اقتوبە وبلىسىندا ادام قاعىپ ولتىرگەن اۋىل اكىمىنە قاتىستى سوت باستالدى. كەڭقياق ەلدى مەكەنىنىڭ باسشىسى بولعان نۇرلىبەك قالماعانبەتوۆ جارتى جىل بۇرىن ماشيناسىمەن جول جيەگىندە تۇرعان كولىككە سوعىپ، جانىنداعى ەكى جىگىتتى باسىپ وتكەن. سالدارىنان 21 جاستاعى ءادىلحان ءقۋانىشالين وقيعا ورنىندا قازا تاپتى. ال قاسىنداعى جىگىت ءقازىر جازىلىپ شىقتى. ەڭ سوراقىسى، شەنەۋنىكتىڭ ول كەزدە كولىك ايداۋعا قۇقىعى بولماعان. ونىمەن قويماي، سول كۇنى ماس ەكەن، - دەپ حابارلايدى Qamshy.kz كتك ارناسىنا سىلتەمە جاساپ.

جارتى جىل بۇرىن قىزمەتتىك كولىگىمەن جاس جىگىتتىڭ ءومىرىن قيعان اكىمنىڭ قىلىعى كوپشىلىكتىڭ جاعاسىن ۇستاتقان ەدى. ويتكەنى كەڭقياقتىڭ باسشىسى نۇرلىبەك قالماعانبەتوۆ جول جيەگىندە تۇرعان كولىكتى سوعىپ، جانىنداعى ەكى جىگىتتى باسىپ وتەدى. ونىمەن قويماي، قانسىراپ جاتقان اۋىلداستارىن كورە تۇرا وقيعا ورنىنان قاشىپ كەتكەن.

-جول-كولىك وقيعاسىن جاساپ، ناتيجەسىندە اۋىر سالدارعا اكەپ سوققانىن بىلە تۇرا زارداپ شەگۋشىلەرگە العاشقى مەديسينالىق كومەك كورسەتپەگەن. جول كولىك وقيعاسى بولعان جەردەن كەتىپ قالدى، - دەيدى تەمىر اۋدانى پروكۋرورىنىڭ ورىنباسارى ەركەبۇلان ەرمەكبايەۆ.

مۇنايلى اۋىلعا اكىم بولاردىڭ الدىندا نۇرلىبەك قالماعانبەتوۆ كولىك ايداۋ قۇقىعىنان ايىرىلعان. ول كەزدە دە ماس بولىپ ۇستالىپتى. ايتسە دە، اكىمشىلىك جازا وعان ساباق بولماعان سىڭايلى. ويتكەنى اپات بولار كۇنى دە رۋلگە ىشىمدىك ءىشىپ وتىرعان.

-ماساڭ كۇيدە بولدى. ىشكەنى سەزىلىپ تۇردى. ءيىسى شىعىپ تۇردى.

شەنەۋنىك ءالى دە «سول كۇنى ساۋ ەدىم» دەپ وتىر. ال اپاتتىڭ كەشقۇرىم ابايسىزدا بولعانىن ايتىپ انت-سۋ ىشۋدە.

- ءبىرىنشى باسقان جوقپىن دەپ ويلادىم. قايتقان بالانى كورگەندە جوقپىن. سودان مەن دە شوكتا كەتىپ قالدىم. مەن قاشقان  جوقپىن، ايىپتالۋشى نۇرلىبەك قالماعانبەتوۆ.

اكىم قاعىپ ولتىرگەن ءادىلحان ءقۋانىشاليننىڭ اتا-اناسى كەشىرىم بەرۋدەن باس تارتقان. ولار جول بويىندا قانسىراپ جاتقان بالاسىن تاستاپ كەتكەن قالماعانبەتوۆتەن ءتۇڭىلىپ وتىر.

جابىرلەنۋشى تاراپ اكىمنەن وزگە كەڭقياقتاعى امبۋلاتوريا دارىگەرىنىڭ دە جازالانۋىن تالاپ ەتىپ وتىر. ويتكەنى جول-كولىك وقيعاسى بولعان كۇنى شەنەۋنىك ىشىمدىك ىشپەدى دەپ انىقتاما بەرىپتى. ال ونىسى كەيىن وتىرىك بولىپ شىقتى.

وتىرىك ەكەنى ساراپتاما ارقىلى دالەلدەندى. ال سوتقا شاقىرىلعان كۋاگەرلەردىڭ جارتىسىنان كوبى اۋىل اكىمدەرى مەن مەملەكەتتىك قىزمەتكەرلەر ەكەن. ارالارىندا كاسىپكەرلەر دە بار. ويتكەنى قالماعانبەتوۆ اپات بولاتىن كۇنى كەشقۇرىم سولارمەن كەزدەسكەن كورىنەدى. ءبىراق ولار شەنەۋنىكپەن داستارحانداس بولعانىن جوققا شىعارىپ وتىر.