سەرەبريانسك قالاشىعىندا ورنالاسقان جيەكتاس شىعارۋشى زاۋىت قازىرگى كۇندە ساپالى ونىمدەرىمەن ايماققا تانىلىپ كەلەدى. «بيزنەستىڭ جول كارتاسى – 2020» باعدارلاماسى اياسىندا بىرەر جىل بۇرىن اشىلعان كاسىپورىندا يراندىق زاماناۋي تەحنيكالارمەن جابدىقتالعان.

بۇگىنگە دەيىن جوبانى تولىقتاي جەتىلدىرۋ ءۇشىن 9 ملن تەڭگە قاراجات جۇمسالعان. جاڭا ءوندىرىس وشاعى جيەكتاس جانە تاقتايشالاردىڭ جيىرمادان استام ءتۇرىن شىعارىپ كەلەدى. ال يراندىق رەزينالىق قالىپتارعا قۇيىلعان تاقتايشالاردى وڭدەۋ وڭاي جانە ساپاسى جوعارى بولىپ شىعادى.

–  2014 جىلى كاسىبىمىزدى باستاساق تا، ءار جىل سايىن جاڭاشىلدىق ەنگىزىپ، جاڭا سەرپىنمەن كىرىسىپ كەلەمىز. ءقازىردىڭ وزىندە سەرەبريانوۆسك قالاسىن تولىقتاي جيەكتاستارمەن قامتاماسىز ەتىپ وتىرمىز. ال ورتالىق الاڭدى ءتۇرلى بەدەرلى تاقتايشامەن قورشاپ شىعۋ دەگەن ءبىز ءۇشىن كوپ جۇمىس ەمەس. تەك تاپسىرىس بولسا بولعانى، كەز كەلگەن كولەمدى قىسقا ۋاقىتتا ساپالى ەتىپ ازىرلەپ بەرەمىز، – دەدى كاسىپورىن ديرەكتورى سالتانات سۇڭعاتوۆا.

سونداي-اق، جۋىردا جيەكتاستارمەن قاتار، سەمەنتتەن قۇيىلعان قورشاۋلار شىعارۋ دا قولعا الىنعان. ساپاسى جوعارى بولىپ كەلەتىن جيەكتاستار مەن قورشاۋلاردىڭ تاعى ءبىر ەرەكشەلىگى، باعاسى جەرگىلىكتى تۇرعىندار ءۇشىن ءتيىمدى.

ايتا كەتسەك، زىريان اۋدانىندا ەلباسىنىڭ 5 ينستيتۋسيونالدى رەفورماسىنىڭ ءىىى باعىتى «يندۋستريالاندىرۋ جانە ەكونوميكالىق ءوسىم» باعىتى بويىنشا 2016-2020 جىلدار ارالىعىندا 6 باعىت بويىنشا ەكونوميكانى جەتىلدىرۋشى 65 جوبا قۇرىلعان. ال جىل باسىنان بەرى اۋداننىڭ وزىندە 282 شاعىن كاسىپ كوزى تىركەلگەن.