بۇگىن مەملەكەتتىك گرانتقا ىلىنگەن تۇلەكتەردىڭ قۋانىشىندا شەك جوق شىعار، ءيا؟! ولاردىڭ اكە-شەشەسى مەن تۋىستارى دا تويلاتىپ جاتقان بولار؟ دۇرىس-اق. قۇتتى بولسىن! جاقسى وقىسىن! اتا-اناسى مەن ۇستازدارىنىڭ ءۇمىتىن اقتاسىن! 

ءبىراق، ءبىز وسى «وقۋعا تۇسسە بولدى» دەپ ءجۇرىپ ماماندىق تاڭداۋ ماسەلەسىنە جەتكىلىكتى كوڭىل بولدىك پە؟ بالامىزدىڭ قىزىعۋشىلىعى مەن نەگە قابىلەتى بارىن ەسكەردىك پە؟ بەسىنشى ءپان مەن وقۋ ورنىن تاڭداۋدان بۇرىن نەگە ەبى بارىن انىقتاي الدىق پا؟ ولاي بولماعان جاعدايدا وقۋعا تۇسكەنى بەكەر بوپ شىعادى. 

سەنبەسەڭىزدەر، اينالاڭىزداعى جاستاردىڭ ومىرىنە زەرتتەۋ جاساپ كورىڭىزشى: ەلىمىزدەگى ءاربىر ەكىنشى جاس (اۋىلدىق جەردە ۇشتەن ەكىسى) وقۋىنا تۇك قاتىسى جوق سالادا ءناپاقالارىن تاۋىپ ءجۇر. جۇمىس تابا الماي جۇرگەندەرى قانشاما؟! سول ماماندىق تاڭداۋ كەزىندە جىبەرىلگەن قاتەلىكتىڭ كەسىرى... 

ءبىر ماماندى دايارلاۋعا مەملەكەت قازىناسىنان كەمىندە 2-3 ميلليون تەڭگە بولىنەدى. وعان اتا-اناسىنىڭ موينىنداعى تاماعى، كيىمى، ءجۇرىس-تۇرىسىنا كەتەتىن قارجىسىن قوسىڭىز. اقشانى قويشى دەگەن كۇننىڭ وزىندە ناعىز ۇيرەنەتىن، ءبىلىم نارىنە سۋسىندايتىن جاستىق جالىنعا تولى ءتورت جىل ۋاقىتتى ايتساڭىزشى!.. 

پىسى. قوجاناسىر بالاسىن كورشىسىنىڭ ۇيىنە ىدىسقا جۇمساپ تۇرىپ: «سىندىرىپ الما»، –دەپ جەلكەسىنەن ءتۇيىپ قالىپتى. –ءوي، مۇنىڭ نە؟ ول ىدىستى سىندىرعان جوق عوي، دەگەن ايەلىنە قوجەكەڭ: سىندىرعان سوڭ كەش بولادى دەگەن ەكەن))). ەرتەرەك جازىلۋى ءتيىس پوست ەدى. «ەشتەن كەش جاقسى». ماماندىققا قاتىستى ءالى تالاي دۇنيەمەن باستارىڭىزدى قاتىرامىن. ءبىز ءارقايسىمىز مىقتى مامان بولعاندا عانا ەلىمىز وسەدى، وركەندەيدى، داميدى. ايتپەسە...

بەيسەن قۇرانبەكتىڭ فەيسبۋكتەگى پاراقشاسىنان الىندى