بۇگىن استانادا جەر رەفورماسى بويىنشا كوميسسيانىڭ كەزەكتى وتىرىسىندا وسى باعىتتاعى بۇعان دەيىنگى اتقارىلعان جۇمىستار ەكشەلىپ، ناقتى ۇسىنىستار جاسالدى. سونداي سالماقتالىپ، سارالانعان ۇسىنىمنىڭ ءبىرى – اۋىل شارۋاشىلىعى جەرلەرىن قازاقستان رەسپۋبليكاسى جەكە جانە زاڭدى تۇلعالارىنا 49 جىلعا دەيىنگى مەرزىمگە جالعا بەرۋ ينستيتۋتىن ساقتاپ قالۋ ماسەلەسى بولدى، - دەپ حابارلايدى Qamshy.kz.

اتاپ ايتقاندا، تۇراقتى مونيتورينگ جۇرگىزۋ ارقىلى جەر پايدالانۋشىلارىنىڭ جەردى ۇتىمدى پايدالانۋىنا جانە وزىنە بەرىلگەن مىندەتتەمەلەردى ورىنداۋىنا باقىلاۋدى كۇشەيتۋ. ياعني، جالعا الۋدىڭ العاشقى 5 جىلىندا – جىل سايىن، ودان كەيىنگى كەزەڭدەردە سۋارمالى ەگىستىكتەردە ءار 3 جىل سايىن، ءتالىمى جەرلەردە ءار 5 جىل سايىن مونيتورينگىلەۋ ۇسىنىلىپ وتىر.

سونىمەن قاتار، جەر كودەكسىندە اۋىل شارۋاشىلىعى جەرلەرىن بەرۋدىڭ جەكە جانە ەگجەي-تەگجەيلى رەگلامەنتتەيتىن ءتارتىبىن بەلگىلەۋ، اۋىل شارۋاشىلىعى جەرلەرىن بەرۋ جونىندەگى كونكۋرستاردىڭ اشىقتىعىن قامتاماسىز ەتۋ ءۇشىن كونكۋرس كوميسسياسىنىڭ قۇرامىنا قوعامدىق كەڭەستەر مەن بىرلەستىكتەردىڭ وكىلدەرىن قوسۋ، اكىمدىكتەردىڭ اۋىل شارۋاشىلىعى جەرلەرىن بەرۋ جونىندەگى ناقتى ءىس-قيمىلدارى ءتارتىبىن بەلگىلەيتىن كونكۋرس وتكىزۋ قاعيدالارىن ازىرلەۋ ورتاعا تاستالدى. 

جالعا بەرۋ مەرزىمىن بيزنەس-جوسپارعا سايكەس ينۆەستيسيالار كولەمىنە قاراي ايقىنداۋ، ونىڭ ىشىندە، جالداۋ مەرزىمىن ۇزارتۋ تۋرالى شەشىمدى قوعامدىق كەڭەستەر مەن بىرلەستىكتەردىڭ قاتىسۋىمەن، جەردى پايدالانۋ مونيتورينگىنىڭ جانە جالداۋ شارتىنىڭ تالاپتارىن تيىسىنشە ورىندالۋىنىڭ ناتيجەلەرى بويىنشا قابىلداۋ قاجەتتىلىگىن ايقىنداۋ، جەر پايدالانۋشىلاردىڭ مىندەتتەرى مەن جاۋاپكەرشىلىگىن ناقتىلاي جانە كۇشەيتە وتىرىپ، اۋىل شارۋاشىلىعى جەرلەرىن جالعا بەرۋدىڭ ۇلگىلىك شارتىن ازىرلەپ بەكىتۋ، اۋىل شارۋاشىلىعى جەرلەرىن ءتيىمدى پايدالانۋدىڭ تالاپتارىن كۇشەيتۋ ماسەلەلەرى دە اتاپ ءوتىلدى.

ايتا كەتەيىك، بۇگىنگى كۇنگە دەيىن كوميسسيامەن 4 وتىرىس جانە اقمولا، الماتى، قىزىلوردا جانە اتىراۋ وبلىستارى تۇرعىندارىمەن 4 كەزدەسۋ وتكىزىلدى. قوعامنىڭ قىزۋ تالقىسىنا تۇسكەن ماسەلەلەر بويىنشا كوميسسيا ءتيىمدى جۇمىستار اتقارىپ، حالىقپەن قولداۋ تاپقان ۇسىنىستار ەنگىزىلدى.