وليمپيادا ويىندارىندا التىن جۇلدەدەن باستى ۇمىتكەر سانالىپ وتىرعان 69 كەلىدەگى دانيار ەلەۋسىنوۆتىڭ قارسىلاسى انىقتالدى، - دەپ حابارلايدى Qamshy.kz Baq.kz - كە سىلتەمە جاساپ.

ۇلتتىق قۇرامانىڭ كاپيتانى ءبىرىنشى اينالىمدا بوس بولعان ەدى. بۇگىن ونىڭ 1/8 فينالداعى قارسىلاسى انىقتالدى. ۇلىبريتانيا بوكسشىسى دجوش كەللي ەگيپەتتەن كەلگەن ۆاليد موحامەدتى ۇتتى. ەندى 11 تامىز كۇنى ەلەۋسىنوۆ پەن كەللي كەزدەسەتىن بولادى.

بۇل بوكسشى قازاقستاندىق جانكۇيەرلەرگە جاقسى تانىس. بۇكىلالەمدىك بوكس سەرياسىندا (WSB) اسلان شىمبەرگەنوۆكە ۇتىلعان ەدى.

ايتا كەتەيىك، ريو وليمپياداسىندا 28 سپورت تۇرىنەن 206 مەملەكەت پەن بوسقىندار كوماندالارىنان 10 مىڭنان استام سپورتشى قاتىسۋدا. بايراقتى باسەكەدە 306 مەدال جيىنتىعى ساراپقا سالىنىپ جاتىر. ءتورت جىلدىقتىڭ باستى دوداسىندا ەلىمىزدىڭ نامىسىن 26 سپورت تۇرىنەن 104 سپورتشى قورعايدى.