بۇۇ الەپپوعا گۋمانيتارلىق كومەكتى جەتكىزۋگە ارنالعان  ءۇش ساعاتتىق «تىنىشتىقتى» جەتكىلىكسىز دەپ سانايدى. بۇل تۋرالى حالىقارالىق ۇيىمنىڭ «جاڭالىقتار ورتالىعى» حابارلايدى. بۇۇ-نىڭ سيريا جونىندەگى ارنايى وكىلى ستاففان دە ميستۋرا پەن ونىڭ گۋمانيتارلىق ىستەرگە جاۋاپتى كومەكشىسى يان ەگەلانن  الەپپوعا  گۋمانيتارلىق كومەكتى جەتكىزۋگە جانە قالادان جارالانعاندار مەن ناۋقاستاردى شىعارۋعا ءۇش ساعاتتىق «تىنىشتىق» ازدىق ەتەتىندىگىن مالىمدەدى. ولار بۇۇ-نىڭ اتالمىش ەلدى مەكەندە «گۋمانيتارلىق ءۇزىلىستى» اپتاسىنا 48 ساعات كولەمىندە ورناتۋدى ۇسىندى. ستاففان دە ميستۋرا سيرياداعى قارۋلى قاقتىعىستاردىڭ جالعاسۋىنا الاڭداۋلى ەكەنىن جەتكىزدى. بۇۇ-نىڭ ارنايى وكىلىنىڭ ويىنشا، بۇل قاقتىعىستار سيريا  شيەلەنىسىن اسكەري جولمەن شەشۋگە بولمايتىندىعىن تاعى دا دالەلدەپ وتىر.

بۇۇ-نىڭ ارنايى وكىلىنىڭ مالىمدەۋىنشە، بۇگىندە جەنيەۆادا اقش پەن رەسەي وكىلدەرى اراسىندا «گۋمانيتارلىق ۇزىلىسكە» قاتىستى كەڭەس وتۋدە. ستاففان دە ميستۋرا مەن يان ەگەلانن الەپپوعا كومەك كورسەتۋ ماقساتىمەن باراتىن گۋمانيتارلىق ۇيىمداردىڭ قىزمەتكەرلەرى مەن جۇك كولىكتەرى قالاعا جەتىپ، ودان امان-ەسەن شىعۋى ءۇشىن اپتاسىنا 48 ساعاتتىق قاجەت ەكەندىگىن اتاپ ايتتى. سونداي-اق بۇۇ وكىلى جولى بۇزىلعان ايماقتان كومەك جۇگى تيەلگەن اۆتوكولىكتەردىڭ ءجۇرۋى ءۇشىن دە ءۇش ساعات ۋاقىت ازدىق ەتەتىندىگىن اشىپ ايتتى. بۇگىندە بۇۇ الەپپوعا گۋمانيتارلىق جۇكتەردى تۇركيا ارقىلى تاسۋدا.