ءبىلىم بەرۋ گرانتتارىن ءبولۋ جونىندەگى رەسپۋبليكالىق كونكۋرستىق كوميسسيا جۇمىسىن اياقتاپ، بۇگىن 2016 جىلعى گرانت يەلەرىنىڭ تولىق ءتىزىمى جاريالاندى.  2059 «التىن بەلگى» يەگەرىنىڭ 45ء-ى مەملەكەتتىك گرانتقا ىلىكپەگەنى بەلگىلى بولىپ وتىر، - دەپ حابارلايدى Qamshy.kz BNews.kz - كە سىلتەمە جاساپ.

«45 «التىن بەلگى» يەگەرى مەملەكەتتىك گرانت ەسەبىنەن ءبىلىم المايدى»، - دەپ حابارلادى ءبىلىم جانە عىلىم مينيسترلىگىنەن.

كەشە بەلگىلى بولعانداي، «التىن بەلگى» يەگەرلەرىنىڭ ءبارى بىردەي مەملەكەتتىك گرانت ەسەبىنەن وقي المايدى. جالپى، بيىل 2059 «التىن بەلگى» يەگەرى وقۋىن ەلىمىزدەگى ۋنيۆەرسيتەتتەردە جالعاستىرۋعا نيەت بىلدىرگەن.

«الايدا، ولاردىڭ دەنى باسەكەلەستىك دەڭگەيى جوعارى قارجى-ەكونوميكالىق نەمەسە الەۋمەتتىك-گۋمانيتارلىق باعىتتاعى ماماندىقتاردى تاڭداپ الىپ وتىر. كوپشىلىك ەلىمىزدە سوڭعى جىلدارى ندۋستريالىق-يننوۆاسيالىق دامۋ باسىمدىقتارىنا كوپ كوڭىل ءبولىنىپ جاتقانىن ەسكەرمەي كەلەدى. بيىل دا مەملەكەتتىك گرانتتاردىڭ كوپ بولىگى اتالعان باسىمدىقتاردى جۇزەگە اسىرۋدى كوزدەپ، ەڭبەك نارىعىنىڭ قاجەتتىلىكتەرىنە باعىتتالدى»، - دەيدى مينيسترلىكتەگىلەر.

ەندىگى ۋاقىتتا جوعارى وقۋ ورىندارىنىڭ باسشىلىعىمەن بىرلەسىپ، مەملەكەتتىك گرانتتان قاعىلعان «التىن بەلگى» يەگەرلەرىنىڭ ءىسى جەكە-جەكە زەردەلەنىپ، ولاردىڭ جوو قاراجاتى ەسەبىنەن ءبىلىم الۋ مۇمكىندىگى قاراستىرىلماق.

ءبىلىم بەرۋ گرانتتارىن ءبولۋ جونىندەگى رەسپۋبليكالىق كونكۋرستىق كوميسسيانىڭ مۇشەسى، ل.گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆتىڭ ايتۋىنشا، مەملەكەتتتىك گرانتقا ىلىكپەگەن «التىن بەلگى» يەگەرلەرىن جوعارى وقۋ ورىندارى تەگىن وقىتۋعا مىندەتتى ەمەس. مەكتەپتى ۇزدىك بىتىرگەن، ءبىراق ماماندىقتى دۇرىس تاڭداماعان جاستاردى ۋنيۆەرسيتەتتەر قارجىلىق مۇمكىندىگىنە قاراي قابىلدايدى.

«التىن بەلگi» يەگەرلەرiن وقۋعا قابىلداۋعا ۋنيۆەرسيتەتتەر مۇددەلi. ويتكەنi، نەعۇرلىم تالانتتى جاستار كوبiرەك كەلسە، سوعۇرلىم ۋنيۆەرسيتەتتiڭ دە كورسەتكiشتەرi جوعارى بولادى. ءبىز مەملەكەتتiك گرانت بۇيىرماعان تالاپكەرلەردi  قابىلداي الامىز. بiراق، ولاردى وقىتۋ ءۇشiن جوعارى وقۋ ورنىنىڭ اقشالاي پايداسى بولۋى كەرەك. بۇل قاراجاتتى باقىلاۋ كەڭەستەرi بولەدi. ەڭ بiرiنشi كەزەكتە، الەۋمەتتiك ءالسiز قورعالعان وتباسىلاردىڭ بالالارىنا قولداۋ كورسەتiلەدi. بۇدان بولەك، مۇگەدەك جاستاردىڭ وقۋىنىڭ اقىسىن ازايتۋعا جۇمسالادى. ەگەر قاراجات قالسا «التىن بەلگi» يەگەرلەرi، وليمپيادا جەڭiمپازدارى، دارىندى بالالاردى وقىتۋعا قاراستىرىلادى. بۇل تەك رەكتور شەشەتiن ماسەلە ەمەس، قاراجاتتى باقىلاۋ كەڭەستەرi بولەدi. ال ەگەر ۋنيۆەرسيتەتتiڭ تابىسى بولماسا، وندا گرانتقا iلiكپەگەندەردi وقۋ ورنىنىڭ ەسەبiنەن وقىتۋ مۇمكiن ەمەس»، - دەيدى ەۋرازيا ۇلتتىق ۋنيۆەرسيتەتىنىڭ رەكتورى.

ايتا كەتەيىك، بۇگىن 2016 جىلعى گرانت يەلەرىنىڭ تولىق ءتىزىمى جاريالاندى.

ەستەرىڭىزگە سالىپ وتسەك، بيىل جالپى 31 مىڭ 702 گرانت ءبولىندى. ونىڭ 2950ء-ى جوعارى وقۋ ورىندارىنىڭ دايىندىق بولىمدەرىنە ءبىلىم الۋعا، 28 752 گرانت ءبىرىنشى كۋرسقا قابىلداۋعا بولىنگەن (كۇندىزگى وقۋ – 28 452، سىرتتاي وقۋ – 300 گرانت). تەحنيكالىق جانە تەحنولوگيالىق ماماندىقتارعا – 12 593، پەداگوگيكالىق ماماندىقتارعا 5 مىڭ، اۋىل شارۋاشىلىعى جانە مال دارىگەرلىك ماماندىقتارىنا 2 690 ، مەديسينالىق ماماندىقتارعا 3 مىڭ گرانت بولىنگەن.+

ءبىلىم گرانتتارىن ۇلەستىرۋ كونكۋرسىنا جالپى 59 677 ادام قاتىستى. ولاردىڭ 47 342ء-سى قازاق تىلىندە، ال 12 335ء-ى ورىس تىلىندە ءبىلىم الاتىندار. «ماڭگىلىك ەل جاستارى - يندۋسترياعا!» جوباسىنىڭ اياسىندا كۆوتا بويىنشا كونكۋرسقا 9 797 ادام قاتىستى.