بۇگىنگى كۇنى وڭتۇستىك قازاقستان وبلىسىنىڭ كولەمىندە 1200 شاعىن، ورتا جانە ءىرى ارا ءوسىرۋشى جەكە جانە زاڭدى تۇلعالار بولسا، ولار جىلىنا كولەمىندە 100 توننا بال وندىرەدى، دەپ حابارلايدى Qamshy.kz Baq.kz - كە سىلتەمە جاساپ.

بۇگىندە وبلىستا بال ارا شارۋاشىلىعىن دامىتۋ ماقساتىندا ءبىرقاتار جۇمىستار اتقارىلىپ، ونى سەلەكسيالىق اسىلداندىرۋ جۇمىستارىن جۇرگىزگەنى ءۇشىن ءاربىر ۇياشىعىنا مەملەكەت تاراپىنان 3190 تەڭگە قولداۋ قارجى تولەنۋدە. ال 2016 جىلى 3 مىڭ ۇياشىققا 9570،0 مىڭ تەڭگە قارجى ءبولۋ جوسپارلانعان.

وڭتۇستىكتىڭ ومارتاشىلارىنا قولداۋ كورسەتىپ وتىرعان مەكەمەنىڭ ءبىرى «ىرىس» ميكروقارجى ۇيىمى. اتالمىش ۇيىمنان قولداۋ العان شارۋاشىلىقتىڭ ءبىرى «ەكومود» ج ش س. سەرىكتەستىك ارا شارۋاشىلىعىن دامىتۋ ءۇشىن قارجى ۇيىمىنان تومەندەتىلگەن جىلدىق مولشەرلەمە نەگىزىندە 5 ملن. تەڭگە نەسيە الىپ، وعان 480 دانا ارا ۇياشىعىن ساتىپ العان. ولار ءار ۇياشىقتان شامامەن 25-30 كگ.، اسەل ءونىمىن الادى. بيىل شارۋاشىلىققا اۆستريا مەن ۋكراينا ەلدەرىنەن اسىل تۇقىمدى كارپاتتىق بال ارالارى اكەلىندى. ارانىڭ بۇل تۇرلەرى بالدى جاقسى جينايدى ءارى اۋا-رايىنا جىلدام بەيىمدەلەدى. بالدىڭ اققۋراي جانە تاۋلى تۇرلەرىن وندىرەتىن شارۋاشىلىق وندىرىلگەن ونىمدەرىن قازاقستاننىڭ سولتۇستىك جانە ورتالىق وبلاستارىنا جانە كورشى رەسەي ەلىنە ەكسپورتتاعان.

سونداي-اق، وبلىستا بال ارا شارۋاشىلىقتاردى عىلىمي سۇيەمەلدەۋمەن اينالىساتىن «وڭتۇستىك-باتىس مال جانە وسىمدىك شارۋاشىلىعى عىلىمي زەرتتەۋ ينستيتۋتى» جشس-دە بال ارا شارۋاشىلىعى سەكتورى جۇمىس جاسايدى. ال بال ارالار انالىعىن قولدان ۇرىقتاندىرۋمەن جك «دەميدوۆ» اينالىسىپ كەلەدى.

ايتا كەتەيىك، وڭىردە «وبلىستىق اۋەسقوي ومارتاشىلار قاۋىمداستىعى» جۇمىس ىستەيدى. بۇل قاۋىمداستىققا 250 بال ارا وسىرۋشىلەر مۇشە. قاۋىمداستىق ءتوراعاسى تورەحان نورمۇحامبەتوۆ.