قىزعالداقتار ەلىنەن كەلگەن قانداسىمىز مۇرات ونەل اتاجۇرتقا العاش قادام باسىپ وتىر. اتى اڭىزعا اينالعان «اياكس» فۋتبول مەكتەبىنىڭ تۇلەگى شىمكەنتكە قالا اكىمى دارحان ساتىبالدىنىڭ شاقىرتۋىمەن كەلگەن بولاتىن.

جەرگىلىكتى «قىران» كومانداسىمەن كەلىسىم-شارتقا وتىرعان جاس جىگىت تاياۋدا قالا باسشىسىنىڭ جەكە قابىلداۋىندا بولدى.

مۇرات دارحان ساتىبالدىعا شەكسىز ريزاشىلىعىن ءبىلدىرىپ، العىسىن جەتكىزدى. سونىمەن قاتار ول كارى قۇرلىقتان شىمكەنت قالاسىنىڭ اكىمىنە كادەسىي رەتىندە اكەلگەن گوللانديا ۇلتتىق قۇراماسىنىڭ جەيدەسىن تارتۋ ەتتى.

سونداي-اق، مۇرات شىمكەنتتە قازاقتاردىڭ كوپتىگىنە ءدان ريزا. ايتۋىنشا، گوللانديادا قىرىق شاقتى قازاق جانۇياسى بار ەكەن.

- مۇنشاما كوپ قانداستاردى ومىرىمدە العاش رەت كوردىم. ماعان وسىنداي مۇمكىندىك سىيلاعان شىمكەنت قالاسىنىڭ اكىمىنە شەكسىز العىس ايتامىن. ۇلتجاندى ازامات ەكەن! مۇندا مەنىڭ انا ءتىلىمدى ۇيرەنۋىمە كوپتەگەن قازاق بالالارى كومەكتەسۋدە،- دەيدى مۇرات. ول اعىلشىن جانە تۇرىك تىلىندە سويلەيدى. — ماقساتىم قازاق قىزىنا ۇيلەنىپ، وسىندا وتباسىن قۇرۋ. اتا-انام مەنى اتاجۇرتقا شىعارىپ سالاردا -فۋتبول ويناماساڭ دا قازاقستاندا قالۋعا ۇمتىل دەگەن-دى. اكە-شەشەمنىڭ ءۇمىتىن اقتاۋعا تىرىسامىن. قازاقستاننىڭ گوللانديادان ايىرماشىلىعى كوپ. الايدا، دارحان اعا سەكىلدى ازاماتتار قامقور بولسا، ۇيرەنىپ كەتەمىن دەپ ويلايمىن. ءيا، ماعان «اياكس» فۋتبول مەكتەبىندە جاتتىعۋ باقىتى تۋدى. ءبىراق، ونداعى قازاق بالالارىنىڭ كوپشىلىگىندە فۋتبولمەن اينالىسۋ مۇمكىندىگى جوق. سەبەبى، ونداعى سپورت مەكتەپتەرىندە وقۋ ۇلكەن قارجىنى تالاپ ەتەدى. ال قىزعالداقتار ەلىندەگى قانداستاردىڭ كوپشىلىگىندە ونداي مۇمكىندىك جوق. سول سەبەپتى، قازاق بالالارى ەرجەتە جۇمىس ىستەپ، قاراجات تابۋعا تىرىسادى. ايتا كەتەيىك، مۇرات ونەل قازاقستان فۋتبول چەمپيوناتىندا «قىران» كلۋبى ساپىندا «استانا 1964» كومانداسىمەن وتكەن العاشقى كەزدەسۋىندە گول سالىپ، جەڭىسكە جەتۋىنە سەپتىگىن تيگىزگەن بولاتىن.