الماتىدا «العاباس-6» شاعىن اۋدانىنداعى ءبىرقاتار تۇرعىن ۇيلەردى سالىپ، ءوز مىندەتتەمەلەرىن لايىقتى ورىنداماعان «دانيا كونستراكشن» ج ش س سوت الدىندا جاۋاپ بەرەتىن بولدى، - دەپ حابارلايدى Qamshy.kz.

الماتى قالالىق قۇرىلىس باسقارماسى باسشىسىنىڭ ورىنباسارى ازامات راحيموۆ تىلشىلەرگە وسىلاي دەدى. 

«دانيا كونستراكشن» ءجشس-ى سالعان تۇرعىن ۇيلەردىڭ ىشىندە ءنومىرى 1/148ء-شى تۇرعىن ءۇي دە بار. تۇرعىنداردىڭ ايتۋىنشا، بۇل ءۇي كەم دەگەندە 50 سانتيمەترگە ىشكى اۋلاعا قاراي قيسايىپ كەتكەن.

«بۇل 1/148 تۇرعىن ءۇي 2015 جىلى پايدالانۋعا بەرىلدى. ءبىز «دانيا كونستراكشن» ج ش س سوتقا بەردىك. ويتكەنى، بۇل كومپانى ءوز مىندەتتەمەلەرىنە جاۋاپسىز قاراعان. سوت شەشىمىمەن بۇل كومپانيادان 39 ملن. تەڭگە ءوندىرىپ الۋ كوزدەلگەن. ال، «قازاق قۇرىلىس جانە ساۋلەت عىلىمي-زەرتتەۋ جانە جوبالاۋ ينستيتۋتى» اق وسى «العاباس-6» شاعىن اۋدانىندا زەرتتەۋ جۇرگىزىپ، جەر قىرتىسىنىڭ ءالسىز ەكەندىگىن انىقتادى. ەندى وسى ينستيتۋتتىڭ ناقتى ۇسىنىستارىمەن تۇرعىن ۇيلەر ورنالاسقان جەر قاباتى نىعايتىلاتىن بولادى. بۇل جۇمىستار الداعى 1،5-2 اي ارالىعىندا اياقتالادى. تۇرعىنداردى ۇيدەن شىعارۋدىڭ قاجەتى جوق»، - دەدى ازامات راحيموۆ.