جەر كوميسسياسىنىڭ استانادا ءوتىپ جاتقان بۇگىنگى وتىرىسىندا كوميسسيا مۇشەسى داۋرەن بابامۇراتوۆ اۋىل شارۋاشىلىعى جەرلەرىن شەتەلدىكتەرگە جالعا بەرۋ مەن ەل ازاماتتارىنا جەكە مەنشىككە ساتۋعا قويىلعان ءموراتورييدى تاعى بەس جىلعا ۇزارتۋ تۋرالى ۇسىنىستى قولدادى، - دەپ حابارلايدى Qamshy.kz.
«قالىپتاسقان جاعدايدا ەڭ ۇتىمدى شەشىم وسى بولسا كەرەك. سوندىقتان بۇل – حالىقتىڭ جەڭىسى، ەلدىڭ جەڭىسى. بۇرىن كوتەرىلىپ جۇرگەن باستى ماسەلەلەر وسى ەدى. ءۇش ايدىڭ ىشىندە ءبىز ەكى تاراپتىڭ دا كوزقاراسىن تىڭدادىق»، - دەپ اتاپ ءوتتى داۋرەن بابامۇراتوۆ.
ونىڭ پىكىرىنشە، ورتاق شەشىم قابىلداۋ ءۇشىن ۋاقىت كەرەك ەكەنى ءسوزسىز.
«سوندىقتان مەن ءموراتورييدى قولدايمىن. ال ەندى، ءبىر ايدىڭ ىشىندە كوميسسيا قۇرامى ونداعان، ودان دا كوپ ءتاپ-تاۋىر ۇسىنىس ايتتى. ول ۇسىنىستاردىڭ تاعدىرى نە بولادى؟ وسى ۇسىنىستاردىڭ ۇتىمدى بولۋىن، دۇرىس جۇيەگە اسۋىن، ارى قاراي دۇرىس وڭدەلۋىن، جوندەلۋىن كىم قاداعالايدى، كىم باقىلايدى؟ ءبىزدىڭ وسىنداي مىنبەردەن تاعى سويلەۋگە مۇمكىندىگىمىز بولا ما؟ وسى سۇراقتار مەن ءۇشىن وتە ماڭىزدى. ەندى، ماراتوريي جاريالاعاننان كەيىن كوميسسيا جۇمىسى توقتايتىنى ايدان انىق. ول دۇرىس تا شىعار. ءبىراق تا كوميسسيانىڭ شەشىمدەرىن باقىلايتىن، ىسكە اسىراتىن، قاراپ وتىراتىن قوسىمشا ءبىر ورگان نەمەسە تاعى ءبىر كوميسسيا قۇرىلۋى قاجەت ەكەنى ءسوزسىز. مەن ءماراتورييدى قولدايمىن»، - دەپ تۇيىندەدى كوميسسيا مۇشەسى.
ەستەرىڭىزگە سالا كەتەيىك، جەر رەفورماسى جونىندەگى كوميسسيانىڭ بۇگىنگى وتىرىسىندا ق ر پرەمەر-مينيسترىنىڭ ورىنباسارى، اۋىل شارۋاشىلىعى ءمينيسترى، كوميسسيا ءتوراعاسى اسقار مىرزاحمەتوۆ جەر كودەكسىنىڭ كەيبىر باپتارىنا ەنگىزىلگەن ءموراتورييدى بەس جىلعا، ياعني، 2021 جىلدىڭ 31 جەلتوقسانىنا دەيىن ۇزارتۋدى ۇسىنعان بولاتىن.
