اتىراۋ وبلىسىندا كارانتين جاريالاندى. بوگدە ادامدارعا ۋاقىتشا كىرىپ-شىعۋعا رۇقسات جوق. سەبەبى، قالانىڭ كىرەبەرىسىندە قاتاڭ تەكسەرىس باستالىپ كەتتى. شەتتەن مال ساتىلىپ الىنبايدى، ىشتەن شىعارىلمايتىن بولدى. الايدا، ءقاۋىپتى ۆيرۋستىڭ تارالۋىنا بايلانىستى جاريالانعان كارانتيننىڭ قانشا  ۋاقىتقا دەيىن سوزىلارى ءالى بەلگىسىز، - دەپ حابارلايدى Qamshy.kz 31 ارناعا سىلتەمە جاساپ.

اتىراۋداعى قازىرگى جاعداي وسىنداي. قالاعا كىرەر بەتتە ءار كولىك، ءار ادام قاتاڭ تەكسەرىستەن وتەدى. بەتتەرىن تۇمشالاعان مامانداردىڭ بۇل ارەكەتى وڭىردە جاريالانعان كارانتينگە تىكەلەي قاتىستى. ويتكەنى اتىراۋ وبلىسىندا اۋرۋ مالدىڭ سانى ءۇش مىڭنان اسىپ جىعىلعان. ماسەلەن، قالا ىرگەسىندەگى كەڭوزەك اۋىلدىق وكرۋگىنە قاراستى شارۋاشىلىقتاردا ءبىر كۇندە جالپى سانى 51 باس ءمۇيىزدى ءىرى قارانىڭ اۋرۋ ەكەنى انىقتالعان. ال، ماماندار دەرتتىڭ الدىن الۋ ءۇشىن ارنايى ەكپە جۇمىستارىن جۇرگىزۋدە.

- بارلىعى دا وقشاۋلانىپ، مال باسى. ەمدەۋ جۇمىستارى جۇرگىزىلىپ جاتىر. ءقازىر كەڭوزەك اۋىلدىق وكرۋگى بويىنشا بارلىق باس بۇگىنگى كۇنگە 51 باس بولىپ تىركەلىپ تۇر، - دەيدى مال دارىگەرى ايگۇل قۇرمانوۆا.

وڭىردە تۋىنداعان جاعدايعا بايلانىستى جيىن وتكىزگەن ماماندار ءمۇيىزدى ءىرى قارانىڭ اۋرۋى الىستان كەلدى دەپ وتىر. ايتۋلارىنشا اتىراۋعا كەلگەن مال اۋرۋى استراحاننان تارالعان. مۇنى ماماندار ءمالىم ەتتى. 

- استراحان وبلىسىنىڭ مالدارىنان جۇققانى انىقتالدى. نودۋليارنىي دەرماتيت ەكەنىن بىلاي جالپى، ءبىزدىڭ دارىگەرلەر ءبىلدى. ءبىراق، ارنايى رەفەرەنتنىي سەنتردەن قورىتىندى بولماعاندىقتان ول ايتىلا قويعان جوق، - دەيدى اتىراۋ وبلىستىق ۆەتەريناريا باسقارماسىنىڭ باسشىسى نۇرباي ابدىراحمانوۆ.

وبلىس بويىنشا ءقازىردىڭ وزىندە ءۇش مىڭنان استام ءمۇيىزدى ءىرى قارا اۋرۋعا شالدىعىپ، 250 باسى ولگەن.  مال اۋرۋىنا نودۋليارلى دەرماتيت، ياعني ءىرى قارالاردىڭ تەرىلەرىندە ىسىكتەر پايدا بولىپ،  بورتپەلەر قاپتاعان دياگنوزى قويىلعان. ماماندار ەندى سىرتتان ەت، ءسۇت ونىمدەرى كىرگىزىلمەيتىندىگىن، سىرتقا شىعارىلمايتىنىن ايتادى. وسىعان وراي قالا بويىنشا سانيتارلىق بەس بەكەت جۇمىس ىستەپ تۇر.

اتىراۋدا ءمۇيىزدى ءىرى قارالاردىڭ اۋرۋىنا بايلانىستى كارانتين جاريالانعان بولاتىن. سوعان وراي سىرتتان قالاعا كىرەتىن كولىكتەردىڭ بارلىعىنا دەزينفەكسيا جاسالىپ جاتىر. ال، كارانتيننىڭ قاي ۋاقىتقا سوزىلاتىنى بەلگىسىز.