرا الادى.
ەسكەندىر قۇرماشيەۆ
ساياساتتانۋشى
