اكەم اعاسىنىڭ مايدان دالاسىنان جازعان حاتتارىن «كوزىڭنىڭ قاراشىعىنداي ساقتا» دەپ ماعان اماناتتاپ كەتتى. كادىمگى ءۇشبۇرىشتى «دالا پوشتاسىنان» جازىلعان حاتتار. كوزىمدى سۋلاپ وتىرىپ وقيتىن حاتتارىنان ونىڭ ەلگە دەگەن قيماس ساعىنىشىن سەزەمىن. كومەسكى تارتىپ جازۋلارى وشە باستاعان حاتتارىن ەجىكتەي وتىرىپ، نۇكتەسىنە دەيىن جاتتاپ الدىم دەسە دە بولادى، مىنا ءبىر حاتىندا «باۋىرىم،- دەپ باستاعان ەكەن، - ءبىز كەڭەس وداعىنىڭ ءار پۇشپاق جەرى ءۇشىن قيان - كەسكى سوعىسپەن شەگىنۋدەمىز. ەگەر جەردەن ايرىلساق، ەلدىگىمىزدەن ايرىلاتىنىمىزدى، ەلدىگىمىزدەن ايرىلساق حالقىمىزدان ايرىلاتىنىمىزدى بىلەمىز. سول ءۇشىن جەرىمىزدىڭ ءار سۇيەمىن قاسىق قانىمىز قالعانشا قورعاۋدامىز.

ءقازىر شابۋىلعا شىعامىز، ءىنىم امان-ەسەن كەزدەسۋگە جازسىن،- دەپ حاتىن كەلتە اياقتاپتى. وسى حاتتان سوڭ اعامنان حابار ۇزىلسە كەرەك. اكەم حابار-وشارسىز كەتكەن اعاسىن ءومىرىنىڭ سوڭىنا دەيىن ىزدەۋمەن ءوتتى. ونى ينتەرنەتتىڭ «مەموريال» سايتى ارقىلى اعامنىڭ بەلارۋسيا جەرىندە جەرلەنگەنىن ءبىلدىم. اعام سۇيەم جەردى جاستانىپ جاۋعا بەرمەي جان تاپسىرىپتى!!!

كەڭەس حالقى ءار سۇيەم جەر ءۇشىن قانىن توكسە، ءبىزدىڭ ۇكىمەت 1ملن.700 مىڭ گا «بوس جەردى» ساتۋعا شىعارعانىن، ونىڭ سىرتىندا تاعى دا 100 ملن. گا. بوس جاتقان جەر بار كورىنەدى. «بوس جەر» دەپ ايتۋعا قالاي اۋىزدارى بارعانى، ەگەر ونىڭ ەگەسى قازاق حالقى بولسا. ءوزىم بابالارىمنان قالعان جەردىڭ ساتىلۋىنا دا، جالعا بەرىلۋىنە دە قارسىمىن… 

كەشەگى دارابوز قابانباي، قانجىعالى بوگەنباي، شاقشاق ۇلى جانىبەك باتىرلار قان كەشىپ ءجۇرىپ، ۇلتاراقتاي جەردى ۇلعايتىپ ونىڭ استى- ءۇستىن بايلىققا تولتىرىپ ۇرپاقتارىنا تاستاپ كەتسە دە، قازاقتى ەل قىلاتىن ەستى حان بۇيىرماپتى. ءابىلحايىر حان قاراقان باسى ءۇشىن قازاق جەرىن رەسەيگە قوسىپ، قازاقتىڭ وي-ارمانىن 300 جىلعا شەگەرىپ تاستاعان…

نەمەرە اعامنىڭ زيراتى بەلارۋسيا جەرىندە بولعان سوڭ الاڭسىزبىن، ويتكەنى بەلارۋسسيادا جەر ساتىلمايدى، بەلارۋسيادا بىزدەگىدەي «بوس جەر» جوق، جەر يەسى بەلارۋستار. ولاردىڭ لۋكاشەنكو دەگەن كورەگەن باسشىسى جەر ساتىلسا بيلىگىنەن دە، ەلىنەن دە ايرىلاتىنىن ءبىلىپ، كولحوز، سوۆحوزداردى تاراتپاي بەلارۋس شارۋالارىنىڭ قولىنا بەرىپ قويعان. ال بىزدە تاۋەلسىزدىك العاننان كەيىن جەر ەگەسى كولحوز-سوۆحوزدار تاراتىلىپ جىبەرىلدى!!!

جاڭا عانا ءوقىپ-بىلىپ وتىرمىن استانانىڭ ىرگەسىنەن 27 مىڭ گا جەردى گەرمانيا ازاماتى روبەرت شۋماحەر ساتىپ الىپ، ترانشەيا قازىپ شەكارا ورناتىپ قويعانىن. ال، قىتايلىقتار 1ملن 700 مىڭ گا جەردى ساتىپ السا، ول جەردەن مۇلدەم ايرىلامىز عوي!!!

اللانىڭ نۇرى دارىعان ەلباسى: «حالىق قولدامايتىن زاڭنىڭ كەرەگى جوق. حالىقپەن اقىلداسىڭدار... حالىقتىڭ جەردى ساتۋعا قارسى شىعىپ، كوشەگە شىققانىنا ءبىر جاعىنان ريزا بولىپ وتىرمىن...» دەگەن پارمەنىنە ريزا بولدىم، سوندىقتان جەر ساتىلماسىن، جالعا دا بەرىلمەسىن، جەر ەگەسى قازاق حالقى.

ەرسىن ەرعالييەۆ