ريو-دە-جانەيرودا ءوتىپ جاتقان XXXI وليمپيادا ويىندارىندا بوكستان ەرلەر اراسىندا اسا اۋىر سالماقتا ەل نامىسىن قورعاپ جۇرگەن يۆان دىچكو شيرەك فينالدا ەفە ادجاگبانى ۇتتى، - دەپ حابارلايدى Qamshy.kz..
يۆان ءۇش راۋندتا دا قارسىلاسىنا ەش مۇمكىندىك بەرگەن جوق. كەزدەسۋ تىزگىنىن العاشقى مينۋتتان ءوز قولىنا ۇستادى. ناتيجەسىندە ءۇش تورەشى دە دىچكونىڭ جەڭىسىنە كۇمان كەلتىرگەن جوق.
يۆان وسىنىڭ الدىندا ءازىربايجاندىق ماگومەدراسۋل مەدجيدوۆتان باسىم تۇسكەن بولاتىن. ول كەزدە مەدجيدوۆتىڭ قاباعى جىرتىلىپ، دارىگەرلەر وعان جارىستى جالعاستىرۋعا تىيىم سالعان بولاتىن.
وسىلايشا دىچكو ەكىنشى رەت وليمپيادا ويىندارىنىڭ جارتىلاي فينالىنا شىعىپ وتىر. بۇدان ءتورت جىل بۇرىن لوندوندا قولا جۇلدەگەر اتانعان ەدى.
