ەۋروپا كەڭەسى مەملەكەتتىك بۇلىككە قاتىسقانداردى قۋدالاپ جاتقان تۇركيا بيلىگىن ادام قۇقىقتارىن بۇزباۋعا جانە زاڭ ۇستەمدىگى قاعيداسىن ساقتاۋعا شاقىردى، - دەپ حابارلايدى Qamshy.kz centralasian.org – كە سىلتەمە جاساپ.

سارسەنبى كۇنى انكاراعا كەلگەن ەۋروعا كەڭەسىنىڭ باس حاتشىسى ءتۋربورن ياگلاندتىڭ مالىمدەۋىنشە، ەۋروپا ەلدەرى بۇلىكشىل توپتىڭ تۇركيا سوت جۇيەسىندە جانە اسكەر قۇرىلىمدارىندا وسىنداي اۋقىمدى جۇيەنى قالاي قۇرعانىن تۇسىنبەي قالدى. بۇل ءسوزىن ول تۇركيا ءسىم باسشىسى ميەۆلەت چاۆۋشوگلۋمەن بىرگە وتكىزگەن باسپا ءسوز كونفەرەنسياسىندا ايتتى.

ياگلاند - 16 شىلدەگە قاراعان ءتۇنى بولعان اسكەري بۇلىكتەن كەيىن تۇركياعا كەلگەن ەڭ جوعارى لاۋازىمدى ەۋروپالىق وكىل. انكارا بۇلىكتىڭ ارتىندا ءقازىر اقش-تا تۇراتىن ءدىني قايراتكەر فەتحۋللاح گۇلەن تۇر دەپ ەسەپتەيدى. ءبىراق گۇلەننىڭ ءوزى بۇل ايىپتاۋلاردى جوققا شىعارىپ كەلەدى.

تۇركيا ءساتسىز اياقتالعان مەملەكەتتىك توڭكەرىستەن كەيىن 10 مىڭنان استام ادامدى ۇستادى، شامامەن 70 مىڭ مەملەكەتتىك، پوليسيا جانە اسكەر قىزمەتكەرى جۇمىستان بوساتىلدى نەمەسە قىزمەتتەن شەتتەتىلدى. ەلدە توتەنشە جاعداي ەنگىزىلىپ، ادام قۇقىقتارى جونىندەگى ەۋروپالىق كونۆەنسيا جۇمىسى ۋاقىتشا توقتاتىلدى.