استانا قالاسىنداعى ۇلتتىق اكادەميالىق كىتاپحانادا تىلدەردى قولدانۋ مەن دامىتۋدىڭ 2011-2020 جىلدارعا ارنالعان مەملەكەتتىك باعدارلاماسى اياسىندا 2014 جىلى شىعارىلاتىن ونىمدەردىڭ تۇساۋى كەسىلدى، «ابايتانۋ الىپپەسى»، «دانالىق الىپپەسى»، «ەلەكتروندى قازاق ءۇي» جانە باسقا دا ينتەراكتيۆتى ونىمدەر بار.
تۇساۋكەسەر ءراسىمى مادەنيەت ءمينيسترى ا.مۇحامەدي ۇلىنىڭ قۇتتىقتاۋ سوزىمەن اشىلادى.
شاراعا مادەنيەت مينيسترلىگىنىڭ جاۋاپتى قىزمەتكەرلەرى، قازاقستان رەسپۋبليكاسى پارلامەنتىنىڭ دەپۋتاتتارى، فيلولوگ-عالىمدار، ەلىمىزگە تانىمال قوعام قايراتكەرلەرى، اقىن-جازۋشىلار، بۇقارالىق اقپارات قۇرالدارى وكىلدەرى جانە وقىرمان قاۋىم قاتىستى.
شارا اياسىندا ءتىل كوميتەتى تاراپىنان شىعارىلعان بارلىق ونىمدەردىڭ كورمەسى ۇيىمداستىرىلدى.
«ۇلاس-ەلەكترون» جشس-نىڭ العاشقى ءونىمى – «ەلەكتروندى قازاق ءۇي» جوباسى العاش رەت تانىستىرىلدى. ول – ءيىسى قازاقتىڭ يگىلىگىنە جارايتىن تاڭداۋلى زاماناۋي تاربيە قۇرالى. كيەلى قازاق ءۇيدىڭ كىشىرەيتىلگەن نۇسقاسىنا بەسىك جىرى، ەرتەگىلەر، بالالار اندەرى، حالىق جانە حالىق كومپوزيتورلارىنىڭ ان-كۇيلەرى، تەرمە-تولعاۋلار، وتانشىلدىق رۋحتاعى اندەر، ابايدىڭ 45 قارا ءسوزىن قامتىعان 1200 مازمۇن ەنگىزىلگەن. ول – بابالارىمىزدىڭ بىزگە جەتكەن باي رۋحاني مۇرالارىن بۇگىنگى جانە كەلەشەك ۇرپاققا جالعايتىن ءداستۇرلى ۇلگىدەگى زاماناۋي ەلەكتروندى قۇرال. ادەبيەتىمىز بەن مادەنيەتىمىزدىڭ، ءداستۇرلى دۇنيەتانىمىمىز بەن مۋزىكالىق مۇرامىزدىڭ جاۋھارلارىن جالپاق جۇرتقا ناسيحاتتايتىن ۇلتتىق ءونىمنىڭ تاربيەلىك، تاعىلىمدىق قىزمەتى باسىم، ساپاسى جوعارى دەڭگەيدە، مازمۇنى باي، ءار سالانىڭ جىلىگىن شاعىپ، مايىن ىشكەن كاسىبي، مايتالمان ماماندارىنىڭ كەڭەسى نەگىزىندە دايىندالعان. ول ءار قازاقتىڭ تىلدىك، سوزدىك قورىن مولايتادى، رۋحىن كوتەرىپ،ۇلتتىق مۋزىكاعا دەگەن ىقىلاسىن، تانىمىن ارتتىرادى. رۋحاني بايلىعىمىزعا دەگەن قۇرمەتىمىزدى جاڭا ساتىعا كوتەرەدى.
