قازاقستاندىق دزيۋدوشى، 60 كەلى سالماق ساناتىنداعى ەلدوس سمەتوۆ ريو-دە-جانەيروداعى وليمپيادا ويىندارىنىڭ كۇمىس جۇلدەگەرى اتاندى، - دەپ حابارلايدى Qamshy.kz قازاقپاراتقا سىلتەمە جاساپ.
ول فينالدا رەسەيلىك بالۋان بەسلان مۋدرانوۆپەن بەلدەسىپ، نەگىزگى ۋاقىتتا تەڭ دارەجەدە ونەر كورسەتتى. وكىنىشكە قاراي قوسىمشا ۋاقىتتىڭ سوڭعى سەكۋندتارىندا رەسەيلىك سپورتشى ايلاسىن اسىرىپ كەتتى.
وسىلايشا ەلدوس سمەتوۆ ريو وليمپياداسىنىڭ كۇمىس جۇلدەگەرى اتاندى.
ەلدوستىڭ بۇل جۇلدەسى وليمپيادانىڭ العاشقى كۇنى قازاقستان قورجىنىنا تۇسكەن ەكىنشى مەدال.
ەلدوس سمەتوۆ - قازاقستاندىق دزيۋدوشى، حالىقارالىق دارەجەدەگى قازاقستاننىڭ سپورت شەبەرى، 2015 جىلعى الەم چەمپيونى، 2010 جىلعى جاستار اراسىنداعى الەم چەمپيونى، 2013 جىلعى ازيا چەمپيوناتىنىڭ قولا جۇلدەگەرى. ول 1992 جىلى 9 قىركۇيەكتە تارازدا دۇنيەگە كەلگەن.
ەستەرىڭىزگە سالا كەتەيىك، 2008 جىلى بەيجىڭ وليمپياداسىندا تاعى ءبىر قازاق ۇلانى اسحات جيتكەيەۆ دزيۋدودان وليمپيادانىڭ كۇمىس جۇلدەگەرى اتانعان بولاتىن. ەلدوس كۇرەستىڭ وسى تۇرىنەن تاۋەلسىز قازاقستان تاريحىنداعى قازاق بالاسىنان شىققان ەكىنشى وليمپيادا جۇلدەگەرى اتاندى.
