«بۇل اپتا ەكى جاڭالىقپەن باستالدى. ءبىرى – سۋىق حابار. الماتى اۋرۋحاناسىندا ءىىد جەرگىلىكتى پوليسيا قىزمەتىنىڭ اعا سەرجانتى سەرىك ابىلدايەۆ پەن المالى اۋدانى ءىىب-نىڭ ۋچاسكەلىك ينسپەكتورى مەيرامبەك راحماتۋللايەۆ قايتىس بولدى. الماتىلىق اتقىش رۋسلان كۇلىكبايەۆتىڭ قولىنان قازا تاپقاندار ءتىزىمى توعىز ادامعا دەيىن ارتتى. ەكىنشى جاڭالىق، شىنىن ايتقاندا، اقىلعا قونبايدى: بارلىق ەل بويىنشا جاريالانعان لاڭكەستىك قاتەردىڭ «سارى» دەڭگەيىنە قاراماستان ىشكى ىستەر ءمينيسترى قالمۇحانبەت قاسىموۆ اياق استىنان دەمالىسقا كەتتى»، - دەپ جازادى «ۆرەميا» گازەتى.
باسىلىمنىڭ جازۋىنشا، ق ر قىلمىستىق كودەكسىنىڭ التى بابى بويىنشا قوزعالعان ر. كۇلىكبايەۆ ءىسىن تەرگەۋگە ق ر باس پروكۋراتۋراسىنىڭ ارنايى پروكۋرورلار دەپارتامەنتىنىڭ قىزمەتكەرلەرى كىرىسىپتى. سونىمەن قاتار، قۇقىق قورعاۋ ورگاندارى ر. كۇلىكبايەۆتىڭ تاعى ءتورت توناۋ، ەكى ۇرلىق وقيعاسىنا قاتىسى بار-جوعىن تەكسەرىپ جاتسا كەرەك.
باس پوليسەيدىڭ دەمالىسقا كەتۋىنە تاڭدانىس بىلدىرگەن باسىلىم الماتىداعى تەراكتىگە قاتىستى تەرگەۋ بارىسىندا بەلگىلى بولعان ءبىرقاتار ءجايتتارعا دا توقتالىپتى.
«وسى وقيعاعا بايلانىستى ءتۇرلى ماتەريالداردا المالى ءاىىب كەزەكشىسىنىڭ راديوحابارلارى بار: ول (كەزەكشى – رەد.) پوليسيا باسقارماسىنا شابۋىل جاسالعانىن حابارلايدى، ءبىر مينۋت وتىسىمەن عيماراتقا جاقىن ماڭدا جۇرگەن پاترۋلدەردى شاقىرادى. ولارعا ساۋىتتى كەۋدەشە كيۋدى، اىىب-دە اتىس بولىپ جاتقانىن ايتادى. ءبىراق، عيمارات ىشىندە ونداعان پوليسيا، قارۋلى كەزەكشى اۋىسىم جۇرگەندە قالاداعى پاترۋلدەردى شاقىرۋدىڭ قاجەتى قانشا؟ ودان بولەك، ءاىىب جانىندا ورنالاسقان ءىىد عيماراتىن ادەتتەگى ساقشىلاردان بولەك ارنايى جاساقتىڭ 10 جاۋىنگەرى (مەرگەن، ساپەر، مينا ىزدەۋشى جانە 7 شابۋىلداۋشى) كۇزەتەدى. ونىڭ جاۋىنگەرلەرى لاڭكەستىككە قارسى ارنايى وپەراسيالارعا قاتىسقان، جاۋىنگەرلىك تاجىريبەلەرى بار، قارۋ قولدانۋدى جاقسى مەڭگەرگەن. ءىىم باسشىلىعى وسى كاسىپقوي جاۋىنگەرلەردى نەگە كوتەرمەگەن؟»، - دەگەن ساۋال تاستايدى «ۆرەميا».
باسىلىم «اتالعان جاۋىنگەرلەر اۋداندىق ءىىب عيماراتىنا ساناۋلى سەكۋندتاردا جەتىپ، جالعىز اتقىشتى زالالسىزداندىرار ەدى عوي» دەگەندى قوسا ايتادى. ەگەر جاۋىنگەرلەرگە شىنىمەن سونداي پارمەن تۇسكەندە، وقيعانىڭ سالدارى دا مۇنشا اۋىر بولماس پا ەدى.
بۇدان ءارى ماقالادا وقيعا كۋاگەرى، ءدال پوليسيا عيماراتىنا شابۋىل جاسالعاندا ءىىب-نىڭ بەسىنشى قاباتىندا جۇرگەن ۆالەريي شينكارنەنكونىڭ سوزدەرى كەلتىرىلەدى. ول سول كۇنى پوليسياعا تەلەفونىن ۇرلاتقانى جونىندە ارىز جازۋعا بارىپتى (كۋاگەردىڭ ءسوزى تۆ-گە بەرگەن سۇحباتىنان سوزبە-سوز كوشىرىلگەن – رەد.).
«مەن ىىب-گە كەلگەندە بەكەتتە جاس لەيتەنانت تۇردى. مەن جانە تاڭ قالدىم: وفيسەردىڭ اۆتوماتپەن، ساۋىتتى كەۋدەشەمەن تۇرعانى نەسى دەپ. قولىمدا پاكەت بولعان، ول ءىشىن 
كورسەتۋدى سۇرادى. بارلىعىن مۇقيات تەكسەرىپ بولعان سوڭ، ماعان كەزەكشى بولىمگە قالاي بارۋ كەرەكتىگىن ءتۇسىندىردى. ول جەردە مەنى بەسىنشى قاباتقا – تەگەۋشىلەرگە جىبەردى. مەن كوتەرىلىپ، وندا قىرىق مينۋتتاي بولدىم.
تومەن ءتۇسىپ، كەزەكشى ءبولىمنىڭ تابالدىرىعىن اتتاي بەرگەنىمدە داۋىس زورايتقىشتان «زاحۆات رۋۆد» دەگەن ايقاي ەستىدىم. جانىمدا ازاماتتىق كيىمدە ەكى كىسى بولعان. تۇسىنۋىمشە، ولار دا وفيسەرلەر. ۇشەۋىمىز جوعارى قاراي جۇگىردىك. مەن قاتتى قورقىپ كەتتىم. بەسىنشى قاباتتا وڭعا بۇرىلدىم. ارتىمدا ءاىىب قىزمەتكەرلەرى جۇگىرىپ كەلە جاتتى. ءبىر كابينەتتىڭ ەسىگى جارتىلاي اشىق تۇر ەكەن، وندا ءۇش پوليسەي بولدى، بىرەۋى قولىنا قارۋ ۇستاعان. تەرەزەدەن قاراپ ەدىك، بەكەتتە تۇرعان وفيسەر جەردە جاتتى، بەتىن قان جۋىپ كەتكەن. ونىڭ باسىنا وق تيگەن سياقتى كورىندى. ءبىراز ۋاقىت وتكەن سوڭ وفيسەرلەر شىعىپ كەتتى، مەن دە سولاردىڭ ارتىنان ەردىم. ساۋىتتى كەۋدەشە كيگەن، اۆتومات ۇستاعان قىزمەتكەرلەر جوعارى كوتەرىلىپ كەلە جاتتى. ولار عيماراتتى تازارتۋعا كىرىستى. مەن اقىرىنداپ تومەن ءتۇسىپ، ءبىرىنشى قاباتقا دەيىن جەتتىم. تومەن تۇسكەنىم سول ەدى، قايتادان ايقاي شىقتى. ءبىز تەزدەتىپ جوعارى قاراي جۇگىردىك. تاعى وق اتىلدى. ءبىز ءۇشىنشى قاباتقا دەيىن جۇگىردىك. بىرنەشە ايەل ءجۇر ەكەن، ولار ءبىزدى كەڭسە بولمەسىنە كىرگىزدى. وندا تەمىر ەسىك بولدى. سول جەردە ەكى ساعاتتاي بولددىق. وق اتىلعانىن، ايقايدى ەستىپ وتىردىق. ول (ر. كۇلىكبايەۆ – رەد.) ءاىىب اۋماعىندا ءجۇردى. شىنىن ايتقاندا، قاتتى قورىقتىق...»، - دەيدى وقيعا كۋاگەرى.
باسىلىم كۋاگەردىڭ ايتقاندارىنا سۇيەنە وتىرىپ «اىىب-دە بولعان پوليسەيلەر مىلتىق داۋسىن ەستي سالا كابينەتتەرىنە تىعىلىپ، پاترۋلدەردىڭ كەلۋىن كۇتىپ جاتقان با؟ جىگىتتەر شوشىپ كەتكەن شىعار، تۇسىنىكتى. ونداي قارۋلى شابۋىلدى كۇتپەگەن بولار. ءبىراق، ولار جاي ادامدار ەمەس، پوليسيا وفيسەرلەرى ەمەس پە؟»، - دەگەن ساۋال تاستايدى.
«قىلمىسكەر اۆتومات ۇستاپ كوشەلەردى شارلاپ، ونى پوليسيا قۋىپ جۇرگەندە قۇربان بولعاندار سانى ارتا بەردى. ر. كۇلەكبايەۆ ءبىرىنشى ۇقك دەپارتامەنتىندە پوليسيا ەكيپاجىنا وق جاۋدىردى، ارتىنان شەكارا قىزمەتىنىڭ وفيسەرىن ءولتىردى. تەك الماتى قالاسى مەملەكەتتىك كىرىس دەپارتامەنتى عيماراتىن كۇزەتىپ وتىرعان «كۇزەت» قىزمەتكەرى ايان عالييەۆ ءوزىنىڭ ومىرىمەن قوش ايتىسا وتىرىپ، قارۋلى قىلمىسكەردى زالالسىزداندىردى. ەگەر ستارشينا ا. عالييەۆ ونىڭ الدىنان شىقپاعاندا وقيعانىڭ ارتى نە بولارىن ويلاۋدىڭ ءوزى قورقىنىشتى» دەپ جازادى باسىلىم.
«ۆرەميا» مينيستر ق. قاسىموۆتىڭ قايتىس بولعان پوليسەيلەردى اقتىق ساپارعا شىعارىپ سالۋ راسىمدەرىنە قاتىسپاعاندىعىنا، جاراقات الىپ، اۋرۋحاناعا تۇسكەن پوليسەيلەردىڭ كوڭىلىن سۇراپ بارماعانىنا دا نازار اۋدارتادى.
«الماتى وبلىسىنىڭ اكىمى اماندىق باتالوۆ تالدىقورعاننان قاراقىستاق اۋىلىنا كەلىپ، سەرجانت ماقسات سالىمبايەۆتىڭ جەرلەۋ راسىمىنە قاتىستى. ول جەردەن ايماق باسشىسى ەڭبەكشىقازاق اۋدانىنىڭ بولەك اۋلىنا (ەكى اۋىلدىڭ اراسى 200 شاقىرىمعا جۋىق) باردى. وندا جول-پاترۋلدىك پوليسيا ارنايى باتالونىنىڭ اعا ينسپەكتورى لەيتەنانت تيمۋر بەگاسىلوۆتىڭ جانازاسى وقىلدى. قازا بولعانداردىڭ وتباسىنا ا. باتالوۆ «اسىل ارمان» ءتۇرعىن-ۇي كەشەنىنەن پاتەر كىلتىن تابىس ەتتى. «بۇل، ارينە، قازانىڭ ورنىن تولتىرمايدى. ءبىراق، ءومىر ءبىر ورىندا تۇرمايدى، بالالارىنا، تۋىستارى مەن جاقىندارىنا ۇزاق ءومىر تىلەيىك» دەگەن كوڭىلىن ءبىلدىردى.
وسى كۇنى الماتى اكىمى باۋىرجان بايبەك تە قازا بولعانداردى اقتىق ساپارعا شىعارىپ سالۋ راسىمىنە قاتىسىپ، جاقىندارىنان ايرىلعان وتباسىلارعا كوڭىل ايتتى. نۇرسۇلتان نازاربايەۆتىڭ اتىنان عالييەۆ وتباسىنا ەكى بولمەلى پاتەر كىلتىن تابىس ەتتى. قالا باسشىسى كەيىن اۋرۋحاناعا دا بارىپ، اۋىر جاراقات العان پوليسەيلەردىڭ جاعدايىن ءبىلدى.
ال، ءىىم باسشىسى اۋرۋحانادا دا، پوليسيا قىزمەتىندەگى ءوزىنىڭ جاۋىنگەرلىك جولداستارىن جەرلەۋ راسىمىندە دە توبە كورسەتپەدى. الايدا، ونى قاۋىپسىزدىك كەڭەسىنىڭ جەدەل جيىنىندا نازاربايەۆتىڭ ءوزى الماتىعا ءىس-ساپارعا جىبەرگەن بولاتىن. قالمۇحانبەت نۇرمۇحانبەت ۇلى شىنىمەن دە اۋرۋحاناعا بارىپ، ولىممەن بەتپە-بەت كەلگەن باعىنىشتىلارىنىڭ قولىن قىسۋعا، جەرلەۋ راسىمىندە كوڭىل ايتۋعا ۋاقىت تاپپاعانى ما؟ (...) الماتىدا وتكەن قوشتاسۋ شاراسىندا باۋىرجان بايبەكتىڭ جانىندا ق. قاسىموۆ تا تۇرۋى كەرەك ەدى عوي»، - دەپ جازادى باسىلىم.
ال، ۇقك باسشىسى ۆلاديمير جۇماقانوۆ ر. كۇلىكبايەۆتىڭ قولىنان قازا تاپقان شەكارا قىزمەتىنىڭ وفيسەرى ازامات ءازىمجانوۆتى (قايتىس بولعان سوڭ) «ۇلتتىق قاۋىپسىزدىكتى قامتاماسىز ەتۋدەگى ۇلەسى ءۇشىن» مەدالىمەن ناگرادتاۋ تۋرالى بۇيرىققا قول قويۋ ءۇشىن ۋاقىت تاپقان كورىنەدى. ۇقك شەكارا قىزمەتىنىڭ باسشىسى گەنەرال-مايور دارحان ءدىلمانوۆ بولسا، باس پوليسەي سياقتى جەدەل حاتپەن شەكتەلمەي الماتى وبلىسى پيدجيم اۋىلىنا ارنايى بارىپ، باعىنىشتىسىنىڭ جەرلەۋ راسىمىنە قاتىسقان.
جالپى، ۇقك باسشىلىعىنىڭ بۇل ماسەلەدە وزگەلەرگە ۇلگى بولاتىن ىستەرى بارشىلىق. اقتوبەدەگى جاعدايدان سوڭ دا كوميتەت ءتوراعاسى ۇقك-نىڭ وبلىستىق دەپارتامەنتى باسشىسىن ورنىنان الدى. ال، اقتوبە وبلىستىق ءىىد-نىڭ باسشىسى ەمەس، ونىڭ ورىنباسارى ورىندىعىمەن قوشتاستى. الماتىداعى جاعدايدان سوڭ، المالى اۋداندىق ءىىب باستىعى اسقار بولاتوۆ ءوز ەركىمەن لاۋازىمىنان بوساتۋ تۋرالى بايانات جازعان ەكەن. جاقىندا ول ءىىد باسقارمالارىنىڭ بىرىنە ءبولىم باستىعى بولىپ تاعايىندالىپتى. ودان بولەك الماتى ءىىد-نىڭ جەرگىلىكتى پوليسيا قىزمەتى، اكىمشىلىك پوليسيا قىزمەتى باستىعى مەن ونىڭ ورىنباسارى قاتاڭ سوگىسپەن قۇتىلىپتى. ال، مينيستر قالمۇحانبەت قاسىموۆتىڭ ءوزى دەمالىسقا كەتكەن.
