تانيدزاكي دجيۋنيچيروۋ
جاپون جازۋشىسى
(1886-1965)
بۇل پەندەلەر ناداندىقتى بيىك پاراساتقا بالاپ، دۇنيە قازىرگىدەي قاتىگەزدىكتەن قاجالماعان كەزدە بولىپتى. بەك باعلانداردىڭ قامسىز ءجۇزىن مۇڭ بۇركەمەگەن، سارايداعى بيكەشتەر مەن گەيشالاردىڭ كۇلكىسى تاۋسىلماسىن دەپ، شەشەنسىماق، قىلجاقباستار، ولاردىڭ شادىمان تىرلىگى ءۇشىن ەڭبەك ەتكەن، دۇنيەدە ەركىندىك بيلىك قۇرعان كەزەڭ ەكەن. ساداكۋرو، دجيرايا، نارۋكامي سياقتى داڭقتى قاھارماندار تەاتر ساحنالارى مەن سۋرەتتى رومانداردا ايەل بەينەسىندە كورىنىپ، سۇلۋلار مىقتى بوپ، كورىكسىزدەر ءالسىز سانالدى. پەندەلەر ادەمى كورىنۋ ءۇشىن بارىنە دايىن، ءتاڭىر سىيلاعان ءتانىن جۋساڭ دا كەتپەيتىن سۇيىقتىقپەن سىلاۋعا دا باردى. جارقىراعان سىزىق پەن بوياۋ سول كەزدەگى كىسىلەردىڭ تەرىسىندە ويناق سالدى.
ول ۋاقىتتا جولاۋشىلار تاڭداپ تۇرىپ تانىنە عالامات سۋرەت سالدىرعان جۇك تاسۋشىنىڭ كۇيمەسىنە عانا مىنەتىن. يوشيۆارا مەن ءتاسۋميدىڭ بيكەشتەرى ءتانىن تاڭبالاتقان جىگىتتەرگە عاشىق بولدى. قۇمار ويىنشىلار، ءورت سوندىرۋشىلەردەن باستاپ اۋقاتتى قالالىقتار مەن سامۋرايلارعا دەيىن دەنەسىن ويۋلاتتى. اندا-ساندا ريوۋگوكۋدە ءتان بوياۋشىلاردىڭ جيىنى ءوتىپ، قاتىسۋشىلار ءبىر-بىرىنىڭ ارقاسىنان قاعىپ، مۇسىندەرىنىڭ تاڭعاجايىپ بەزەندىرىلگەنىن ايتىسىپ، ارقا-جارقا بولاتىن.
سەيكيچي دەگەن قولى قۇتتى جاس ءتان بەزەندىرۋشى بار ەدى. اساكۋسانىڭ چياريبۋنى مەن ءماسۋشيماماچيدىڭ ياسۋحەي، كونكوندزيروۋى سياقتى شەبەرلەرىنەن كەم تۇسپەيتىن داڭقتى، تالاي جاننىڭ ءتانى ونىڭ قىلقالامىنىڭ استىنا جىبەك ءتارىزدى توسەلگەن. ءتان بەزەندىرۋشىلەردىڭ جيىنىندا ماقتاۋ العان تۋىندىلار ونىڭ قولىنان شىققان. دارۋماكين گراداسيالىق وڭدەۋدىڭ شەبەرى بولسا، كاراكۋساگونتا قىزىل مينەرال جارقىلىمەن، ال سەيكيچي باتىل سۋرەت، كوركەم سىزىقتارىمەن تانىلدى.
تويوكۋني مەن كۋنيسادانىڭ ۋكييوە كوركەمسۋرەت مەكتەبىنەن وتكەن سەيكيچي كاسىبىن ءتان بوياۋشىلىققا اۋىستىرعانمەن تاجىريبەسى ونىڭ عاجايىپ شەبەرلىگى مەن سەزىمتالدىعىنان كورىندى. جۇرەگىن جاۋلايتىنداي سۇلۋ ءمۇسىن بولماسا شەبەردى ەشتەڭە كوندىرە المايتىن. كەيدە كەلۋشىلەر شەبەردىڭ سۋرەت پەن باعاعا قاتىستى كوزقاراسىمەن كەلىسۋگە ءماجبۇر بولاتىن، سودان سوڭ ءبىر اي، ءتىپتى ەكى اي بويى ينە ازابىنا ءتوزۋى كەرەك-تى.
جاس شەبەردىڭ جۇرەگىندە ەشكىم بىلمەيتىن ىڭكار سەزىم مەن جاسىرىن قيال بار ەدى. كىسىلەردىڭ تەرىسىنە ينەنى سۇققان كەزدە قىپ-قىزىل بوپ ىسىنگەن دەنەنىڭ دىرىلىنەن ءلاززات الاتىن، ەركەكتەر ىڭىرانعاندا، قينالىسى نەعۇرلىم كۇشەيگەن سايىن سەيكيچي سوعۇرلىم راحاتتاناتىن. سۋرەتتى وڭدەۋ مەن قىپ-قىزىل مينەرال بوياۋدى ءسىڭىرۋ سياقتى ەڭ ازاپتى ساتتەر وعان ۇلكەن راحات سىيلايتىن. كۇنىنە شامامەن بەس-التى ءجۇز تال ينەنى قابىلداپ، بوياۋى ءسىڭۋ ءۇشىن ىستىق سۋعا ءتۇسىپ شىققان ادامدار ءولىمشى حالدە سەيكيچيدىڭ اياعىنىڭ استىنا قۇلاعان كۇيى قيمىلسىز قالاتىن. بۇنداي ايانىشتى كورىنىسكە سەيكيچي سالقىنقاندى قاراپ تۇرىپ: «شىنىمەن دە اۋىرادى، ءا؟!» دەيتىن كۇلىمسىرەگەن كۇيى.
شىدامى جەتپەگەن ەركەكتەر ءجانتاسىلىم الدىنداعى ازاپقا تۇسكەندەي ءتىسىن شىقىرلاتىپ، ىڭىرانسا شەبەر: «ەدو (توكيو) ۇلى ەمەسسىڭ بە؟ شىدا. سەن بار بولعانى ينەنىڭ ءالسىز سۇعىلعانىن عانا سەزىندىڭ» دەپ، مونشاقتاعان جاسى ءجۇزىن جۋعان ادامعا كوزىنىڭ قيىعىمەن قاراپ، ينەسىن سۇققىلاي بەرەتىن. ءتوزىمدى جان بار كۇشىن جيناپ، قاباعىن شىتپاستان شىداپ باقسا «قاسارىسىپ قالعان نەمە ەكەنسىڭ ءوزىڭ. ءقازىر كورەسىنى كورەسىڭ. ەندى توزە الماستاي ەتەمىن» دەپ، اپپاق تىستەرىن اقسيتىپ كۇلۋشى ەدى.
شەبەردىڭ ارمانى عاجايىپ ايەل ءتانىن تاۋىپ، وعان ءوزىنىڭ جان دۇنيەسىن ورنەكتەۋ بولدى. ول ءۇشىن سۇلۋ ءجۇز بەن كوركەم ءمۇسىن عانا ەمەس، ايەلدىڭ مىنەزى دە وتە ماڭىزدى. شەبەر ەدونىڭ ءتۇرلى-تۇستى اۋداندارىنىڭ اتاقتى سۇلۋلارىن تۇگەل زەردەلەپ شىققانمەن، كوڭىلىنە ۇناعانى تابىلمادى. ءالى كورمەگەن جاننىڭ كەلبەتىن جۇرەگىندە ورنەكتەپ، ءۇش –ءتورت جىلىن بوس قيالمەن وتكىزسە دە، ويىنداعى ارمانىن تاستامادى.
تۋرا ءتورتىنشى جىلدىڭ جازىندا فۋكاگاۆانىڭ حيراسەي مەيرامحاناسىنىڭ ماڭىنان ءوتىپ بارا جاتىپ، سۋرەتشى داربازا الدىندا تۇرعان كۇيمەدەگى ارۋدىڭ اپپاق اياعىن بايقاپ قالدى. سۋرەتشىنىڭ وتكىر كوزىنە ادامنىڭ اياعى ونىڭ ءجۇزى سياقتى تالاي نارسەنى اڭعارتقان-دى. بيكەشتىڭ بالتىرىنان وتكەن اسىل جوق ەدى شەبەر ءۇشىن. تىزىلگەن نازىك ساۋساقتار، ەنوشيما جاعالاۋىنداعى مەرۋەرت قابىرشاقتار سياقتى، ءىنجۋ مارجانعا بالاعان جۇمىر وكشە، تاۋداعى كاۋسار تابانىن جۋعانداي جىلتىر تەرى. بۇل ەركەكتەردىڭ قانىن كەشىپ، ءمايىتىن باسىپ وتەتىن اياق قوي. وسى اياقتىڭ يەسىن سۋرەتشى ۇزاق جىل ىزدەگەن. ناعىز حاس سۇلۋ دەپ ويلادى ول.
سەيكيچي جۇرەك ءدۇرسىلىن باسىپ، بەيتانىستىڭ ءجۇزىن كورمەككە كۇيمەنىڭ ءىزىن قۋعانمەن، ەكى-ۇش بۇرىلىستان سوڭ كولەڭكە كوزدەن تاسا بولدى.
سەيكيچيدىڭ سەزىمى عالامات عاشىقتىققا ۇلاسىپ، جىل ءوتتى. بەسىنشى جىلدىڭ كوكتەمگى تاڭى. سۋرەتشى فۋكاگاۆانىڭ ساگا اۋدانىنداعى قونىسىندا ءتىس تازالاعىشىن تىستەپ، قۇمىراداعى وموتو گۇلىن تاماشالاپ تۇرعاندا، باقتاعى شارباق قالقاسىنان ءبىر قىز كورىندى. سەيكيچي ايداھار ءھام جىلانمەن ورنەكتەلگەن حاوريگە (كيمونو سىرتىنان كيەتىن كيىم ءتۇرى) قاراپ، تانىس گەيشا جىبەرگەن بولار دەپ ءتۇيدى.
«اپكەمىز بۇل ءحاوريدى سىزگە بەرىپ جىبەردى، ارقاسىنا ءبىر سۋرەت سالىپ بەرۋىڭىزدى سۇرايدى...» دەپ، بويجەتكەن زاپرانگۇل ءتۇستى فۋروشيكي وراۋىن اشىپ، ىشىنەن ءارتىس يۆاي تودجياكۋدىڭ سۋرەتى بەينەلەنگەن قالىڭ قاعازعا ورالعان ايەلدىڭ جىبەك كيمونوسى مەن حاتتى شىعاردى. حات يەسى حاوريگە قاتىستى ءوتىنىش جازىپتى، سوڭىندا حاتتى جەتكىزگەن بويجەتكەن جاقىندا گەيشا بولاتىنىن، ءوزىنىڭ «ءسىڭلىسى» رەتىندە قول استىنا وتەتىنىن ايتادى دا، قىزعا وڭ كوزىمەن قاراۋدى وتىنەدى. «بۇرىن كورمەگەن سياقتىمىن، سوڭعى ۋاقىتتا بۇندا كەلمەدىڭ بە؟» دەدى، سەيكيچي قىزدىڭ مۇسىنىنەن كوزىن الماي. جاسى شامامەن ون التى، ون جەتىدە بولار دەپ ويلادى، ءبىراق قىزدىڭ جۇزىندە تولىمدى سۇلۋلىق بار ەدى، ايلار بويى ۋاقىتىن ساۋىق - سايران مەكەنىندە وتكىزىپ، تالاي ەركەكتىڭ جانىن ەلپىتكەن كوركەم ءمۇسىن. ول ەلدەگى بار بىلىق پەن بۇكىل بايلىق توعىسقان استانادا ءومىر ءسۇرىپ، وسى ورتادا وتكەن عاجاپ جىگىتتەر مەن قىلىمسىعان بويجەتكەندەردىڭ سيقىرلى تۋىندىسى ىسپەتتى ەدى. «سەن بىلتىر ماۋسىمدا حيراسەي جاقتان كۇيمەمەن قايتپاپ پا ەدىڭ؟» دەدى، سەيكيچي قىزدى دالىزگە وتىرعىزىپ، بينگو ءسانداليىن كيگەن نازىك اياعىنا باجايلاي قاراپ. «ءيا، ول كەزدە اكەم ءتىرى بولاتىن، حيراسەيگە مەنى ءجيى اپاراتىن» دەپ، قىز استارلى سۇراققا كۇلىمسىرەي جاۋاپ قاتتى. «بەس جىل ءوتىپتى، سەنى كۇتكەنىمە. بۇگىن جۇزدەسسەم دە، اياعىڭ ەسىمدە قالىپتى. ساعان كورسەتەتىن ءبىر زاتىم بار، جوعارى كوتەرىلەيىك» دەپ، سەيكيچي قايتۋعا ىڭعايلانعان قىزدىڭ قولىنان تارتىپ، دارياعا قارايتىن ەكىنشى قاباتتاعى شەبەرحاناسىنا اپاردى. قوس ورام شىعارىپ، ءبىرىن قىزدىڭ الدىنا جايىپ سالدى. بۇل كونە چۋ يمپەراتورىنىڭ سۇيىكتىسى، جۇڭگو حانشايىمى بەينەلەنگەن سۋرەت ەدى. كارتيناداعى بيكەش ىنجۋ-مارجانمەن بەزەندىرىلگەن ءتاجدىڭ سالماعىن كوتەرە الماي، باليۋستراداعا سۇيەنىپ، مولىنان پىشىلگەن جىبەك كويلەگىنىڭ ەتەگى باسپالداقتان تومەن توگىلىپ، وڭ قولىنا جانان ۇستاپ، ساراي باعىنداعى قۇرباندىققا اكەلىنگەن ەركەككە قاراپ تۇر. اياق-قولى شىنجىرمەن ءتورت جاقتان تەمىر باعانعا بايلانعان، اقىرىن كۇتىپ، حانشايىمنىڭ الدىندا باسىن سالبىراتىپ، كوزىن جۇمعان ەركەك بەينەسى عاجاپ بەينەلەنىپتى.
بويجەتكەن كوركەم كارتينانى كورگەندە كوزى جايناپ، ەرىندەرى دىرىلدەپ كەتتى. سول ساتتە ونىڭ ءجۇزى كارتيناداعى حانشايىمنان اۋماي قالعان-دى. سۋرەتتەگى تىلسىم سىرلى «ءوزىن» تاپقانداي. «بۇل كارتينادا سەنىڭ جان-دۇنيەڭ كورىنىس تاپقان» دەدى، سەيكيچي كۇلىمسىرىگەن كۇيى بويجەتكەننىڭ كوزىنە قاراپ تۇرىپ.
«سونشالىقتى ۇرەيلى دۇنيەنى ماعان نەگە كورسەتتىڭىز؟» دەدى، بويجەتكەن كوكپەڭبەك بولعان ءجۇزىن سەيكيچيگە بۇرىپ. «بۇل سۋرەتتەگى بيكەش سەنسىڭ. ونىڭ قانى سەنىڭ بويىڭدا بار» دەدى دە، سۋرەتشى ەكىنشى ورامدى اشىپ جىبەردى. كارتينا «كوڭ» دەپ اتالادى ەكەن. سۋرەتتىڭ قاق ورتاسىندا جاس قىز ساكۋرانىڭ بۇتاعىنا سۇيەنىپ، اياعىنىڭ استىندا جاتقان سانسىز ەركەكتىڭ مايىتىنە قاراپ تۇر. قىزدى اينالا جەڭىس جىرىن جىرلاعان قۇستار ۇشىپ ءجۇر. كارتيناداعى قىزدىڭ كوزىندە تاككاپارلىق پەن شاتتىق ءتۇسى بەينەلەنىپتى. بۇل سوعىستان كەيىنگى كورىنىس پە، گۇلدى باقتاعى كوكتەم سۋرەتى مە ؟ كارتينانى كورگەن بويجەتكەن ءوز جۇرەگىندە جاسىرىن جاتقان ءبىر نارسە بارىن سەزدى.
«وسى كارتينادا سەنىڭ بولاشاعىڭ بەينەلەنگەن. ەركەك اتاۋلى بۇدان كەيىن سەن ءۇشىن ءومىرىن قياتىن بولادى» دەپ، سەيكيچي قىزدان اۋماي قالعان سۋرەتتەگى بيكەشتى نۇسقادى. «بەينەبىر كەلەسى ومىرىمدە دۇنيەگە كەلگەن (بۋددا ءدىنى بويىنشا ادام بىرنەشە رەت تۋىلادى ش.ج.) ءوزىمدى كورگەندەيمىن. تەزىرەك سۋرەتتى جابىڭىز» دەپ، قىز ورامنان تەرىس اينالدى دا تاتاميگە جايعاستى. سودان سوڭ «راسىندا ءوزىمدى سول سۋرەتتەگى ايەل سياقتى سەزىنەمىن. شىداۋ مۇمكىن ەمەس، الىپ تاستاڭىزشى» دەدى.
«جاقسىلاپ قاراساڭشى. ءقازىر قورقىنىشتى بولعانمەن ۇرەي سەزىمى وتپەلى عوي». سەيكيچيدىڭ جۇزىندە مىسقىل بار ەدى. قىز باسىن كوتەرمەدى. كيمونوسىنىڭ جەڭىمەن ءجۇزىن كولەگەيلەپ، «وتىنەمىن، مەنى بوساتىڭىز. ءسىزدىڭ قاسىڭىزدى بولۋعا قورقامىن» دەپ بىرنەشە رەت قايتالادى. «توقتاي تۇر. مەن سەنى عاجاپ ارۋعا اينالدىرامىن» دەپ، سەيكيچي قىزعا تاقادى. كيمونوسىنىڭ قوينىندا گوللانديالىق دارىگەردەن العان حلوروفورم تولى شيشا جاسىرىلعان ەدى.
كۇن ساۋلەسى وزەن بەتىنە تۇسكەندە سەگىز تاتامي كولەمدەگى شەبەرحانا ورتەنەردەي قىزدى. سۋ بەتىندە جۇزگەن ساۋلە قامسىز ۇيىقتاپ جاتقان قىزدىڭ جۇزىنە، ءشيودجيدىڭ (جاپون ۇيىندەگى بولمەارالىق ەسىك) قاعازىنا التىن تولقىندار تۋدىرىپ ءدىر-دىر ەتەدى. ەسىكتى جاۋىپ تاستاپ، ءتاندى ناقىشتايتىن قۇرالدارىن قولىنا العان سەيكيچي سول ساتتە تاپجىلماستان وتىرىپ قالدى. سۋرەتشى سول ساتتە العاش ايەل سۇلۋلىعىن سەزىندى. سۇلۋدىڭ جۇزىنە تەسىلگەن كۇيى ون، ءجۇز جىل بويى وسى بولمەدە وتىرسام دا قۇمارىم قانباس دەپ ويلادى. ەجەلگى مەمفيس تايپاسى مىسىر جەرىن پيراميدالار مەن سفينكستەرمەن بەزەندىرگەنى سياقتى سەيكيچي قىزدىڭ ءمىنسىز ءتانىن ماحابباتىمەن بوياماق ەدى.
سۋرەتشى سول قولىنىڭ شىناشاعى، اتسىز ساۋساعى مەن باس بارماعىنىڭ اراسىنا قىسقان قىلقالامىنىڭ ۇشىن قىزدىڭ ارقاسىنا تيگىزىپ، جوعارىدان باستاپ وڭ قولمەن ينە سالۋعا كوشتى. جاس ءتان بەزەندىرۋشىنىڭ جانى بوياۋمەن بىرگە ەرىپ، تەرىگە ءسىڭىپ جاتىر. سپيرت ارالاسقان ريۋكيۋ (جاپونيانىڭ وڭتۇستىك ولكەسى) قىزىل مينەرالىنىڭ ءار تامشىسى سۋرەتشى ءومىرىنىڭ تامشىسىنا اينالعانداي. سۋرەتشى بوياۋدان ءوز جۇرەگىنىڭ ءتۇسىن كوردى.
ءتۇس اۋىپ، كوكتەمنىڭ جايماشۋاق كۇنى باتۋعا تاقادى، سەيكيچيدىڭ قولى ءبىر ساتكە دە تىنعان جوق، ارۋدىڭ ۇيقىسى دا بۇزىلمادى. بويجەتكەننىڭ نەگە قايتپاعانىن بىلۋگە كەلگەن گەيشانىڭ وكىلىنە «ول قىز قايتىپ كەتكەن» دەپ قايتارىپ جىبەردى. اي وزەن جاعاسىنداعى ۇيلەرگە ساۋلەسىن ءتۇسىرىپ، ارعى بەتتەگى چيوشيۋ مەيرامحاناسى شاتىرىنىڭ ۇستىنە كوتەرىلسە دە، ءتان ناقىشتاۋ ءىسى جارتىسىنا دا جەتپەگەن ەدى. سەيكيچي شىراق جارىعىمەن جۇمىسىنا بەرىلگەن. ءاربىر تال سىزىقتى ءتۇسىرۋ سۋرەتشىگە وڭاي سوقپادى. ينەنى سۇعىپ، سۋىرعان سايىن تەرەڭ كۇرسىنىپ، سول ينە ءداپ ءبىر ءوزىنىڭ جۇرەگىنە قادالىپ جاتقانداي سەزىندى. ءبىرازدان سوڭ ينەنىڭ ءىزى ءداۋ دجيوروۋ ورمەكشىسىنىڭ پىشىنىنە يە بوپ، اسپان اعارعاندا جاۋىز قۇبىجىق سەگىز اياعىن سوزىپ، قىزدىڭ ارقاسىندا جايىلىپ جاتتى.
كوكتەم ءتۇنى جوعارى - تومەن جۇزگەن وزەندەگى قايىقتاردىڭ ەسكەگىنىڭ دىبىسىمەن اشىلىپ، تاڭعى جەلمەن جەلبىرەگەن اق جەلكەننەن سەيىلە باستاعان تۇمان ىشىندە ناكاسۋ، حاكودزاكي، ريوۋگان ارالدارىنداعى ۇيلەردىڭ شاتىرى كۇن ساۋلەسىمەن جارقىراعان شاقتا، سەيكيچي قىلقالامىن قويىپ، قىزدىڭ ارقاسىنا جابىسقان ورمەكشىنىڭ سۇلباسىنا كوز جۇگىرتتتى. سۋرەتشىنىڭ ءومىرى وسى سۋرەتتە ەدى. جۇمىسىن بىتىرگەن سۋرەتشىنىڭ جان-دۇنيەسى ءبىرتۇرلى بوساپ قالدى.
قوس كولەڭكە قوزعالىسسىز. ءبىر كەزدە سەيكيچيدىڭ قارلىققان باسەڭ ءۇنى ەستىلدى: «سەنى عاجاپ ارۋعا اينالدىرۋ ءۇشىن جانىمدى سالدىم، بۇدان بىلاي بۇكىل جاپونيادا سەنەن اسقان سۇلۋ بولماس. بويىڭداعى ۇرەيىڭ سەيىلدى. ەركەك اتاۋلى سەنىڭ اياعىڭنىڭ استىنداعى كوڭ...»
قىزدىڭ ەرنىنەن جىبەكتەي نازىك دىبىس شىقتى. ەسىن جيناي باستاعانداي. ءاربىر اۋىر تىنىستاعان سايىن ورمەكشىنىڭ اياقتارى بەينەبىر ءتىرى جاندىك ءتارىزدى جىبىرلاپ، قوزعالادى.
«قيىن-اۋ ساعان. ءتانىڭدى ورمەكشى قۇشىپ جاتىر». وسى ءسوز ايتىلعاندا قىز كوزىن اشتى. كوز اي جارىعىن مولايتقانداي، جارق-جۇرق ەتىپ، جىگىتتىڭ جۇزىنە ءتۇستى.
«ارقامداعى سۋرەتتى تەزىرەك كورسەتىڭىزشى. ماعان ءومىرىڭىزدى قيعان ەكەنسىز، مۇمكىن بۇرىنعىداي دا سۇلۋ بولىپ كەتكەن شىعارمىن؟!».
قىزدىڭ ءسوزى ۇيقىلى-وياۋ ايتىلسا، سەمسەردەي وتكىر ەدى.
«بوياۋى قانىق بولۋ ءۇشىن ءقازىر ىستىق سۋعا ءتۇسۋىڭ كەرەك. قينالساڭ دا شىدا» دەپ، سەيكيچي قىزدىڭ قۇلاعىنا جاناشىرلىقپەن سىبىرلادى. «شىنىمەن سۇلۋ بولسام، قانداي قيىندىققا بولسا دا توزەمىن» دەپ، قىز ءتانىنىڭ اۋىرعانىنا قاراماي كۇلىمسىرەدى.
«ااي، ىستىق سۋ اشىتىپ جاتىر... وتىنەمىن، مەنى جالعىز قالدىرىپ، ەكىنشى قاباتقا بارىڭىزشى، بەيشارا ءحالىمدى ەر ادامنىڭ كورگەنىن قالامايمىن»
قىز ىستىق سۋدان شىققان سوڭ ءسۇرتىنىپ تە ۇلگەرمەي، سەيكيچيدىڭ قولىن قاعىپ تاستاپ، اۋىر ازاپقا جانى شىداماي بۇك ءتۇسىپ ەدەنگە قۇلادى.
البا –جۇلبا شاشى بەتىنە توگىلدى. ارت جاعىندا اينا بار. اينادان اپپاق قوس وكشە كورىنەدى. كەشەدەن بەرى وزگەرگەن قىزدىڭ قىلىعىنا سەيكيچي قاتتى تاڭ قالدى. ەكىنشى قاباتقا كوتەرىلىپ، جارتى ساعات وتكەندە جۋىلعان شاشىن ەكى يىعىنا ءتۇسىرىپ، ءۇستى-باسىن رەتكە كەلتىرگەن قىز كوتەرىلدى. اۋىر ازاپتىڭ ءىزى دە قالماعان، كوزى مولدىرەپ، ءدالىزدىڭ جاقتاۋىنا سۇيەنگەن كۇيى تۇماندانعان اسپانعا قاراپ تۇر.
«مىنا سۋرەتتەردى تانىڭدەگى تاڭبامەن قوسا ساعان سىيلايمىن، ەندى قايتۋىڭا بولادى» دەپ، سەيكيچي ورامداردى قىزدىڭ الدىنا قويدى.
«بۇرىنعى ۇرەيدەن تولىق ارىلدىم. ءسىز مەنىڭ اياعىمنىڭ استىنا توسەلگەن كوڭ بولدىڭىز» دەپ، قىز جانارىن سەمسەردەي جارق ەتكىزدى. قىزدىڭ قۇلاعىندا جەڭىس جىرى جاڭعىرىپ جاتتى. «قايتارىڭدا تانىڭدەگى تاڭبانى تاعى ءبىر رەت كورسەتشى» دەدى سەيكيچي.
قىز ءۇنسىز باسىن يزەپ، يىعىنان كيمونوسىن ءتۇسىردى. تاڭعى ساۋلە تاندەگى تاڭباعا تۇسكەندە ارۋدىڭ ارقاسى جارق ەتتى.
جاپون تىلىنەن اۋدارعان شارافات جىلقىبايەۆا
