قازىنالى قاراعاندى 15 ءساۋىر كۇنى عاشىقتار كۇنىن تويلاماق.
قوزى كورپەش-بايان سۇلۋ كۇنىنە وراي قاراعاندى قالاسىندا «سەزىم دەگەن – وي مەن سانا بيىگىندە ءتۇيىسۋ» اتتى كونسەرت وتكىزىلمەك. شارا بارىسىندا «سەزىم حاتى»، «ەڭ ۇزدىك جۇپ» فوتو-بايقاۋى ۇيىمداستىرىلعان. قاراعاندىلىق جاستار وزدەرىنىڭ عاشىقتارىنا جازعان حاتتارىن جانە سۇيىكتىلەرىمەن بىرگە تۇسكەن سۋرەتتەرىن جولداۋدا. جەڭىمپازدار 15 ءساۋىر كۇنى وتەتىن گالا-كونسەرتتە باعالى سىيلىقتارمەن ماراپاتتالاتىن بولادى.
وسىدان بىرنەشە جىل بۇرىن ۇلتتىق رۋحى بيىك جاستار اۋليە ۆالەنتين كۇنىن تويلاۋعا توسقاۋىل قويىپ، وعان بالاما رەتىندە ماحابباتتىڭ سيمۆولىنا اينالعان قوزى مەن بايان مەرەكەسىن اتاپ ءوتۋدى قولعا الا باستادى. سودان بەرى جاستار بويىندا ەلجاندىلىق سەزىمىن ارتتىرۋ، ۇلى سەزىم – ماحابباتتى اسقاقتاتۋ ماقساتىندا قاراعاندى قالاسى عاشىقتار كۇنىن اتاپ ءوتۋدى يگى داستۇرگە اينالدىرعان. بۇل شارا «قاراعاندى – ورىستانعان مەكەن» دەگەن جانساق پىكىردەن ارىلۋ كەرەكتىگىن تاعى ءبىر مارتە دالەلدەيتىندەي. ەستەرىڭىزگە سالا كەتەتىن بولساق، بۇل مەرەكەنى اتاپ ءوتۋدى ءبىرىنشى بولىپ رەسپۋبليكا كولەمىندە وڭتۇستىك قازاقستان وبلىسىندا 1999 جىلى قوعام جانە مەملەكەت قايراتكەرى، قازىرگى قازاقستان رەسپۋبليكاسى ۇلتتىق مۇراجايىنىڭ ديرەكتورى دارحان مىڭباي ۇسىنعان ەدى. ال قاراعاندى قالاسىندا العاش رەت عاشىقتار كۇنى بەلگىلى جۋرناليست، ساتيريك مارقۇم مارتبەك توقمىرزانىڭ مۇرىندىق بولۋىمەن تويلاندى. سودان باستاپ رەسمي نەگىزدە ەشقايدا جازىلماعان اتالمىش مەيرام جىل سايىن ءداستۇرلى تۇردە مەرەكەلەنۋدە.
