الماتىلىق تۇرعىن ۇلىنىڭ تۋۋ تۋرالى كۋالىگىندە جازىلعان الەمدە جوق ۇلت اتاۋىنان قۇتىلا الماي ءجۇر. 2005 جىلى الماتىنىڭ جەتىسۋ اۋداندىق ازاماتتاردىڭ حال-اكتىلەرىن تىركەۋ مەكەمەسى قۇجاتقا ۇلتى دەگەن تۇسقا "كنر" دەپ جازىپ جىبەرگەن. ورەسكەل قاتەلىككە نامىستانعان تۇرعىن 3 اي بۇرىن كۋالىكتى قايتا اۋىستىرماق بولادى. الايدا مەكەمە قىزمەتكەرلەرى جەر بەتىندە جوق ۇلتتىڭ اتاۋىن "قازاق" دەپ وزگەرتۋدى تىم قيىنداتىپ جىبەرگەن ەكەن، - دەپ حابارلايدى Qamshy.kz 31 ارناعا سىلتەمە جاساپ.

11 جاسار ۇلىم نۇرسۇلتان "ۇلتىم كىم" دەسە، جاۋاپ بەرۋگە قينالامىن دەگەن ازامات تۋۋ تۋرالى كۋالىكتەگى ۇلتىمدى اۋىستىرا الماي ءۇش اي جۇگىردىم دەيدى. 2002 جىلى قىتايدان كوشىپ كەلگەن تۇرعىن 2005 جىلى دۇنيەگە كەلگەن ۇلىنا قۇجات الادى. الايدا احات قىزمەتكەرلەرى تۋعان جىلىن قاتە جازىپ جىبەرگەن. جۋىردا كۋالىكتى قايتا راسىمدەگەندە ۇلتى "كنر" كۇيىندە قالعان. نامىستانعان ازامات مەكەمە قىزمەتكەرلەرىنىڭ ساۋاتسىزدىعىنا رەنجيدى.

- ساۋاتسىزدىعى كۇشتى بولىپ تۇر. جەر بەتىندە جوق ۇلتتى موينىمىزعا تاڭىپ بەردى. جوق ۇلتتان "قازاق" بولۋ ءۇشىن وسىنشاما قۇجات جيىپ ءجۇردىم. بۇل ەندى ۇيات، ەلىمىزگە ۇيات. "كنر" دەگەن ۇلت جەر بەتىندە بار ما، وسىنى جەتىسۋ اۋداندىق زاگس دالەلدەپ بەرسە ەكەن دەپ تالاپ ەتەمىن، - دەيدى الماتى تۇرعىنى ن.راحمەتوللا.

قىزمەتىمە زيانى تيەدى دەپ بەينەسىن كورسەتپەۋدى سۇراعان تۇرعىنمەن بىرگە احات مەكەمەسىنە ءتۇسىرۋ توبى دا كىردى. تىلشىلەردى كۇتپەگەن قىزمەتكەرلەر العاشىندا ەشقانداي پىكىر بىلدىرمەي، تۇسىنىك بەرۋگە قارسى بولعان. الايدا اۋداندىق اكىمدىك وكىلدەرى ارالاسىپ، جاعدايدى تۇسىندىرۋگە تىرىستى. احات مەڭگەرۋشىسى كۋالىكتە كەتكەن قاتەلىك 2005 جىلى جۇمىس ىستەگەن قىزمەتكەرلەردىڭ كىناسى دەيدى

.

- ەندى "ۇلتى" دەگەن جەردە "جۇڭگو حالىق رەسپۋبليكاسى" دەپ جازىلىپ كەتكەن. قاتە بولعان. ونى جوندەۋگە بولادى. زاڭدى جولدارى بار. جوندەۋ ءۇشىن ءتيىستى قۇجاتتاردى جيناۋ كەرەك. ول كىسىگە ايتىلعان، كەڭەس بەرىلگەن. قانداي ءتىزىمدى جيناۋدى ايتتىق. سونى جيناپ بەرىپ، سول كىسى ارىز جازۋ كەرەك ەدى، - جەتىسۋ اۋداندىق احات ءبولىمىنىڭ مەڭگەرۋشىسى گاۋھار ەرعوجا.

نەگە بىرەۋدىڭ قاتەسى ءۇشىن باسقا ادام ساندالۋى كەرەك دەمەستەن، كۋالىكتەگى الەمدە جوق ۇلت اتاۋىنان ارىلعىسى كەلگەن ازامات ءۇش اي ءجۇرىپ ءتيىستى قۇجاتتاردى جيناپتى. ءوزىنىڭ قازاق ەكەنىن دالەلدەۋ ءۇشىن تالاي ەسىكتى قاققان ول احات بولىمىنە ارىز دا جازدى. ۇلكەن ايقاي-شۋ مەن 31 ارنانىڭ ارالاسۋىنان ۇلتى "قازاق" دەگەن كۋالىك ءبىر ساعاتقا جەتپەي دايىن بولدى. بۇل بارشاعا ساباق بولارلىق جاعداي.