بۇگىنگى تۇندە، تامىزدىڭ 3-نەن 4-نە قاراعان ءتۇنى، ساعات 00.45-تە قازاقستاننىڭ سپورتتىق ومىرىنە قاتىستى تاريحي وقيعا بولادى. شوتلانديانىڭ گلازگو قالاسىنداعى «سەلتيك پارك» ستاديونىندا ۋەفا چەمپيوندار ليگاسىنىڭ ءۇشىنشى بىلىكتىلىك راۋندى اياسىندا «استانا» مەن «سەلتيك» كوماندالارى ب ا ق سىناسادى. فۋتبول تاماشاسىن «قازاقستان» تەلەارناسى تىكەلەي ەفيردەن كورسەتەدى. جاسىراتىنى جوق، بۇل ويىن بۇرىنعى ويىنداردان وزگەرەك. ويتكەنى، ەكى ەلدىڭ جانكۇيەرلەرى جۇرەكتەرى لۇپىلدەپ، وسى فۋتبول تويىنىڭ بولادىسىن تاعاتسىزدانا كۇتىپ وتىر. بۇل چەمپيوندار ليگاسىنىڭ توپتىق كەزەڭىنە قاي كوماندانىڭ شىعاتىنىن انىقتايتىن ءسات. ولاي بولسا، ميليونداعان قازاقستاندىقتار بۇگىنگى تۇندە تەلەديدار ەكرانىنا تەلمىرىپ، ءوز كومانداسىنىڭ جەڭىسىن تىلەيتىن بولادى. قازاقشا ايتقاندا، ۇيدە وتىرىپ، «تاقىم قىساتىن»، «بوركىمىزدى اسپانعا اتاتىن» كەز.
جاراتقانعا جالبارىنىپ، بۇگىنگى ويىندا «استاناعا» سونداي رۋحىمىزدى اسقاقتاتىن جەڭىس تىلەيمىز! كەشەگى «استانا-ارەنا» تورىندەگى ەكى كوماندانىڭ شارشى الاڭدا كەزدەسكەنى ءالى ەسىمىزدە. ەسەپ 1:1 بولىپ، ويىن تەڭ اياقتالدى. تۇماندى البيوننان كەلگەن جىگىتتەر دە، استانالىق فۋتبول ارلاندارى دا بىر-بىرىمەن بەرىسپەدى. ءبىزدىڭ ويىمىزشا، بۇگىنگى ويىن دا قىزىق پەن قۋانىشقا، ءۇمىت پەن كۇدىككە تولى بولارى ءسوزسىز. ارينە، شوتلاندتىقتار ءوز الاڭىندا ءسال دە بولسا باسىمدىققا يە بولار. ءبىراق باپ شاپپايدى، ب ا ق شابادى. بالكىم، ءبىزدىڭ «استانانىڭ» باعىم باسىم تۇسەر. قالاي بولارىن، ۋاقىت پەن ويىن كورسەتەدى.
ەندى ويىننىڭ بارىسىنا وزىمىزشە از-ماز بولجام جاساپ كورەيىك. بۇل جولى برەندان رودجەرس تە، ستانيمير ستويلوۆ تا ويىننىڭ تاكتيكالىق ءتاسىلىن وزگەشە قۇراتىنى انىق. شوتلاندتىقتار كوبىنەسە شابۋىلعا كوڭىل بولسە، استانالىقتار قورعانىستى بەرىك قىلۋعا تىرىسىپ باعادى. الايدا ويىننىڭ ورنەگى باسقاشا دا ءتۇزىلۋى ابدەن مۇمكىن. ەڭ باستىسى، استانالىقتار شوتلاند جانكۇيەرلەرىنىڭ شۋىلىنان، ىسقىرىعىنان باسەڭسىپ قالماۋى قاجەت. سەبەبى، «سەلتيك» ءوز الاڭىندا، ءوز جانكۇيەرلەرىنىڭ الدىندا ايبارلانىپ وينايتىنى انىق. قىسقاسى، ءبىزدىڭ كوماندا احۋالدىڭ قانداي سەنارييمەن وربيتىنىنە دە دايىن بولۋى ءتيىس.
«جاقسى ءسوز – جارىم ىرىس» دەيدى قازاق. بۇگىنگى ويىندا «استانا» «سەلتيكتى» 2:0 نەمەسە 1:0 ەسەبىمەن ۇتادى دەپ بولجاپتى بۋكمەكەرلەر. قازاق مۇندايدا «اۋزىڭا ماي، استىڭا تاي» دەمەي مە؟!. ەگەر الدا-جالدا ويىن وسىنداي ەسەپپەن اياقتالاتىن بولسا، «استانا» چەمپيوندار ليگاسىنىڭ پلەي-وفف كەزەڭىنە وتەدى. بۇل قيال ەمەس، اقتالاتىن ءۇمىت. مۇنداي ءۇمىتتى ءبىز تەك چەمپيونىمىز – «استاناعا» عانا ارتا الامىز. ءبىزدىڭ چەمپيونىمىز چەمپيوندار ليگاسىندا ناعىز چەمپيوندارشا ويناۋى ءتيىس! باسقاشا بولۋى مۇمكىن ەمەس. ول ءۇشىن ءار فۋتبولشىمىزدىڭ جۇرەگىندە جەڭىسكە دەگەن ءۇمىت پەن سەنىم بولۋى قاجەت. سوندا عانا جەڭىستىڭ ءتاتتى ءدامىن تاتامىز.
نەلىكتەن ءبىزدىڭ كوماندا جەڭىسكە جەتۋى كەرەك؟ مۇنىڭ بىرنەشە سەبەپتەرى بار. ءبىرىنشى سەبەپ – «سەلتيك» ۋەفا چەمپيوندار ليگاسىنىڭ قورعانى بەرىك، تەمىر قامالى ىسپەتتەس كوماندا. ەگەر بۇگىن بۇل قامالدى بۇزا الماساق، ءارى قاراي جولىمىز جابىلادى. قالاي بولعاندا دا، ءبىزدىڭ فۋتبولشىلارىمىز نە 1:0 نەمەسە 2:0 ەسەبىمەن جەڭىسكە جەتىپ، ءتىپتى بولماعاندا تەڭ ويىنمەن ۇيلەرىنە قايتقانى ابزال. ەكىنشى سەبەپ – «سەلتيك» - وڭاي شاعىلاتىن جاڭعاق ەمەس. بۇل كلۋب ەۋرو كۋبوكتارىنىڭ تاريحىندا ەرەكشە، بەدەلدى ورىن الاتىنى بارشاعا ءمالىم. وعان قوسا، شوتلانديانىڭ چەمپيونى دەگەن ابىرويلى اتاقتى 47 رەت يەلەنگەن كوماندا. 36 رەت كۋبوكتى جەڭىپ الىپتى. «استانالىقتاردىڭ» باپكەرى ستانيمير ستويلوۆ ايتقانداي، «بۇل قانداي دا ءبىر اۋىلدان شىققان ەلەۋسىز كوماندا ەمەس».
جەڭىسكە ءۇمىت ارتۋىمىزدىڭ تاعى ءبىر سەبەبى بار. ءۇشىنشى ىرىكتەۋ راۋندىنا جول تارتقان «استانانىڭ» قۇرامىنا ەريچ، شومكو، لوگۆينەنكو، شيتوۆ، بەيسەبەكوۆ، انيچيچ، كانيانس، تاعىبەرگەن، نۇرعالييەۆ، تۆۋماسي، كابانانگا سياقتى ويىنشىلار ەندى. ويىندى وسى قۇراممەن باستايمىز. ارينە، «مانچەستەر سيتيدەن» كەلگەن جاس تالانت ديما شومكوعا، نەناد ەريچكە ەرەكشە ءۇمىت ارتامىز. ەڭ باستىسى، ءبىزدىڭ ويىنشىلار دا شەتىنەن «سەن تۇر، مەن اتايىن». ولاي بولسا، جەڭىستى قولدان بەرمەيتىنى ايدان انىق. ولار «سەلتيك پاركتە» جاتتىعۋ ويىنىن وتكىزىپ ۇلگەردى. ايتا كەتەلىك، بۇل ستاديون بايىرعى عيماراتتاردىڭ ءبىرى. 1892 جىلى سالىنعان. 60 مىڭنان استام ادام سىيعىزا الادى. ارتقا شەگىنىس جاساساق، بۇل ستاديونعا قازاقستاندىق فۋتبولشىلار 2013 جىلى تابان تيگىزدى. قاراعاندىلىق «شاحتەر» مەن گلازگولىق «سەلتيكتىڭ» شارشى الاڭداعى ايقاسى وسى جەردە وتكەن بولاتىن. ءبىراق، ول كەزدە «شاحتەردىڭ» ساعى سىنىپ، شوتلاند كومانداسىنان 0:3 ەسەبىمەن ۇتىلدى. ول ويىن باسقا، بۇگىنگى ويىن ءبىر باسقا.
بۇگىنگى ويىندا ءبىزدىڭ فۋتبولشىلارعا جەڭىسكە دەگەن سەنىم مەن مۇقالماس رۋح قاجەت. ول ءۇشىن سپورتشىلارىمىزدى بۇكىل ەل، ۇلت بولىپ قولداۋىمىز كەرەك. سپورت – بىرلىكتى نىعايتاتىن كەرەمەت كۇشكە يە. ەندەشە، بىرلىگىمىز بەن تۇتاستىعىمىزدى شىڭدايتىن ءسات تۋىپ وتىر. «استانانىڭ» جەڭىسىنە جانكۇيەر بولساق، ەلىمىزدىڭ سپورتتاعى جەتىستىكتەرىنە تىلەۋلەس بولعانىمىز. سوندىقتان، بارشا قازاقستاندىقتارعا ايتارىمىز: ءبىر ساتكە كۇيبەڭ تىرلىكتى ۇمىتىپ، ءوز كوماندامىزدىڭ جەڭىسىنە تىلەۋلەستىك تانىتايىق! ەڭ باستىسى، وسى ويىندى كورىپ وتىرىپ، ءوزىمىزدىڭ ۇلتتىق رۋحىمىزدى، كۇش-قايراتىمىزدى اسقاقتاتايىق! ءار وتباسىندا ۇلتقا، ەلگە دەگەن سۇيىسپەنشىلىك، پاتريوتيزم سەزىمى ۇلعايسىن! سول ارقىلى وتانىمىزدىڭ ءار جەتىستىگىنە قۋانايىق! سول كەزدە ەلدىگىمىز ماڭگىلىك، تۇتاستىعىمىز تۇعىرلى، ۇرپاعىمىز عۇمىرلى بولادى. ولاي بولسا، بۇگىنگى تۇندە بارشا وتانداستارىمىز «استانانىڭ» رۋحى اسقاقتاپ، ەۋروپانىڭ تورىندە كوك بايراعىمىزدىڭ جەلبىرەگەنىن كورۋگە جازسىن!
العا، «استانا»! العا، قازاقستان!
ءامىرلان ءالىمجان
