قازاقستان رەسپۋبليكاسىنىڭ قورعانىس ءمينيسترى يمانعالي تاسماعامبەتوۆ اسكەري قىزمەتشى،  ق ر قورعانىس مينيسترلىگى ارميا ورتالىق سپورت كلۋبىنىڭ كاپيتانى، وليمپيادا چەمپيونى  ولگا رىپاكوۆانى  ريو-دە-جانەيروداعى وليمپيادادا ءۇش مارتە سەكىرۋ سايىسىندا جەڭىپ العان قولا مەدالىمەن قۇتتىقتادى، - دەپ حابارلايدى Qamshy.kz ق ر قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.

«قۇرمەتتى ولگا سەرگەيەۆنا! ءسىزدى ريو-2016 وليمپيادا ويىندارىندا جەڭىل اتلەتيكادان جەڭىمپاز اتانىپ، قولا مەدال الۋىڭىزبەن قۇتتىقتايمىن. بۇل لايىقتى ماراپات.  ءسىزدىڭ جوعارى شەبەرلىگىڭىز، ەرىك-جىگەرىڭىز بەن جەڭىسكە دەگەن قۇلشىنىسىڭىزدىڭ ەرەكشە كورسەتكىشى. ءتورت جىلدا ءبىر رەت وتەتىن  بەدەلدى الەمدىك سپورت سايىسىندا ءسىز قازاقستاننىڭ قارۋلى كۇشتەرىنىڭ جوعارى دەڭگەيىن كورسەتىپ، ەلىمىزدىڭ تۋىن كوككە جەلبىرەتتىڭىز. وسىناۋ جوعارى ناتيجە وسكەلەڭ ۇرپاق ءۇشىن كاسىپقويلىقتىڭ جارقىن ۇلگىسى»، - دەپ ق ر قورعانىس ءمينيسترى يمانعالي تاسماعامبەتوۆ ءوزىنىڭ قۇتتىقتاۋ جەدەلحاتىندا اتاپ ءوتتى.

ۇزدىك ارەكەت ەتۋدە رىپاكوۆا 14،74 مەتر ناتيجەسىن كورسەتتى. بۇل ونىڭ ماۋسىمداعى ۇزدىك ناتيجەسى بولدى. ريو-دە-جانەيرودا وتكەن وليمپياداداعى قولا مەدال ول ءۇشىن مانساپ جولىنداعى ەكىنشى وليمپيادالىق مەدال بولدى. لوندوندا وتكەن وليمپيادادا ول التىن مەدال يەگەرى اتانعان بولاتىن.