ەلىمىزدە لاڭكەستىك ارەكەتتەردىڭ جيىلەپ كەتۋىنە بايلانىستى اسكەري بولىمدەر ءتىپتى يتتەردىڭ دە دايىندىعىن كۇشەيتىپ جاتىر. شىمكەنت تۇبىندە «وڭتۇستىك» ايماقتىق اسكەري باسقارماسى توبەتتەر اراسىندا تىعىلعان ادامداردى تاۋىپ قانا قويماي، ءتىپتى العاش رەت جاسىرىلعان جارىلعىش زاتتى تابۋدان دا جارىس ۇيىمداستىردى، - دەپ حابارلايدى Qamshy.kz كتك ارناسىنا سىلتەمە جاساپ. 

كوپ قۇدىقتىڭ ىشىنەن لاڭكەستى ساناۋلى ۋاقىتتا تابۋ، بىرنەشە جاشىكتىڭ ىشىنەن قاس-قاعىم ساتتە ەسىرتكىنى انىقتاۋ ءۇشىن 27 توبەت تارتىلعان. دەنى نەمىس وۆچاركاسى بولىپ كەلەتىن يتتەردىڭ ەڭ جاسى 1-دە بولسا، كەيبىرى تالاي قىلمىستىڭ بەتىن اشىپ جۇرگەن اككىلەرى ەكەن. بۇگىن باستالعان بايقاۋعا ءتىپتى بالالار ءۇيىنىڭ تاربيەلەنۋشىلەرى دە قاراۋعا مۇمكىندىك الدى. ءبىر اپتا ىشىندە بىرنەشە اسكەري ءبولىمنىڭ قىزمەتكەرلەرى تاجىريبە الماسىپ، ءتۇرلى وقىس وقيعالاردىڭ الدىن الۋدى ۇيرەنەمىز دەپ وتىر.

-سوڭعى ۋاقىتتا ەلىمىزدە وقىس جاعدايلار جيىلەپ كەتتى. سوعان بايلانىستى ءىز كەسۋشى يتتەردىڭ جاتتىعۋىن دا كۇشەيتىپ جاتىرمىز. مىسالى، تاجىريبەمىزدە العاش رەت توبەتتەرگە جارىلعىش زاتتاردى تابۋ ايلاسىن ۇيرەتىپ ءجۇرمىز، - دەيدى بايقاۋدىڭ باس تورەشىسى ماكسيم پوپوۆ.